SIMANGGANG: Organisasyen Ukai Dikuasa Perintah (NGO) enggau mayuh bengkah gerempung ba endur tu diperansang ngambika aktif ngatur aktiviti pengelantang pendiau ba kandang Sri Aman.
Penulung Menteri Pelajar, Inovasyen enggau Pemensang Pengelandik, Datuk Francis Harden Hollis madahka, pengawa ke baka nya sigi endang patut amat diatur dikena meransang raban oragnisasyen mantu pangan diri.
“Bala sida iya sigi endang diperansang nyereta sebarang pengawa pengelantang pendiau dikena mantu mensia mayuh ke dituntung penusah baka penusah angus, tanah tusur enggau iya ke bukai.
“Sida ke seranta mega patut diperati sereta ngena Organisasyen Ngemanahka Ulah (PMA) Chee Chuan Khor Simanggang nyadika chunto laban seruran ngatur aktiviti pengelantang pendiau ba Sri Aman,” ku iya.
Harden mansutka jaku munyi nya maya pengerami bejadi Program Segupong Kasih ba rumah PMA Chee Chuan Khor Simanggang di Sri Aman empai lama ke udah.
Kelimpah ari nya iya ti mega Kaban Kunsil Nengeri (ADUN) Simanggang nangkan Tuai Mensia Mayuh enggau Tuai Raban Bansa (KMKK) ba kandang menua nya ngambika seruran mantu pengelantang pendiau mensia mayuh ba kandang menua ke dijaga diri empu.
Ku iya, sida patut mantu nembiak redak ke dijaga sida empu nyaup minta bantu pengelantang pendiau ari ijinsi perintah ke besangkut paut enti nyema bala sida nya bedau ngaga pengawa ke baka nya.
“Nya siti ari tanggungpengawa KMKK ba pengawa manatu sebarang orang ke dijaga sida maya dituntung penusah.
“Nya kebuah, anang nejuka orang ke dipegai diri empu maya dituntung penusah sereta patut mantu sida ngulihka bantu ari Opis Pengelantang Pendiau,” ku iya.
Bisi 150 bengkah ruang bilik ke udah dipilih nerima bantu bakul pemakai beserimbai enggau Program Segupong Kasih nya.