LAWAS: Siku pekereja konterik ke bisi kaul ke begunaka dadah enggau chara ti salah bepun taun nyin kemari ditan polis kelimpah raban polis deka begigaka orang ke nyadi penyual dadah nya.
Saspek ke benung nginsap syabu maya pengawa meresa ngenyit ke diatur ba sebuah rumah enda jauh ari endur nganti bas Kampung Melusuk kena Hari Empat minggu nyin kemari.
Saspek lelaki ke beumur 47 taun ari Kampung Baru Sundar, ditan pukul 10.00 pagi pengudah ditemu bisi kaul ngena dadah chara ti salah di rumah nya.
Nitihka Kepala Polis Pelilih Lawas, DSP Roslan Leman madahka, asil meresa tubuh suspek, raban polis bisi nemu kerat stro ke diisi enggau peku kristal ke dipelaba dadah bansa syabu, pemerat 0.13 gram ti berega RM20 dalam beg sandik chelum ke dibai saspek.
Asil pengawa pansik, saspek ngaku makai dadah bansa syabu kena Hari Tiga minggu nyin kemari ba rumah iya empu di Kampung Baru, Sundar.
Saspek mega madahka ia bulih bekal dadah syabu nya ari siku lelaki benama ‘Dillah’ di Jematan Awat-Awat kena pagi Hari Empat minggu nyin kemari.
Roslan ngesahka saspek mega positif dadah ba pengawa meresa ai kemi sereta diatu ditan awakka atur tangkan ti patut dipejalaika di Balai Polis Lawas.
Saspek nadai ngembuan rekod jenayah lama lalu deka ditasat nitihka Seksyen 12(2) Akta Dadah Berbahaya (ADB) 1952 enggau Seksyen 15(1)(a) ADB 1952 (penyalah nguna dadah ti salah sereta nadai bulih pemendar ari piak bekuasa.)
Pia mega, DSP Roslan deka ngiga lelaki benama ‘Dillah’ orang ke bejual dadah ngagai saspek.
