KUCHING: Natural Products Research & Development Centre (NPRDC) Pampang Sarawak udah ngena inisiatif bekerejsama enggau CRAUN Research Centre ngatur Cultural Tissue Strengthening Course (CTSC) enggau Polymerase Chain Reaction Analysis (PCR) berengkah ari 5 ngagai 6 Ogos ke udah.
Woksyop pengelama dua hari nya diatur ba Molecular Laboratory and Culture Tissue Laboratory ke duluka Dr Bala anak Jamel ti mega Tuai Opis Upstream Technology sereta dibantu dua iku pemesai pemasik CRAUN, Evra Raunie Ibrahim enggau Shamsyah Hamid.
Tuju ngatur kus ke disereta 10 iku staf akademik enggau staf bukai UiTM Pampang Sarawak nya dikena nempa staf ke kompeten ngatur pengawa ba laboratori bioteknologi enggau molekular utai tumbuh kelimpah ari meri penemu ngagai bala staf nyengkaum lecturer senentang prosedur operasyen standard (SOP) ba pengawa bekaul enggau bioteknologi, molekular utai tumbuh sereta ngasilka herba.
Program ke diatur pengelama dua hari nya meri fokus ngagai chara ngatur pengawa ba laboratori molekular utai tumbuh berengkah ari nyediaka sampel nyentukka ngagai analisis data PCR ke udah digaga ba Laboratori Molekular Craun Research Centre nyengkaum chara ngatur pengawa enggau nyediaka laboratori tisu kultur berengkah ari milih ‘parent plant’ ke patut nyentukka ngagai pengawa mindah ngagai ladang.
UiTM Pampang Sarawak ngarapka mayuh bengkah kus ke baka nya ulih nambahka pemanah pengawa ngajar enggau mansik bekaul enggau tisu kultur nyengkaum molekular ke ulih ngangkatka UiTM Pampang Sarawak nyadi siti pakar endur betanya bekaul enggau pengawa ke bisi besangkut paut.