KUCHING: Barisan Nasional (BN) meri jaku pemutus enda masuk Pengawa Bepilih Besai Negeri Sarawak ke-12 (PRN-12) kena 18 Disember ila.
Pekara tu disahka olih Mandal Chairman BN, Datuk Seri Mohamad Hasan dalam Aum Media Khas di sebuah hotel tebilang ditu, kemari.
Ku iya, tu keterubah iya BN enda masuk betanding sereta nganjung chalun sereta enda ngena lambing ‘dacin’ ba PRN-12.
“Kami datai ke Sarawak kena meri sukung moral sereta madahka kami enda deka betanding ditu, tu penemu BN,” ku iya.
Tambah mega, Parti Pesaka Bumiputera Bersatu (PBB) enggau parti-parti di dalam Gabungan Parti Sarawak (GPS) nya suba bakih-bakih parti komponen di dalam BN ke kala sama bela merintah negeri enggau menua kitai.
“Kami (BN) besampika bakih kitai, GPS ulih menang ba pengawa bepilih tu,” ku iya.
GPS begulai enggau BN sereta Pertubuhan Kebangsaan Melayu Bersatu (UMNO) kenyau ari 1970-an, tang pengudah PRU-14 iya nya dalam taun 2018, GPS udah ngaga pemutus enda begempung enggau BN agi.
“Nya kebuah, sehari tu kitai mengkang bisi kaul ke rapat. BN datai meri sukung moral.
“Ngagai rayat Sarawak, aku minta ngambika meri pengarap ngagai GPS merintah negeri tu,” terang iya.
Tambah iya, pekara penegap sesebuah negeri nya pekara ke beguna ungkup pengelantang rayat.
Aku arap ‘angin’ ari Melaka ulih dibai nengah Tasik China Selatan datai ke Sarawak ke alai rayat Negeri Melaka udah meri kuasa ngagai BN megai Melaka,” ku iya baru.
Iya mega enda ngemendarka sebarang orang tauka gerempung menggau ‘dacin’ ungkup PRN-12, enti bisi orang nguna lambang nya, pekara tu deka dibai ngagai Opis Kunsil Pengawa Bepilih Besai (SPR).
