MICHAEL TIANG
SIBU: Enti orang ke meli rumah ngasaika diri bisi isu bekaul enggau Sempekat Nyual Meli (SPA), sida diasuh ngagai kompelin ngagai Tribunal Klaim Orang Meli Rumah Sarawak (TTPRS).
Sapit Menteri Pengerai Sivil, Pengawa Berumah enggau Perintah Pelilih Menua II Michael Tiang madahka, nya dikena nentuka hak sida ke meli rumah deka dilindung.
Ku Tiang, iya ke selalu nya luyar ngarika kedua-dua orang ke meli enggau pemaju ba pengawa ngatur SPA.
“Lebuh orang ke meli napi penanggul baka rumah rusak tauka beserekang enggau SPA, sida (orang meli) ditangkan ngambika enda ngaga kompelin terus ngagai tribunal tang patut berunding enggau pemaju.
“Ketegal gaya ke baka nya ngasuh klaim sida lebih ari timpuh iya ke patut,” ku iya lebuh meri penerang kena Hari Satu ke udah.
Tiang ti mega Kaban Kunsil Nengeri (ADUN) Pelawan madahka, timpuh klaim ke digaga ba tribunal enda laun ari 18 bulan berengkah ari maya Permit Ngemedar Diau (OP) pansut tauka sebedau timpuh liabiliti pengerusak abis baka ke disebut dalam SPA.
Ketegal nya Tiang ngarapka lebih mayuh agi orang meli rumah nemu senentang TTPRS dikena nentuka hak sida iya dilindung.
Ku iya, tribunal nya udah berengkah dikena 1 Mei 2010 dikena nyediaka alternatif mutarka penyarut meli rumah kelimpah ari kourt.
“Iya deka mendingka sereta ngatur klaim orang ke meli rumah baka ‘Liquidated Ascertained Damages’ (LAD), pengawa enda manah enggau enda puas ati senentang spesifikasyen baka ke bisi disebut dalam SPA.
“Semua klaim ke difailk enda lebih ari RM150,000,” ku iya.
Tiang mega madahka, berengkah ari tiga taun ke udah tribunal nya udah mutarka nyau deka manggai ba 300 kes ba serata Sarawak.
“Klaim ulih difail ngagai tribunal ngena sistem online homeapps.sarawak.gov.my.
“Fi penyampu RM50 deka dibayar ngagai genap pegawa ngaga klaim. Opis tribunal ulih ditanya ngena lumur 082-312507/312517 tauka e-mel ttprs@sarawak.gov.my tauka ngena laman web ba mphlg.sarawak.gov.my.
“Maya mendingka kes nya, sida ke ngaga klaim meseti datai sereta enda dikemendarka ngena pengari nyengkaum pemaju ba Kourt Tribunal,” ku iya.