![](https://utusansarawak.com.my/wp-content/uploads/2021/01/Pic5.jpg)
![](https://www.utusansarawak.com.my/wp-content/uploads/2021/01/Pic5-748x1024.jpg)
Tusun Ke-13
IBAN ULU ENGKARI NGELABAN PERINTAH RAJA
Dalam taun 1902, orang di Ulu Engkari di menua Batang Ai angkat baru ngelaban perintah Raja Charles Brooke. Sida betuaika Penghulu Munau apai Laja seduai anak iya Kana. Bantin seduai Kana suah ngayau rayat perintah Raja Brooke di Lemanak. Nya alai Tuan Raja pan ngasuh Munan ari Sibu, Banta ari Skrang enggau Insol anak Nanang ari Padeh ngayau sida tu kena ngukum sida.
Banta seduai Insol ti datai ari Ulu Skrang alah maya ti besatup enggau bala Kana ke nan di Rumah Penghulu Jimbau. Taja sida alah, Insol bendar amat ngelaban munsuh ngenanka bala nembiak iya datai ke sida melunggang ngagai menua diri. Semua nembiak Banta seduai Insol ke mati lebuh nya bisi tiga belas iku.
NYERANG RUMAH PENGHULU JIMBAU
Maya nya mega Munan ngempuruka bala Iban ili Batang Rajang enggau Iban Kanowit ke betubuh urung 900 iku. Bala Munan merau ari Kanowit lalu bedarat nuju Ulu Katibas. Datai di Batang Ai, Munan mai bala iya ngetu enda jauh ari rumah Penghulu Jimbau. Bala Munan ke nuntung tu kira tiga hari udah bala Banta seduai Insol ke alah laban munsuh sida. Rumah Jimbau maya tu penuh dedat laban orang ulu Batang Ai ke nemuai kia.
Munan mai bala baum milih sapa ke tuai nyerang munsuh. Munan milih tiga iku manuk sabung ke dikearapka iya. Sida tiga tu iya nya Ajah ari Binatang, Ajah ari Entaih, Ajah ari Melangan. Sebedau mupuk Munan sempat nundi sida tiga,
“Enti kita tiga enda teulihka dengah seiku-seiku, badu aku agi ngangauka kita Ajah,” ku Munan.
Tengah malam nya, Munan ngasuh dua iku nembiak iya nengkilaka rumah munsuh. Maya nya sida Penghulu Jimbau serumah benung begawai Enchabuh Arung ngintu pala bala nembiak Banta seduai Insol ke ulih sida. Lebuh ke belalai di baruh rumah engkilaka ulah munsuh, seiku indu pansut ari bilik lalu bejaku enggau Kana. Iya madahka diri bemimpi munsuh deka datai nyerang sida lalu ngasuh Kana besedia. Ninga nya Kana lalu bejaku.
“Ni munsuh ka datai agi. Orang Skrang enggau Saribas udah alah. Sida udah pulai ngagai menua sida…nadai munsuh tau nurun ari langit lalu nyerang kitai,” ku Kana.
Udah ninga jaku Kana nya, nembiak Munan nya pan beguai-guai mulaika diri lalu ngaga ripot ngagai Munan. Ninga munsuh benung begawai Enchabuh Arung, Munan mai bala iya ngalahka rumah munsuh sebedau dinihari pagi nya. Datai di rumah munsuh, tiga iku manuk sabung Munan ke bela benama Ajah enggau tujuh iku ke bukai, nyengkaum Banyi apai Ibi ari Julau matak serang nengah ruai. Laban hari agi pagi bendar, tambah mega mayuh bala munsuh ti buntau sereta mabuk, mudah bendar bala Munan ngalahka sida. Bala Munan ke bukai ngipa munsuh ke rari ari pala tangga, ari tanju tauka ari ujung bilik. Dalam kayau tu bala Munan bulih lima puluh tiga igi dengah enggau lima iku tangkap (ulun). Penghulu Munau enggau anak iya Kana enggau menyadi indu Kana ulih ngerarika diri.
MUNAN DICHIRI NYADI PENGHULU DALAM
Dalam taun 1903, tegal pemanah pengawa sereta pemerani iya nguluka kayau ti diasuh perintah Raja, Munan diasuh perintah Raja Brooke pindah ari Julau lalu diau mendam di Pulau Kertau seberai pasar Sibu. Enda lama udah nya iya lalu diberi pangkat nyadi Penghulu Dalam (Great Chief). Tu pangkat tuai Iban ke pemadu tinggi maya nya kelia, iya diberi gaji bulan sereta bisi opis di pasar Sibu.
Dalam bulan March 1904 sekali agi Munan nyadi tuai kayau nguluka bala Raja betempuh enggau bala Bantin seduai Kana ba endur ke benama Wong Adai di Ulu Entabai. Dalam kayau tu Bantin seduai Kana mega alah. Udah ke alah tu, Bantin mai bala nembiak iya rari ke bukit ke dikumbai Mikai Pambar antara menua Sarawak-Kalimantan ke kena pegai perintah Belanda di Indonesia. Kana bisi kena timbak bala Sarawak Renjer, tang iya ulih ngerarika diri. Kayau Munan ke sekali tu mega dikumbai “Kayau Bongkap” laban bala Bantin ngayau ngena perau pengayau ke digelar bongkap.
Dalam bulan Mei 1907, Bantin enggau bala tuai Iban Batang Ai enggau ulu Batang Rajang ke selalu angkat ngelaban perintah lalu besetuju bebaik enggau perintah seretai enggau bala Iban ili Batang Rajang enggau Batang Lupar. Pengawa bebaik tu diatur di pasar Kapit. Penghulu Dalam Munan nyadi pengari Iban ili Batang Rajang bebaik enggau sida Bantin. Raja Charles Brooke empu enggau Residen Charles Hose nyadi saksi pengawa bebaik tu ngarika perintah Sarawak. Taja pia, Bantin angkat baru ngelaban perintah Raja laban mayuh pekara ti ngasuh iya enggai meda perintah Raja Brooke.
KAYAU BUKIT MIKAI PAMBAR
Kena 31 Ogos 1908 sekali agi Penghulu Dalam Munan diasuh Raja nguluka bala perintah ngayau ngalahka Bantin di bukit Mikai Pambar ti pegai perintah Belanda di Indonesia. Sebedau nurun ngayau, Munan bemimpi bejalai nisi rumah panjai orang. Lebuh iya mansa mua penyenguk, seiku indai tuai orang ngeludahka rampang pinang iya lalu kena baju Munan.
“Oh kasih mih nuan Munan. Ukai sengaja aku deka ngeluaka rampang pinang kena nuan. Ba kayau nuan ke sekali tu ila Munan, nuan deka telih laban munsuh. Anang tekenyit nuan, au. Aku tu Indai Abang ari Gelong,” pia ku indai tuai nya
Taja mimpi iya enda manah, Munan enda tau enda nitihka jaku perintah Raja. Iya enda tau enda nguluka sedadu Raja ngayau Bantin. Datai di Nanga Delok bala Munan bebagi dua, sebagi ngulu Sungai Delok, sebagi agi ngulu Sungai Jengin. Maya nya sida enda tentu balat besatup enggau munsuh tang laban udah disumpah antu, maya ke ngalahka Bantin di Mikai Pambar, Munan telih ba pah kena tumbuk munsuh ti benama Jugu, seiku ari manuk sabung Bantin ke berani sereta kebal.
Ketegal peneleba enggau pengelandik iya ngiring rayat sereta dipebasaka orang ba pelilih menua Batang Rajang, Munan dipilih nyadi kaban penuh Kunsil Nengeri dalam taun 1906, nganti Pengarah Ringkai ari Rantau Anak, Betong. Munan nyadi kaban Kunsil Nengeri nyentuk ke iya mati dalam taun 1914, di Sibu. Iya dianjung ngagai pendam di Pulau Kertau, Sibu.
(Betampung ba Tusun Ke-14 minggu nyin ila)
Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatapps tu: 013 8325146
Oleh Harry Usup Umbar