BINTULU: Kelab Kuntau Sinding Ujan Panas 48 Sarawak, dikarapka uluh nyadi platform kena nyungkak seni nyaga diri empu ungkup raban bansa Iban.
Kaban Kunsil Negeri (ADUN) Samalaju, Majang Renggi madah, beratika kelab nya udah direjister enggau Opis Pengerjister Gerempung Malaysia.
“Aku pechaya kuntau ulih nyungkak seni nyaga diri sebaka enggau silat nyengkaum seni nyaga diri empu ke bukai nyema kelab ke ditumbuhka tu terus fokus dalam nyapai tuju,” ku iya.
Iya mansutka jaku tu lebuh bejaku dalam Pengerami Bejadika Kelab Kuntau Sinding Ujan Panas 48 Sarawak di Nyabau Height, Bintulu.
Kelab nya udah dikemendarka olih piak Pengerejister Gerempung Malaysia kena 5 Jun 2020 lalu diatu bisi 80 iku raban ke berejister.
Nundaku Majang, penumbuh kelab nya mega ukai semina nyadika palan alai ngetanka seni nyaga diri empu ungkup raban banas Iban tang mega kena ngerampitka kaul antara raban kelab.
“Aku arap Kuntau ulih dibantai sereta ulih digaga chara dagang.
“Tu ketegal Kuntau ulih matak temuai seraya diatu Bintulu udah nyadi pusat industri menua,” ku iya.
Bekaul enggau nya mega, iya meransang ngambika kelab nya ngaul mayuh agi raban nembiak ngambika nyadi pelapis sereta ulih neruska tradisi kuntau ke jemah ila.
“Nyema kelab tu fokus kena ngerembaika Kuntau aku ngasaika iya ulih setikas enggau seni nyaga diri empu ke bukai baka Silat, Taekwando, Muay Thai enggau ke bukai,” ku iya.
Berebak enggau nya, iya ngarapka kerejasama ari semua piak dalam mantaika Kuntau ngambika jemah ila kuntau ulih dibantai di tikas antarabansa.
Seraya nya, Majang udah ngagih penyampau RM7 ribu ungkup Kelab nya bejalaika aktiviti sida.
