kpt-bp-170712-jl-SMK Selirik by James Ling KAPIT: SMK Selirik here has successfully organized a Special Motivation Camp for all its SPM (Sijil Pelajaraan Malaysia) and STPM (Sijil Pelajaraan Tinggi Malaysia) students who were to sit for the public examinations at the end of the year. Similar motivation camp was also held earlier for the benefit of the SRP (Sijil Rendah Sekolah) students of the school. The camp held at the school hall was organized by the school counseling unit with the objective to prepare the students to be ready for the public examinations in SPM and STPM, to build self-confidence and motivation and to explore their potential. Among the activities were group ice-breaking, discussion how best to do revision, motivation talk, mock examinations of past years papers, mini-sports and social gathering. Earlier in June, the outdoor camping was held for all its uniformed bodies at the school compound to build the sense of loyalty and self-respect among one another. Picture Kpt-bp-170712-jl-SMK Selirik A group album of the SMK Seliriks SPM and STPM students attending the Special Motivation Camp held at the school hall organized by the school counseling unit.
BALA orang dulu suba ke mujur bulih degree enggau latih nyadi pengajar enda ibuh nganti lama, sepengudah sida abis peresa ba universiti sida. Kadang-kadang bala ke datai ari menua Sabah enggau Sarawak, enda ibuh nganti udah abis pelajar ba universiti, sida udah nerima surat ari opis pelajar menua madah sida udah dianjung ngagai siti-siti sekula menua nya.
Ambika banding, kaban penulis siku ke graduate dalam 1979 menya, endang agi apin ngambi peresa tang udah nerima surat minta iya ngajar ba sebuah sekula sekonderi di Sarawak ba ujung taun 1978.
Tang laban Universiti Sains Malaysia di Pulau Pinang mina tembu peresa bulan Mac, 1978, iya enda nyadi ngajar ba alai iya ke diberi keterubah iya menya. Kebuah pia laban mayuh alai ngajar sereta mega laban rebak bala sida disikap enggau penemu sereta latih, kelebih agi landik jaku ribai, iya nya jaku English.
Nyadi rambau nya kelia, bala graduate ke udah abis latih dalam pengawa ngajar, iya nya sida ke bulih degree tauka diploma dikena nyadi pengajar sigi diambi perintah ngajar ngagai sekula perintah sepengabis degree tauka diploma sida, lebih agi enti sida ngena scholarship tauka duit injau ari perintah.
JAKU ENGLISH BEGUNA AMAT
Taja pia, bisi mega berita ari TV enggau surat berita madah mayuh bala graduate di menua Malaysia, lebih agi di Semenanjung, ke udah bulih degree nyadi pengajar, lalu bedau bisi endur ngajar. Ka tambah tu, tebal agi bala sida nya belajar ngena duit injau ari perintah, Pinjaman Tabung Pendidikan Tinggi Negara (PTPTN) enggau duit injau bukai ari perintah tauka ari bank.
Nyadi udah bekau utai nya dipansut lalu dipejuraika bala pemerati pelajar sekula enggau pemerati politik, mayuh ga penemu udah dipansut tauka dibantai sekeda mensia pasal pekara nya.
Berindik ari tu opis menteri pelajar udah bisi mansutka sada penemu ngasuh bala sida ke udah belatih nyadi pengajar nya, ke ngembuan degree dalam sekeda subjek awakka nganjung peminta sida ngajar sekali agi. Manah ga nya, tang iya bedau ulih nentuka alai endur ngajar ungkup tiap iku sida ke udah bisi latih dalam pengawa ngajar.
Nya alai laban diatu udah bisi kelalu mayuh orang ke bisi pelajar universiti enggau diploma, pengawa nyau majak tusah digiga. Lebuh maya taun 1979 kelia, opis perintah enggau kompeni datai ngiga orang gawa ka sida, diatu opis dua bengkah nya nyau sekut alai bala tudah ke ngiga kereja. Ngambika banding, siti pengawa tauka siti alai gawa nyau datai beratus orang ke minta.
OPIS BEGUNAKA JAKU ENGLISH
Nyadi siti penanggul kebuah alai agi kelalu mayuh nembiak ti udah bulih degree tauka diploma lalu apin bulih pengawa nya ketegal sida nadai pemandai tauka pengelandik enggau penemu baka ke dilemeranka pinta opis alai bisi pengawa puang. Ngambika banding, opis nya minta nembiak ti bisi degree dalam Information Technology tang enda tau nadai pengelandik dalam jaku English enggau Melayu tauka Mandarin.
Nya alai beduduk ari nya, bala sida ke minta pengawa nya enda kala nadai pengurang baka enda ulih ngisi siti tauka dua iti ari peminta nya. Tang utai ti balat nyadi penanggul, kelebih agi ninggang bala nembiak Bumiputera nya pengurang ba penau ngena jaku English.
Kitai sama nemu pemesai guna jaku English tu, ukai mina nyadi jaku entarabansa enggau menua tang mega jaku Internet dikena orang bekomunikasyen enggau pangan diri sedunya tu. Bisi orang ngumbai iya jaku global, jaku Internet, jaku entarabansa enggau jaku lumur dua pemadu mayuh orang ngena di dunya entudi Mandarin, taja pan mayuh orang enda nemu Mandarin nya jaku pemadu besai kerembai kena iya di dunya.
ENGGAI BELAJAR JAKU ENGLISH
Jarang kitai enda nemu cherita pasal bala nembiak kitai Iban ti balat kurang dalam jaku English. Di Kanowit, Kapit, Julau, Betong, Sri Aman, Saratok enggau mayuh bengkah pelilih menua bukai di serata Sarawak, bala pengajar enggau kepala pengajar sereta pemesai opis pelajar ke kala enggau berandau bela madah nembiak Iban enggau bansa bukai ti belajar ba sekula sekonderi pesisir kandang menua nya, sigi sebaka ulah tauka runding, iya nya enda tentu gagit deka belajar tauka nguji bejaku ngena jaku English.
Baka di Kanowit kelia ba sebuah sekula sekonderi seberai pasar – diatu sekula nya datai jalai alun ari Jalai Nibong/Tada – dalam taun 1983 kelia, iya nya agi rambau nembiak belajar jaku English ngena syllabus MCE, tebal agi nembiak ke semadi enda tau enda, alai sida ngambi matapelajar English Language laban enti sida sida enda ulih diberi setipikit.
Tang sapa ke rugi? Ukai pengajar ti rugi tang nembiak sekula empu. Nya alai enti ninga diri sama diri ke bisi nguji ngena jaku nya seleka dua, lalu kumbai lawa, kumbai sumbung. Bepun ari penemu ke madah pangan lawa enggau sumbung nya meh anak kitai Iban lalu rugi sampai diatu, kelebih agi bala ke datai ari menua ulu tauka menua pesisir.
Lalu tu ukai penanggul Kanowit, penanggul Julau, penanggul Saratok tauka kandang menua bukai di Sarawak, tang tu sigi penanggul besai ti agi apin ulih diputarka ba semua sekula, kelebih agi sekula pesisir. Tang kitai ngarapka enggau sistem alai matapelajar baka Sains enggau Matematik ti diajar ngena jaku English ba menua Sarawak tu, semua nembiak kitai bansa bisi udah ngubah mimit runding lalu lebih positif deka nerima lalu nguji ngena jaku English besari-sari.
ENDA NGEMERANKA JAKU ENGLISH
Aku enda ngutuk bala nembiak tauka pengajar, kelebih agi nembiak enggau pengajar bansa kitai ti tinggal laban bansa orang dalam penemu ngena bejaku English. Tu bepun ari sistem sekula ti kurang ngemeranka penemu ngena jaku English lalu ngemunka nembiak sekula di Sarawak – enggau di menua bukai dalam Malaysia – lalu kurang bepenemu tauka peneleba ngena jaku ribai nya.
Nyadi pengurang ba jaku nya sigi udah nyadi pengempang enggau penagang sida jampat bulih pengawa, tauka pemaju dalam pengawa. Kebuah pia, menua kitai agi balat bendar begunaka orang ti bepenemu dalam jaku nya ukai mina dikena nembuka pengawa sida tang iya ti besai agi guna nya kena ngepunka pengawa sida.
Ngambika banding, dalam dunya IT, enti kurang dalam jaku English, nuan deka tinggal singkang dalam era global. Nyadi reti iya nuan tusah deka ngepunka pengawa enti nuan bisi pengurang ba jaku nya, tauka pemandai IT.
KUS JAKU ENGLISH
Nya alai bepun ari penanggul tu menua Malaysia, ngena Opis Menteri Pengerembai Penemu Mensia udah bisi ngatur Kus Jaku English kena ngulihka Setipikit Jaku English (English Language Certificate) ti dipansutka opis menteri nya berengkah ari taun 2002 suba. Tang di menua Sarawak berengkah ari taun 2003 kus ke bak tu semina bisi disedika ba sekeda kolej di Kuching, Sibu enggau Miri aja.
Siti ari kolej ti bisi nyediaka kus enam bulan nya, baruh Skim Latihan Graduat (SLG) nya Akademi ITC, King’s Centre, Jalai Tun Jugah. Dalam taun 2003 suba, AITC bisi ngatur dua iti kelas SLG nya ti ngambi bisi 40 iku graduate enggau nyereta kus nya. Taja pia, mina bisi 30 iku sida ti ngabiska kus enam bulan nya, laban ba tengan kus nya, sekeda ari sida nya bisi bulih kereja.
Nyadi dudi tu tadi, iya nya dalam taun 2005 raban kedua SLG datai nyereta kus enam bulan baru ba AITC di King’s Centre, ditu. Sekali tu bisi 36 iku sida nya ke dibagi ngagai dua raban, lalu diajar ulih dua iku pengajar ti udah teleba ngajar jaku English. Seduai tu meh mega ngajar raban ke nyereta kus baka nya ba taun 2003 suba.
JAKU ENGLISH ULIH MANTU
Bala nembiak ti ngambi kus nya tebal agi udah bulih degree ba universiti menua kitai ditu empu, lalu bisi pengurang dalam jaku orang putih nya. Bala sida nya datai ari institusi pelajar tinggi menua kitai tu baka Unimas, Unitar, UPM, USM, UM, UiTM, Swinburne, Chermai Jaya College enggau sekeda kolej enggau universiti bukai menua kitai ditu. Abis kurang utai ulih tudah nya Diploma tang kurang dalam jaku ribai.
Nya alai sida kenanas deka ngambi kus enam bulan nya lalu ngichaka diri bisi nambah penemu mimit dalam jaku global enggau jaku Internet nya.
Chukup sinu ninga bala graduate ari pupu raban bansa ke kapa-kapa nyagam tunga enggau reti jaku English ke mudah. Mayuh sida nya enda nemu ngena ayat pandak ngena jaku ribai nya. Tang kus enam bulan nya bisi ga mantu mimit. Siku ari indu Iban ke ngambi kus nya diatu gawa ba Putrajaya din. Gaga amat iya, selalu email ngagai pensarah iya suba. Bisi endar asil belajar jaku ribai.
Siti agi lalau, anang enda pratis bejaku lalu bulih penemu ari mayuh macha bup. Anang tekenyit ninga siku indu kitai Iban ke ngajar English Language ngagai nembiak Pom Dua ba siti sekula ulu, baru belabuh macha bup ari Enid Blyton. Enid Blyton udah abis bacha bala nembiak taun 1966 ba sekula primari kelia. Anang ka Enid Blyton, apin nembu pelajar Sarawak Junior bala kaban penulis bisi udah ngabiska semua bup bacha tulis William Shakepear (simplified versions) baka sida Julius Caesar, Macbeth, Midsummer’s Night Dream, King Lear, Tempest, Romeo and Juliet, Much Ado About Nothing enggau mayuh agi. Nya alai pengujung iya bala raban ke dulu, taja pan sekula ba menua ulu sigi enda rarat baka tekuyung lebuh betangkup enggau orang ba nengeri. Siti senjata ti bisa nya penemu bejaku ngena jaku ribai.
Nya alai nadai kebuah bala nembiak kitai Iban diatu tau rarat ba nengeri tu enti bisi senyata ke bakanya. Aku ngarapka utai tulis aku tu tau nyadika peransang nembiak kemaya hari tu ngichaka sida anang enda naka ulih ngansak diri belajar sereta bejaku ngena jaku ribai dikena ngangkatka diri sereta enda rarat diau di nengeri, ba pengawa enggau ba pengidup rama.