RENUNG PEMERINDANG JEMAN DULU SUBA

Kelimpah ari timang jalung, main asal benyawa kitai Iban ke endang sigi nyadi buah ati aku ari agi mit kelia nadai lebih ari renung, kelebih agi renung semain. Iya mega sebengkah main asal ke dikelandikka mensia mayuh, biak enggau tuai.

Nya alai enti radio bisi nabur program berenung ari kelia-lia, tudah pangan endang enda kala enda jenuh ninga. Kebuah pia, laban dalam taun 1960an kelia, nadai tentu pemerindang enggau pengerindang bukai di rumah panjai tauka di langkau umai. Seninjik endar ga kami bisi radio rambau nya kelia.

Keba maya nya, enti disebutka orang nama lemambang Segaya anak Geraik, Bidin anak Sanggu, Jelemin anak Jantan, Saban anak Imong, Ngelai anak Laa, Lindong (apai Dr Lambat seduai Luya Chambai), Jamit enggau bala bukai, nadai enda beguai jenuh empa pengerindu ninga sida nya berenung.

PATAH LEKA RENUNG CHUKUP MANAH

Seiku orang pinchin gawa perintah lebuh berandau enggau penulis apin lama madah: “Kebuah ke rindu nya, laban pemanah patah nyawa enggau leka renung ke chukup manah kena ngubat ati telih tauka beraie, lalu mega nyayat ati sekeda orang lalu pia mega manah ka pemerindang ba rumah panjai, ke bisi ngasuh baka sekeda teganga empa penyinuk ninga sada nyawa enggau pesan dalam leka renung lemambang”.

Ku orang tuai tu (enda ngasuh nama iya ditulis) nambah, leka renung tu chukup manah laban tau ngasuh ati orang gagit tauka pait maya sida bambai enggau pangan diri tauka dalam pengerindu.

Ba genturung menua Krian tengah endang bisi lemambang renung ke udah suah taung-taung bekunsi nyawa seduai enggau bala peninga radio, iya niang Apai Badey tauka Saban anak Imong enggau Jelemin anak Jantan tauka Apai Jandek ke sama bisi rekoding ba RTM enggau Apai Badey. Seiku agi lemambang renung manah nyawa tang nadai rekoding nya niang Mambang ari Kawit ke lalu nyadi bujang telajak sampai parai.

Niang Jimmy Donald ti kala nyadi MP suba enggai ga aku bula madah iya lemambang renung, laban enda kala ninga iya berenung taja pan bisi nulis bup Renong Semain. Tang anang kitai tekenyit nyangka iya nemu benyawa, laban leka renung iya udah ditusun dalam bup.

RENUNG INDU PULAI MANDI

Sekeda ari leka renung dalam bup nya munyi ke entudi tu lagi, iya nya genteran nyebut pasal indu pulai mandi. Bakatu ku sebut iya:

Oh…oh…oh..wie….wie….o…o….o…o

“Kejangka ari nya lalu manggai

Di paya madang jinggau,

Sida teruna  dara begau

Meda indai jelu tekura,

Ke mentepa ngema kerubung,

Pandai mengkepai.

Kejangka ari nya baru manggai

Di kebun lada, enggi sida iya empu

Buah manah lebat bunga panjai merundai.

Kejangka ari nya baru manggai

Di pendai, tumbuh batang perin daji,

Dan nyung patah nyelenti ka penekat ai

Ke beranti nengah kaki ulai,

Dia jali sida teruna dara tinggi

Nyau enda tepandi ka diri

Laban beguai niki

Ngagai leladi rumah panjai.

Tak lalu titi dara mereti

Deh sentali arung jalai.

Ukai enda jalai pendai

Enggi sida teruna dara tinggi

Kelingi keri tebu mikai.

Kejangka ari nya baru manggai

Di menalan radak, lunyau luchak,

Sungkur anak babi ngelampai.

Udah nya lalu tunjan dara ganggam

Tangga papan,

Lis ketam ke nyeruran bedabung landai.

Udah nya baru titi dara mereti

Deh sentali rumah panjai,

Datai jayah dara bungah di tengah rumah

Lalu malik nyeling sida teruna

Dara kering enggau buling mata mampai.

Dia iya tepeda ka sida pebayu

Sulu iching, duduk nyerimbing

Ngadu ka buling piat setagai.

Tak sama tuchum sida gelai aya dom

Enggau teruna dara pantun

Nelenga ka pun dabung landai.

Udah nya lalu tuju dara nemu

Deh bedaru pintu bandir mikai,

Udah nya lalu silak tukang

Sida lengayun endun kumang

Bedaru pintu bandir tapang

Lis ketam balan tukang,

Kanchin belambang besi bilai.

Udah nya baru terengkah di penaik bilik

Besai ke begamal gilik-gilik

Baka tasik Nanga Berunai; udah nya

Baru lambu sida teruna dara tuyu,

Lalu ngelengka ka labu kendi besai;

Jari sepiak enggi sida teruna dara biak

Lalu matak butul minyak jayau pengumbai;

Peda tak gurak-gurak

Ngampuhka cherindak puchung ngerembai.”

Dia kitai udah meda pemanah leka renung indu ke pulai mandi berengkah ari iya ke mansa paya madang jinggau ke alai iya meda tekura, lalu udah nya datai ba menua ke tinggi agi alai iya  mansa kebun lada sida empu ke benung bebuah lebat.

Nadai utai ngemanahka leka kelulu enggau bunga jaku ke dikena lembambang renung. Nya meh kebuah alai leka renung tu balat endar dikerindu bala mensia mayuh.

DITUJU NGAGAI ORANG KE PATUT

Renung semain endang kena merindang, taja pan iya tau mega ngasuh ati orang ke  ninga nya beba sereta telih, enti nyema orang ke ninga nya bisi kena rindas sereta kait leka renung nya tegal ulah enggau pengawa sida, sereta mega utai ti udah nyadi ba sida.

Leka renung mega semampai ngena jaku alus lalu enda sigi ditaga kena mesan ngagai orang ke bisi sangkut paut dalam iching leka renung nya, kelebih agi baka sida ke bujang enggau dara, laban  bala raban sida nya ke balat agi kena sebut dalam leka renung, kelebih agi renung pasal indu enggau lelaki ke bambai enggau pangan diri, tauka orang melaki bisi ke udah udah pechah belah ruang bilik lalu diau nyendiri enda begulai enggau pangan diri.

Uji kita betatika leka renung ngenang indu ke serabana nadai digayap lelaki munyi tu:

“Seraya ka jawang kena merindang lempuang

Kandang dalam enggai aku setaun tu

Udah manggum di pun padi rutan

Tu ke udah beraie runtuh berendam;

Sekumbang jawang sida melanyi dom bujang

Tu ke udah belapang nadai ngundang aku

Ke di simbang papan diban;

Sekumbang sida bujang bula

Tu lama udah nadai ngama aku

Enggau tapa jari ngenggam.

Nya alai ati kami deh wai nangi

Nyau beraie runtuh berendam.

Nya alai aku deka nanya

Ka sida ari jelua aya akan

Nyangka iya bisi ngetu enda lama

Inggap ba nuan.

Nya alai alau au meh wai angau

Ke mentipu lebu ngidan,

Tak lama jawing sida melanyi dom bujang

Ke udah belapang nadai ngundang kami

Di simbang papan dibalan.

Lama randa deh sida jenawang bujang bula

Nadai kala datai ngama kami

Enggau tapa jari kanan.

Nya alai aku nanya ka iya nyangka iya

Bisi ngetu enda lama ba nuan.

Nya alai nadai, ranggai

Ke serimbai lebu repan.

Nya alai enti bansa tu

Dini enda sida ngelengka,

Sida jenawang bujang bula

Baka ke myai terinsai gari raga,

Dileka ka dia tukung ditikam;

Baka ke ngengkahka umbang buah

Engkah ka ba tisi jalai.

Nya tak bula mabu meh

Sida jenawang bujang tuyu

Baka gentung kulit pudu sarung seku

Tunang Abu Buyu nyagam;

Bula nerajang meh sida melanyi dom bujang

Baka sangkar gitang pengandang

Tugang manuk jelayan;

Tak bula begah meh

Sida melanyi bujang bungah

Ngelah ka tingkah jadi emperan;

Tak bula udu bujang nemu

Mambarka gerugu batu bagam;

Nya alai tak balat bula meh

Sida pesina lama sulu pesedan.

Nya alai ngirup pan aku enda masuk,

Ngirup  asai ke ngirup tubai rabut

Ke tumbuh di julut muting emperan;

Nya alai makai aku nyau enggai

Asai ke tepakai ka rau rangkai

Pandang kerekai panas sebulan.

Nya alai tinduk aku nyau enda masuk

Asai ke empeleman abuk padi rutan;

Nya alai enti bansa tu,

Agi ga tak lemai pagila asai tu,

Enti lemai lusa asai tu ga ati,

Dini enda sekut jalai pengidup,

Ke mesai lumut aping emperan;

Dini enda senang jalai rindang

Ke mesai tibang padi simpan.”

Apu endang chukup manah leka nya. Dini enda tekait ati sida dara mit, ke lama nadai kena kepit bujang renyuan, dini enda chechaik sida dara bajik ke lama  nadai betichik enggau sulu ati perembam dalam. Dini enda tetenguk ati sida dara gauk ke lama udah nadai berimbai duduk enggau sida lelaki bejuluk jantan, dini enda beraie sida dara mereti ke jarang betemu enggau ambai sulu buah ati ke megai danji deka jadi nyadi melaki bini sampai midang mansang ke Mandai mati betemu enggau sida niang tangkai mengadi indai menimang.

Oleh TELESA EMPERAN