NYADI producer album nya pengawa ti chukup enchabar. Kelimpah ari netap, nyaga kualiti
enggau standard penanyi, muzik, lirik, kulit album enggau klip video, producer mega betapi enggau bajet / modal ti besai.
Enti ati agi kakang tauka pengerindu alang-alang, tau anang guai dulu nyadi producer album. Kebuah pia laban producer mesti sanggup bekikis bulu betis nyendiaka duit enggau nanggung semua utai ke besangkut-paut enggau penembu album nya.
PRODUCER ALBUM SEMINA KABAN
Randhi Enrique madahka penatai diri ari Bintulu tang diatu diau di Kuala Lumpur laban nitihka periuk asi diri. Lama udah rinduka pengawa belagu, Randhi mega nyimpan juluk ati nyadi producer album baka orang bukai. Taja ngasaika diri agi mayuh pengurang, Randhi madahka semua penanggul nya ulih teputar laban iya mayuh bekelala enggau komposer muzik, lirik
nyengkaum bala penanyi.
Ditanya nama kebuah iya mutus ati ngeluarka bajet ti besai ba album tu, Randhi madah nya
bepun ari pengerindu.
” Ngeluarka album baka nikam tikit kuda; bedau temu untung enggau rugi. Pemujur penanyi enggau album bepanggai ba nasit. Producer mega enda nemu nasit diri. Enti nadai pengerindu ti dalam sigi tusah nyadi producer laban enti salah gaya tau ngasuh rugi sereta
pulai ke penesal diri empu. Ba aku, aku sigi udah besediaka napi semua utai nya,” ku Randhi nyaut tanya keterubah ba randau kami sebuat.
Ba pekara milih penanyi Randhi chukup pechaya ba orang ti dipilih iya.
“Aku arapka Alexander enggau Intan ulih mintin kualiti enggau standard seduai iya. Ukai semina ba pengawa belagu tang kaul seduai iya enggau orang bukai ba industri. Aku pechaya seduai iya nemu mai diri. Ulah enggau perangai nentuka penyauh pejalai diri ba industri. Enti ulih, anang ngasuh “personal matters” nyadika penanggul ba maya seduai ti deka nyapai juluk diri,” ku Randhi sekali agi bekunsika penemu diri.
NGELANCHARKA ALBUM SEMINA KABAN
Pengawa ngelancharka album Semina Kaban udah mujur diatur kena 18 May 2018 ba Riverview Station BBQ & Grill. Pengawa nya dipenyadi Mr Cyrill, Sapit Chairman PERISAI.
Entara orang ke bisi datai maya nya suba nya Mr Gibbson Rentap enggau bala management KMP, Felix Watson, Aji Charlie enggau sekeda ke bukai. Malam nya mensia mayuh diperindang Alexander Peter seduai Intan Bayang enggau lagu baru ari album Semina Kaban. DJ Ivy Ubang ari Catsfm enggau Mathew Abu maga bisi datai.
Raban artis bukai ke sama bisi datai malam nya nyengkaum Dorsica Robert, Teelong Tee, Shila J, Charlene Johnny, Symond Kimbara enggau ke bukai ti enda ulih sebut ditu magang. Raban komposer baka Jesley Jabu Bajang, Allen Nyuntai, pelakun Bruce Walker, pengempu Manang Sports Brand Lascelles Manjah enggau raban media bisi mega datai nyukung pengawa nya.
LAGU ENGGAU KOMPOSER
Lapan iti lagu ba album Semina Kaban nya Semina Kaban, Taju Pengerindu, Aya Udu Bejegau, Nangi, Berasai Jauh, Ukai Ungkup Nuan, Semampai Udu Ngenang enggau Calon Menantu (versyen Melayu). Entara komposer ba album Semina Kaban tu nya Jesley Jabu, Mattheus Mambang Bajang, Wanddie Ibrahim enggau Lesrey Luyoh lalu semua muzik
digaga Cami Tan ari Ranyai Studio. Diatu album nya udah berengkah dijual ba kedai lalu tau mega diudar terus ari KMP, Alexander Peter Chelum enggau Intan Florence Bayang.
TERIMA KASIH
Ba ujung randau kami sebuat, Alexander Peter Chelum ke diatu gawa nyadi pengelicha Unimas enggau pengajar sekula anak mit Intan Florence Bayang arapka album Semina Kaban diterima peminat lagu Iban di serata Malaysia.
“Meri besai terima kasih ngagai producer Randhi Enrique, semua dj radio, komposer lagu enggau muzik, kami sebilik enggau semua bala pangan ti enda ulih sebut ditu magang. Meri terima kasih mega ngagai Intan Florence Bayang laban udah chukup “spotting” nyadi tawing duet aku. Terima kasih mega ngagai raban media enggau bala pangan artis enggau
facebook ke enda nemu leju nyukung kami duai ari ngelamatu ti udah. Beli VCD ke original aja, au,” ku Alexander Peter ngujungka randau kami sebuat.
DIKARANG MR TUBAI PENGERINDU