KUCHING: Bisi 593 iku orang tuai ari raban keterubah nerima Kenyalang Gold Card ari Parti Rakyat Bersatu Sarawak (SUPP) Pampang Kuching.
Penulung Sapit Chairman SUPP Pampang Kuching Bong Lian Huan madahka, Kenyalang Gold Card ke diberi Perintah Sarawak dikena orang tuai ke beumur lebih ari 60 taun ngasuh sida iya diberi diskaun spesial ba supermarket, servis ke bisi disediaka ngagai mensia mayuh, pemakai bepengerai, katering, berubat, klinik enggau farmasi enggau ti bukai.
Iya mega madahka, ngena data ke udah digumpul ba maya ke diatu lebih ari 50 bengkah serikat nyadi bakih Kenyalang Gold Card.
“Perintah Sarawak deka bekerejasama enggau mayuh bengkah serikat ba nengeri tu,” ku iya lebuh bejaku bejadi Pengerami Nyuaka Kenyalang Gold Card ba Indu Opis SUPP Kuching kemari.
Kelimpah ari nya Bong mega madahka, dulu ari tu peminta ngempu Kenyalang Gold Card digaga ngena chara ngisi pom enti dibandingka enggau baka ke diatu ngena internet.
Ketegal nya Opis Pengelantang Sosial, Pemanah Kaul Komuniti, Indu, Ruang Bilik enggau Pemansang Nembiak Mit nyediaka laman web iya nya kenyalanggold.com ngambika peminta ngena komputer enggau telefon pintar ulih dianjung ngena laman web nya.
Iya mega madahka, enda lama agi pengudah Kenyalang Gold Card dilancharka ba bulan Februari, pampang nya deka numbuhka kaunter bejalai dikena mantu orang tuai minta Kenyalang Gold Card.
“Bisi 880 pom peminta udah diterima sereta diberi ngagai Opis Pengelantang Pendiau Mensia Mayuh laban deka diperesa dulu,” ku Bong.
Ku Bong, semua raban keterubah ke udah mujur bisi 593 iku nyengkaum 244 ari Palan Bedaja Song Kheng Hai, 253 ari Pasar Petanak sereta 96 iku ari SUPP Pampang Kuching.
“Sida iya mega ngelawa Carpenter, Lebuh India enggau Sekama neruska kaunter aplikasayen ‘Kenyalang Gold Card’ raban kedua lalu ba maya ke diatu bedau diberi sereta ngarapka sida iya besabar,” ku Bong.
Ku iya, enti nundaka prosedur nya enda berapa lama tang ketegal Gerah Ngaya Pejalai (PKP) timpuh meri Kenyalang Gold Card lebih lama agi dikena nyeliahka mayuh orang gempuru laban irauka pengelikun semua orang.
“Sehari tu kami mujur madahka sida ke nerima datai nyereta penegrami lalau ngagai sida ke bedau nerima sehari tu, kami deka madahka sida iya ngena telefon,” ku iya.
Iya mega madahka, sebarang sapa deka nemu lebih silik agi tau nanya ngagai lumor telefon 082-244633.
Oleh Cheryl Law