pengawa numbuhka Suruhanjaya Perkhidmatan Awam Negeri Sarawak (SPANS) ba Dewan Santapan,Dewan Undangan Negeri (DUN), kena Hari Dua ke udah.
KUCHING: Perintah Nengeri setuju meri agih ngagai opis baru Suruhanjaya Perkhidmatan Awam Negeri Sarawak (SPANS) ba Ringkat 16 enggau 17 Bangunan Hikmah Exchange.
Kepala Menteri Datuk Patinggi Tan Sri Abang Johari Tun Openg madahka, Bangunan Hikmah Exchange dipelabaka tembu maya suku ketiga taun nyin ila.
“Beserimbai enggau pengerami tu, aku ngasaika diri temegah deka madah laban Perintah Nengeri udah setuju nyediaka agih Opis Baru SPANS ba Ringkat 16 enggau 17 Bangunan Hikmah Exchange ke dipelabaka tembu maya suku ketiga taun nyin ila,” ku iya.
Iya mansutka jaku munyi nya maya bejadi Pengerami Nyambut Ulang Tahun Ke-60 (Jubli Intan) pengawa numbuhka Suruhanjaya Perkhidmatan Awam Negeri Sarawak (SPANS) ba Dewan Santapan, Dewan Undangan Negeri (DUN), kena Hari Dua ke udah.
Ku Abang Johari, perintah ke dipegai iya sigi enda mejal servis sivil ba nengeri tu sereta deka ngatur pengawa chara profesional.
“Perintah ke dipegai aku sigi enda mejal orang gawa perintah ba nengeri tu. Kami patut ngatur pengawa chara profesional lalu nya kriteria ngambika kitai bisi servis sivil bekualiti,” ku iya.
Iya mega madahka, pengawa milih meseti nitihka kriteria profesionalism dikena milih mensia mayuh nyereta servis sivil.
“Servis sivil nya injin ngagai perintah lalu nya kebuah servis sivil kebih agi SPANS mega patut nemu ngatur diri nitihka chara jemah ila baka ke deka dipeda perintah.
“Enti ngena jaku bukai, kitai mega meseti bisi orang gawa perintah bisi vision ke ulih mantu perintah. Udah tentu perintah bisi vision tang pengawa ngatur beguna amat dikena ngasuh objektif kami (perintah) nyadi nyata,” ku iya.
Ketegal nya, beguna amat ngagai servis sivil nengeri bisi akses ngagai Strategi Pemansang Pengudah Covid-19 (PCDS) 2030 dikena ngemudahka chara narit pengawa nanam modal ngagai nengeri tu.
“Nya deka nyungkak enggau negapka ekonomi sereta muka peluang pengawa. Reti nya, orang gawa perintah patut nyingkang ke mua sebaka enggau sektor swasta tauka konglomerat besai ke diatur sereta ukai baka ke sebedau tu,” ku iya.