MARUDI: Maya Pengawa Bepilih Besai Nengeri Ke-12 (PRN-12) ke deka datai mayuh bengkah parti politik ari penyakal aktif datai deka ngelobi sereta minta sukung sida ke diau ba rumah panjai.
Laban nemu bala sida nya deka datai, tuai raban bansa Iban ba kandang Poyut Lubok Nibong, Pemanca Randie Bundan meri jaku tangkan ngagai semua orang ngambika enda mudah kena tipu enggau danji manis bala sida nya ke deka ngena taktik enda manah ngambika sinu ngagai sida iya.
“Anang mudah makai jaku asut enggau pemula raban penyakal lalu kitai patut ingat maya dipegai Pakatan Harapan (PH) pengelama 22 bulan,” ku iya.
Ku Randie, maya PH megai perintah 22 bulan rayat ba endur tu nadai bulih sebarang utai sekalika pemansang tauka bantu.
Randie mega nangkan peranak Poyut/Lubok Nibong patut bejimat enggau penatai raban sida nya sekalika penyakal ari Semenanjung tauka iya ke bukai laban penatai sida iya ukai deka mantu tang mechahka penyerakup raban bansa ba endur tu.
Randie mega madahka, danji sida iya bedau temu ulih dikamatka laban penatai sida iya semina maya musin bepilih besai aja lalu pengudah nya lenyau nadai temu tunga.
“Aku ngasuh semua peranka ba Poyut Lubok Nibong meri sukung nadai bebagi ngagai pengari rayat kitai ke diatu, Dato Gerawat Gala laban udah ditemu kitai ulih ngaga pengawa,” ku iya.
Ku iya, mayuh projek pemansang enggau projek rayat diberi nadai bechiping ngagai rayat ba sitak menua ke dipegai iya.
Oleh Jiku Juguong
