An Egyptian boy holds a chicken in the village of Ezbet Sidi Omer near Cairo March 6, 2006. Health officials say the cultural practice of keeping birds at home, often in secret, is aiding the spread of bird flu in the most populous Arab country, where 24 people have contracted the disease since it emerged in Egyptian poultry a year ago. Picture taken on March 6, 2006. To match feature BIRDFLU-EGYPT/ REUTERS/Nasser Nuri (EGYPT)
PENGIDUP MEGUNG ENGGAU SINDUNG
NYADI kelia bisi Iban siku benama Megung. Iya bebini ngambi indu siku benama Sindung. Bini iya Sindung tu anak Tuai Rumah Ambung.
Bebendar amat Tuai Rumah Ambung nagang anak iya Sindung enda ngasuh jadi enggau Megung, meda iya bangat seranta nadai utai kemisi.
Taja pia, seduai keran bendar deka jadi enggau pangan. Udah seduai jadi, seduai lalu diau kediri. Rumah seduai digaga Megung nya betiang ka buluh, bedinding ka gari tikai, lalu beatap ka kulit kayu. Sinu endar meda gaya pendiau seduai.
Kelimpah ari balat endar penyai alai diau, seduai mega seranta. Deka makai nadai asi, deka ngirup nadai ai, deka berapi nadai kayu. Suah bendar seduai ke lapar nadai utai dempa. Orang bukai enggai meri seduai laban meda Megung tu ngelusu endar, enggai kiruh enggau orang bumai. Ni bisi utai dempa enti enda bumai.
Taja pia, Megung tu landik endar ngaga bubu. Genap hari iya semampai majakka diri ngaga bubu. Mayuh bengkah pemesai bubu ke digaga iya, Tang ke endang nyengala udah tembu lalu ulih ditan ba sungai nya bisi tujuh iti. Bubu iya tujuh iti nya chukup tegap, sereta manah endar digaga iya. Baka ke ukai utai digaga orang ngelusu.
Nya alai bubu tujuh bengkah nya meh ke dianjung lalu ditan iya ba sungai enggau bisi mega ba batang ai besai.
Hari siti nurun meh Megung tu ngabas bubu iya. Peda mayuh endar ikan ulih bubu iya. Lebuh iya datai di rumah gaga endar meh tudah Sindung meda mayuh ikan ulih bubu laki iya Megung. Nyau bebesai, ikan ulih bubu nya. Bala sida semah, sida mengalan, sida empurau, sida tengadak. Tudah ikan baka bangah enggau entabalang nyau enda dipalik orang. Seduai melaki bini lantang endar nyawa laban selalu bisi ikan ka lauk.
Genap hari, genap pagi semua bubu Megung tujuh bengkah nya semampai bulih ikan magang. Tujuh hari Megung udah seruran bulih ikan.
Nyadi nyau ke lapan hari nurun ga iya ngabas bubu. Datai iya ba tampun bubu, dia iya meda ular sawa enggau ular belalang benung betunang. Ular sawa nya indu, lalu ular belalang nya lelaki.
Belalang seduai Sawa sama betemu enggau pangan diri di ulu sungai nya, alai Megung nan bubu iya. Seduai nya bisi leman enggau pangan diri. Megung lalu netak iku Sawa, lalu dibai iya pulai ke rumah sereta diselitka iya ba lalau tangga.
Hari maya iya datai di rumah, bangat endar ujan. Tudah Megung tu nyau gegetar laban chelap pulai ngabas bubu. Iya lalu bekindu ba dapur di bilik.
TEMUAI MEGUNG TIGA IKU
Benung seduai melaki bini makai tengah hari, datai temuai tiga iku. Semua bala temuai tiga iku nya sigat magang gamal. Sida berupai sama kering endar gamal, meda ari gaya gumpal isi. Jejabung ilang sida tiga sama panjai nipas tengah laman.
Meda penatai sida tiga, Sindung seduai Megung lalu ngasuh sida tiga sama duduk. Sida endang deka duduk. Sindung pan lalu ngenahka sida tiga nya makai, laban ke endang bisi lauk ikan, nadai malu ngenahka temuai makai.
Makai meh sida tiga, nadai utai ngenyang-ngenyang nya. Nyau berupai nyegang buah lemba sida tiga empa pengenyang. Ni enda kenyang laban belauk ikan ulih bubu Megung. Sindung seduai laki iya pan gaga endar ati meda sida tiga iku nya sama kenyang. Ka tambah mega gaga meda orang tiga iku nya deka dibai seduai merarau enggau seduai. Nadai kala udah orang bukai makai ba bilik seduai kelimpah ari sida tiga iku nya.
Udah badu makai, temuai tiga iku nya lalu madah sida iya ngambi Megung laban deka minta iya mutarka laya nembiak ba rumah sida.
“Aku tu enda kala ngintu laya, enda nemu adat. Entua aku baru nemu adat, tau ngintu laya orang,” ku Megung
“Kami enggai mai entua nuan, kami deka beguna ka penemu nuan. Nuan enda tau enda enggau kami, laban nuan aja ke diguna kami ulih mutarka laya tu,” ku temuai tiga iku nya.
MEGONG DIASUH MUTARKA LAYA
Udah nya sida tiga nya lalu nanya Megung baru.
“Kati nuan bisi meda orang betunang tadi? Kati nuan bisi meda seduai ngaga leman enggau pangan diri? Udah nya nuan lalu mai buok indu nya lalu diselitka nuan ba lalau tangga?” ku siku ari sida temuai tiga iku nya.
“Amat nya deh. Amat bisi aku meda orang dua iku ngaga leman tadi,” pia ku Megung. Iya lalu nurun nitihka temuai tiga iku nya.
Lebuh baru datai ba tengah laman rumah iya, sida tiga nya lalu ngasuh Megung ngetu sereta mejamka mata iya. Pejamka iya mata meh nunda padah sida tiga. Enda lama iya ke pejam, siku sida lalu ngasuh iya enchelak baru. Peda iya nyau nyelaie gaya menua ka alai iya bediri, ukai tengah laman iya agi tang nyau ba tengah laman rumah panjai orang sebuah ke chukup panjai sereta manah. Nyau rapas peda ujung setak sepiak ari ulu nyin empa pemanjai rumah orang nya.
Lemai nya udah badu bebela makai, Megung lalu ngintu laya orang nya. Nadai lama iya mutuska pechara orang nya, laban iya amat bisi meda seduai dua iku ke ngaga leman enggau pangan diri. Kelimpah ari nya iya mega bisi mai buok – iku ular sawa ke ditetak iya suba – nya ambi ka kelaie seduai amat bisi beleman.
MEGONG DIBERI UPAH BATU PENDING
Orang deka meri iya tajau, setawak enggau mayuh macham utai bukai ke berega ambi ka upah iya ke ngadu laya sida. Tang Megung enggai nyambut semua utai nya, laban iya keran deka minta rengka siti ke dikumbai batu pending. Ninga bakanya, orang nadai kakang, lalu terus ngenjuk batu pending ka upah iya. Batu pending nya lalu deka dibai iya pulai, simpan iya dalam raga iya.
Tang sebedau iya ngejangka menua nya, orang dia lalu madah ngagai Megung: “Laban nuan udah bulih batu pending, nya alai nuan tau ninga semua utai ke enda ulih dinga orang bukai”.
Udah bekau nya, semua orang ke diau dalam rumah panjai nya lalu dipeda iya bebali nyadi ular, mina sida tiga ke ngambi iya ngatur laya nya aja ke agi mengkang nyadi mensia.
Ku siku ari sida tiga, “Nyadi kami tu bunsu ular. Batu pending nya kena kami ular ninga jaku anak mensia ke bisi puni. Kami ulih ninga jaku anak mensia ke puni lalu bisi mega sekeda ke puni nya dipantuk kami”.
Megung nyau ngenung ninga jaku sida nya. Sida tiga lalu ngasuh iya mejamka mata anang engkebut. Enda lama iya mejamka mata, lalu enchelak sereta nemu diri bediri ba tengah laman rumah iya empu, alai iya ke terubah diasuh sida tiga nya pejam hari dulu.
Laban ke ngembuan batu pending nya Megung ulih ninga jaku semua utai, baka jaku empeliau, tau ninga randau bala sida tichak, jaku jelu bukai ke berandau enggau pangan diri.
Nyadi sekali Megung ninga manuk berandau ka pasal utai lama ke disimpan bala aki ini sida kelia. Manuk lalu terebai ngagai pulau babas mali. Megung tu nengkila ka manuk nya tadi. Dia iya meda manuk ngeranjai ba tanah. Lebuh manuk ngeranjai, dia peda iya pansut setawak, bebendai, tajau enggau macham utai bukai ke berega ari tanah dikeranjai manuk nya. Udah nya manuk lalu pulai ninggalka utai nya dia.
Meda bakanya, Megung lalu mansang ngambi setawak, ngambi bebendai, tajau enggau semua utai ke pansut ari tanah kair manuk nya tadi.
KAYA PENGUDAH BISI BATU PENDING
Nama agi deh, lalu kaya raja meh Megung seduai bini iya laban bisi rengka tengkira ke berega nya tadi. Seduai lantang bendar ati meda semua utai nya betugung ba bilik seduai.
Bala orang bukai ke meda nya, mayuh ngumbai seduai ngenchuri. Tang dini seduai bisi ngenchuri, laban semua nya endang utai diberi Petara ke sinu meda seduai balat merinsa, balat seranta.
Tegal seduai nadai jai, nadai beduan orang, Megung seduai Sindung dikesinu Petara, lalu udah nya lantang diau bepegai ba adat, ba tungkat, lurus nguan menua.
Ari ensera Megung tu meh kitai Iban bulih jaku munyi tu: “Baka ke bisi batu pending, lansik ninga”.