![](https://utusansarawak.com.my/wp-content/uploads/2022/08/4.SCV-Welcoming-2-e1660613621264.jpg)
BALA anak kitai Iban sigi diajar apai indai kenyau ari mit enda tau bula. Mali kitai bula, anang sekali-kali bula, pia ku sida niang apai, niang indai menya.
Tu endang amat, laban tu meh utai dibekal apai indai sepengudah anak sida nemu bejaku lalu mereti jaku ajar.
Ungkup bala orang Kristian, tu kena nambahka ajar ari pengarap nya, kelebih ajar dalam Injil ti nagang semua orang Kristian enda tau bula kelimpah ari jaku tagang bukai ti enda ngasuh kitai ngereja pengawa jai baka enchuri, butang, munuh orang enggau penyai bukai.
Pemula tu siti pengawa enda manah laban pangki enggau pangka pemula tu balat amat enti iya nya besangkut paut enggau pekara besai. Ambika banding, enti nya pemula pasal pekara orang parai, orang deka nemuai, orang deka ngatur pengawa besai baka gawai enggau pengerami tauka sebarang pemula ti bisi kait tauka sangkut paut enggau orang mayuh, orang besai pangkat tauka sebarang pemula ti bisi sangkut paut enggau mensia mayuh.
BESAI PANGKA
Balat mega pangka enti pemula nya siti petenah baka madahka orang bisi butang, iya nya bini orang beleman enggau lelaki ti ukai laki iya sereta agi meruan bisi bini. Pemula tu balat besai sengki, pangki enggau pangka iya laban nya balat ngemaluka sereta ngerusakka pengidup orang ti dipetenah tauka dipadah bisi butang. Tu meh siti pemula ti ditagang sereta deka ditunggu sereta ditinggang enggau ukum bukai nitihka adat asal kitai Iban ba rumah panjai munyi ti deka dipadah aku udah tu lagi.
Kelia, maya menua agi siga sereta agi meruan bisi munsuh tau datai nyerang, endang enda tau sekali-kali nempa cherita bula, iya nya cherita pasal orang bisi deka datai nyerang. Utai tu kala nyadi, tang lebuh cherita ti ditusui orang nya endang nyengala bebatang bisi ga orang enda pechaya lalu ngumbai tudah ke nusui cherita nya bula.
.
Ba adat asal orang menua ribai, sida tau bula sehari dalam setaun, iya nya kena 1 April laban hari nya diberi nama April’s Fool. Tu hari semua diberi lisin tauka kemendar bula, tang mayuh orang ngena enggau jalai salah tauka salah kena hari tu. Di Kanowit kena 1 April 1984 suba, siku pemesai ari sebengkah opis perintah bisi ditangkan tuan DO enggau jaku laban bisi nyadung notis ngagai sebuah sekula madahka Datin Patinggi Puan Sri Laila Taib (dudi ari tu iya bulih gelar Datuk Amar), iya nya bini Kepala Menteri maya nya, Datuk Patinggi Tan Sri Abdul Taib Mahmud (diatu Gabenor Tun Pehin Sri), ti deka datai nemuai ngagai sebuah sekula primari St Francis Xavier ti semak pasar Kanowit kena 7 April iya nya seminggu pengudh 1 April. Surat madah berita nya pan ngena pala rasmi opis nya. Nama agi deh, nyau baka kalat bala sida tudah kepala pengajar enggau bala pengajar sereta orang bukai ba sekula nya.
Semadi sida nanya pemetul nya ngagai opis DO baru sida nemu nya utai bula. Tu sigi chunto pengawa bula besai ti enda patut dikena kitai betundi. Uchak ke nyadung berita nya pan bisi mega kena tangkan enggau jaku sereta ditangkan enggau surat ari tuan DO Kanowit maya nya niang Empeni Lang. Penulis nemu pekara tu laban maya nya nyadi kepala pengajar ba SMK Sedaya di Kanowit.
Nyadi tu siti chunto pemula besai. Kebuah besai laban iya besangkut paut enggau sebuah sekula sereta bini kepala menteri.
Mayuh agi chunto enggau banding pemula. Ba rumah panjai kami kelia endang suah bendar bala sida ke tuai bebanding sereta belabanka pemula. Tang tu endang kena betundi, laban enggai alah laban pangan, bisi ga tuju iya ngasuh ketawa.
DITEMU LANDIK BULA
Ambika banding, siku orang tuai kelia endang ditemu landik nusui utai bula. Sekali sebedau aum rumah panjai, iya madah bisi sekali kala nyelam ba Lubuk Labang dalam Batang Krian lalu madahka diri berekak enggau baya. Rauh-rauh baya dikerebuk iya leka mata, ku apai tuai nya. Nyadi bisi aya siku nimbal cherita nya madahka diri kala migo, iya nya nenggau ai ngena pigo ba siti sungai ke benama Sungai Engkala ti benangaka Batang Krian. Lebuh migo nya, iya bisi meda ai nyegang ari ulu nanga sungai nya. Lebuh iya ngelawa nanga sungai nya iya meda siku ular Sawa enda ulih mindah laban lekat ba nanga sungai ngujungka ai enda ulih rarat empa pemesai. Tu pemula kena betundi aja tang nadai pangki besai ba pengidup orang siku-siku tauka ba pengelikun menua.
Agi bisi siti pemula, seduai menyanak sama nyelam ngiga ikan ba ungkap. Apai iya dudi mimit pansut. Lebuh ditanya anak iya nama kebuah laun bendar pansut, tang nadai ga bulih ikan, apai iya madah iya ngetu makai kampua mee dulu laban dalam ungkap ai din, bisi kedai kupi nyual mee, ku iya.
Udah nya anak iya nyelam baru, tang bisi tepantup mimit pala ba kayu dalam ai lalu bedarah. Udah nya iya pan ngechul pansut. Ditanya apai iya nama kebuah pala bedarah. Dia anak iya nyaut madah kena palu orang nyual mee kampua laban apai iya enda mayar makai mee ba kedai dalam ungkap din sebedau nya. Tu pan pemula kena ngasuh ketawa.
Bisi ga orang bula dikena beduan sekeda orang ti amu. Kenu ku cherita nya, orang tuai nya bisi kala udah dikemulaka siku nembiak dalam dua taun dulu ari nya. Nyadi iya madahka diri baru pulai bejalai nimbak ngagai adap menua dikumbai Sebirung. Cherita tu nyadi urung taun 1972 suba lebuh menua nya agi apin bisi jalai ke meruan – enda baka diatu laban udah bisi jalaI SALCRA. Apai tuai orang nya madah keranji kunsi bala sida ke alai iya nusui cherita nya benung lebat endar lalu udah tau ditiki. Nya alai ninga nya bala sida ti alai iya nusui nya amat gaga bendar ati. Sida tiga iku diri menyadi nya lalu berumban ngabas keranji munyi ti udah dipadah apai tuai orang nya tadi. Sida tiga nya endang besikap bebaika ma ti besai laban ngadang mai buah keranji chukup mayuh. Pagi nya sida beguai bejalai nuju tunga pun keranji ti disadang bebuah nya. Sida datai ba pun keranji nya pengudah bejalai lebih ari dua jam. Palik kiba, palik kanan ngagai semua tiga pun keranji nya, amat bisi bebuah tang agi puda. Akai rai, chukup pedis ati sida tiga tegal udah dikeduan apai tuai orang nya tadi. Tang siku ari sida tiga nya nemu apai tuai nya endang sigi malas pemula iya bisi dua taun dulu ari nya. Bula kena malas pemula meh reti cherita tu.
TUGUNG PEMULA
Nyadi enti orang siku-siku nya semampai ditemu bula, iya nya ukai bula kena betundi lebuh bisi aum, orang rumah panjai bisi siti jalai ngukum iya. Orang nya deka ditugung orang tegal bula. Tugung nya digaga ari papung kayu. Semua orang mansa tugung nya bela nambah pemayuh papung kayu, bela nikau ngagai tugung awakka tugung nya majak tinggi, majak mayuh.
Tugung pemula nya siti utai ti balat ngemaluka orang ti bula nya. Ukai iya aja ti malu, tang bala sida sebilik enggau bala peturun iya dudi hari pan malu. Orang ti ditugung nya dikesema orang menua nya.
“Nya tugung pemula sanu,” ku orang lalu nyebut nama orang ti empu tugung.
Tu siti utai balat ngemaluka orang nya, sereta enggau bala sida sebilik bukai. Nya alai enti nyema orang nya ditugung endang amat besai sereta bisa meh pemula iya. Nyangka pemula nya udah balat ngerusak pengidup ruang bilik orang bukai, ngeregau pendiau, pengelikun enggau pengelantang mensia mayuh sereta pangka ti kurang lebih bakanya.
Berindik sereta bepun ari tu kitai Iban bisi jaku, ‘anang bula, enggaika ditugung’.