Sejarah Iban - UTUSAN SARAWAK

Tusun Ke-57

SEMPEKAT SARIBAS

PEKARA ti beguna amai ba Sempekat Saribas nya dikena ngemunaska pengawa lanun ba tasik lalu bala tuai Iban Saribas udah setuju nerima pekara nya. Danji dalam sempekat nya digaga Orang Kaya Pemancha (OKP) begulai enggau bala tuai Iban Saribas enggau Perintah Raja James Brooke.

Pekara Kesatu: Orang Kaya Pemancha Dana tuai bansa Iban, ti lebih tuai ari orang bukai, bansa Dayak Iban ti bumai betaun, bedanji ngamatka jaku; nya alai iya sereta bala nembiak redak iya ari Sungai Padeh mega badu agi ngayau ke menua nebing tasik.

Pekara Kedua: Orang Kaya Pemancha Dana tuai bansa Iban, ti lebih tuai ari orang bukai bansa Dayak Iban bedanji; enti bisi meda tauka ninga orang ti nerumpak, nyadi lanun tauka pengawa ti jai ke bukai sida deka ngaga ripot pasal pekara nya ba Sarawak (Kuching).

Pekara Ketiga: Orang Kaya Pemancha Dana tuai bansa Dayak Iban, ti lebih tuai ari orang bukai, Dayak bedanji; enti bala orang Saribas tauka Skrang agi ngayau, nerumpak tauka nyadi lanun sida enda ulih enda diukum Perintah Raja Brooke.

Pekara Keempat: Pasal orang dagang di Sungai Padeh, sida nya deka dijaga ngena undang-undang Peritah Raja enggau chara ti rurus. Sida pedagang tu enda tau dirumpak tauka diakal sereta diindik enggau chara ke enda patut. Sema sida bisi berutang, sida pan enda tau dikachau tang patut ditasat lalu bai berundingka nginga chara dikena mayar utang sida nya.

Pekara Kelima: Enti Raja mupu padi, sida enda tau enda nerima orang ti ngumpul pupu padi nya lalu enda ngaga ulah ti jai ngelanggar udang-undang. Nya alai enti Tuan Raja nganjung bala iya nasat deka meda padi ba umai sida, sida mesti disambut enggau manah.

Pekara Keenam: Sida deka madahka diri manah ati sereta taluk ke Raja enggau menua. Nya alai sida mega madahka diri deka diau dalam pemaik lalu enda berunding deka ngayau agi laban enda bemunsuh sereta bedendam enggau bansa bukai agi.

Enda lama udah nya Dana pan mai Linggir “Mali Lebu” ari Paku seduai Unal “Bulan” ari Ulu Layar bebalaska pemati bala Iban Saribas ba Tanjung Kauk nya. Sida deka ngayau munsuh ba Bukit Banting tang enda mukai-mukai maya sida ke nyendiaka diri ba kayau tu, Dana “Bayang” kena rampit sakit gelumut lalu mati dalam taun 1854. Anak lelaki iya ti benama Umpu mega mati ketegal penyakit nya.

Udah Dana “Bayang” mati, anak lelaki iya ke lumur tiga ti benama Aji nganti iya nyadi tuai Iban di Padeh. Taja pan iya biak ari Nanang seduai Luyoh tang iya berani agi sereta landik agi megai nembiak ari dua iku menyadi iya ke tuai nya. Aji nyadi tuai semina empat taun aja. Iya mati maya ke beperang ngelaban Raja Brooke di Sungai Langit dalam taun 1858. Udah nya menyadi tuai iya Nanang nganti iya lalu dipaduka perintah nyadi Orang Kaya Pemancha Nanang dalam taun 1886.

BUJANG BERANI IBAN JEMAN RAJA JAMES BROOKE

Udah James Brooke dichiri nyadi Raja Sarawak kena 24 September 1841, bansa Iban di Saribas enggau Skrang begempung ngayau munsuh sida ke menua adap Utara nyentuk ke Bintulu sereta Selatan Timur nyentuk ke Pontianak. Kenu ku Raja James Brooke ketegal pengawa ngayau nya mih iya minta tulung Sedadu Tasik Raja British ti betuaika Kapten Henry Keppel ngayau ke Saribas bulan Jun 1843, lalu mujur ngalahka munsuh iya ba Padeh, Paku enggau Rimbas. Pekara ti bendar iya nya bansa Dayak Iban ngayau munsuh sida di menua ti udah disebut di atas nya ketegal bisi kebuah baka tu:

Kesatu, sekumbang raban bansa Iban pindah ari Batang Kapuas (Sungai Kanyau, Sungai Merakai) lalu ngiga menua baru sebelah menua Sarawak sebelah Batang Sadong, Batang Saribas (Paku, Rimbas, Padeh, Layar enggau ti bukai) enggau Batang Lupar (Skrang, Batang Ai, Undup enggau ti bukai), Batang Krian lalu sida suah amat dikachau raban bansa Seru, Beliun, Baketan enggau raban bansa bukai ti lama udah diau ngachir di menua nya. Nyepi diri selalu dikachau sereta dibunuh baka nya, nya alai bansa Dayak Iban nya pan bepadah, betesau lalu bebalas ke pemati kaban belayan diri empu ti udah kena bunuh raban bansa sida nya. Nya mih kebuah Dayak Iban ti pindah ke menua baru sida nya suah bemunsuh enggau raban bansa nya (Seru, Baketan, Beliun). Ambi ke chunto; Patinggi Timbul nguluka bansa Seru engau Baketan ngayau bala Dayak Iban di Ketubit Ulu Paku. Maya Mujah “Buah Raya” pindah ari Skrang, udah nya ke Paku lalu ke Julau, Kanowit bala iya suah tasah dikachau, diserang, dibunuh raban-raban bansa ti dulu agi nguan menua nya baka Baketan, Seru, Sengalang, Rajang, Beliun enggau bansa bukai. Nya alai iya pan minta bantu baka kaban belayan iya di Lemanak (Batang Ai), Saribas enggau Skrang. Lebuh udah menang ngelaban munsuh iya nya, Mujah pan ngempu menua nya lalu udah nya makin mayuh-semayuh bala kaban belayan iya ari menua lama nitihka iya.

Kedua, bansa Dayak Iban jeman Perintah Raja Brooke agi nitihka sereta talukka adat sereta daya idup ti diajar Sengalang Burong ngagai uchu iya Sera Gunting. Sida mudah ringat lalu bebalas enti kaban belayan diri empu kena dengah orang bukai dulu lalu orang ti udah munuh kaban belayan sida nya tadi diambu sida munsuh sampai bejeman-jeman sebedau besumpah bebaik ngena chara bebanchak babi. Jeman dulu kelia bansa Dayak Iban selalu dulu dikachau Bunsu Remaung, Bunsu Baya; lalu tetiap kali sida bebalas, sida menang belama. Ari cherita nya mega bansa Dayak Iban pechaya; enda tau ngachau tauka munuh orang dulu; enti orang enda dulu ngachau sida. Uji ingat lalu peratika cherita laya Serapoh enggau bansa Dayak (Kantu).

Ketiga, sida apin besedia dipegai bansa bukai lebih agi bansa orang putih tauka Sultan Berunei laban sida nadai pengari dalam Perintah Raja Brooke. Sida pan enda nemu diri bisi perintah laban Raja Muda Hassim seduai Pengiran Makota ti ngarika perintah Sultan Berunei pan enda berunding enggau bala tuai bansa Dayak Iban lebih agi Dayak Iban ti Batang Saribas (Padeh, Layar, Paku) enggau Batang Lupar (Batang Ai, Undup, Skrang). Raja Brooke semina bekerejasama enggau Dayak Iban di Sebuyau enggau Dayak Iban Balau di Sadong, Banting enggau di Meludam laban sida nya dulu talukka Perintah Raja Sarawak. Udah nya bansa Iban Balau enggau Iban Sebuyau ti dibai Raja James Brooke ngayau Dayak Iban Saribas enggau Batang Lupar. Tegal nya Dayak Iban Saribas enggau Batang Lupar ngasaika diri enda dipeduli sereta enda diguna lalu ngumbai raban bansa Dayak bukai ti udah nunduk sereta nanahka perintah Raja Brooke munsuh sida. Ambi ke chunto: Aji di Padeh ngayau ke Kubu Lily; Bantin ngayau bala Lemanak, Skrang ti udah nundukka Raja Brooke.

Udah nya Perintah Raja Brooke nyau kering-sekering, lalu mujur ngambi bansa Dayak Iban di Sadong, Sebuyau enggau Lundu nyadi kaban lalu nanahka iya. Sida nya dibai iya ngayau bansa Dayak Iban ti ngelaban Perintah baka Iban Saribas enggau Dayak Iban Batang Lupar betuaika Kapten Henry Keppel, Datu Patinggi Ali, Mr. Steward enggau Lieutenant Ward ke ngasuh Raja Brooke mujur bendar nyabung bansa Dayak Iban belaya, bemunsuh lalu bebunuh enggau bansa diri empu. Munyi ku sempama sida Melayu: Kapal bansa Dayak Iban ti dibai sida ari Batang Kapuas pechah lalu ikan bam ti kenyang.

Maya bulan Januari 1845, Linggir “Mali Lebu” ari Paku nguluka bala tuai Dayak Iban Saribas ke Kuching laban nundukka perintah Raja Brooke, nitihka sempekat ti disemayaka sida di Padeh, Paku enggai Rimbas taun 1843 dulu suba. Sida Dayak Iban Skrang ngasuh Linggi ngarika sida laban Libau “Rentap” enggai datai.

Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia & The Encyclopaedia of Iban Studies, Volume III, Joanne and Vinson H. Sutlive.) The Sarawak Journal 1994 -The Source of Iban History, Benedict Sandin.

(Betampung ba Tusun Ke-58 minggu nyin ila)

Nya mih pun kaul Iban enggau perintah Raja Brooke di Sarawak berengkah ari taun 1841. Berinduk ari nya mega bansa Iban berengkah bepechah ketegal disabung Raja James Brooke. Engka bala pemacha bisi utai tanya tauka deka ngirum infomasyen engga gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.

Oleh HARRY USUP UMBAR