SIBU: Penyampat enggau penyikal raban Bomba mujur nyelamatka siti kedai runchit ba rumah kedai lama di Sungai Merah ari retung diempa api malam Hari Empat ke udah.
Tuai Opis Bomba enggau Penyelamat Malaysia (JBPM) Zon 4 Sibu Janggan Muling madahka, pengudah nerima kangau minta bantu pukul 12.53 tengah malam, semilan iku raban Bomba ngena siti kerita Bomba enggau Unit Bantu Servis Resa (EMRS) ari Balai Bomba enggau Penyelamat (BBP) Sungai Merah berumban ngelawa endur penusah nya nyadi.
“Kelimpah ari nya, lapan iku agi raban Bomba ngena siti kerita Bomba ari BBP Sibu sama bela datai ngesah nagang sereta madamka api ke nganguska kedai runchit nya,” ku iya lebuh dirandau pengarang berita kemari.
Ku iya, api nya nganguska 35 pesen siti kedai runchit 10 kaki X 30 kaki pemesai ba rumah dua ringkat.
“Nadai penusah bebadi diriput lalu pengawa nasat lebih silik agi benung diatur laban deka nemu kebuah penusah angus nya nyadi enggau pengerugi lalu pengawa madamka api tembu pukul 2.15 pagi,” ku iya.
Oleh Akun Giman
