MIRI: Bisi 34 iku penyereta udah belajar Seni Kuntau Pukulan 7 ke diatur ba Kampung Tulang, Lutong ditu.
Pengudah belajar pengelama dua minggu sereta tembu kena Hari Lima ke udah, latih kuntau nya diatur Persatuan Seni Kuntau Pukulan 7 Miri.
Kuntau ukai semina siti ari chara dikena ngetanka diri tang mega ulih dikena nitihka chara pengidup bepengerai sereta ngasuh seiku orang bisi displin.
Semua penyereta udah nerima setipikit nyereta ke disuaka Menteri Pengangkut Datuk Lee Kim Shin maya pengerami nutup latih nya.
Lebuh bejaku maya pengerami nya Lee nangkan bala penyereta ngambika seruran nyaga pengerai enggau pengelikun diri empu lebih agi maya timpuh Atur Nyaga Pejalai Nyuman (PKPP).
“Titihka prosedur operasyen standard (SOP) baka ke udah ditetapka baka nentuka takah tauka penyauh fizikal, kena penutut mulut enggau idung sereta seruran masu jari,” ku iya.
Sama bisi enggau maya pengerami nya Chairman Persatuan Seni Kuntau Pukulan 7 Miri, Mathew Kunsoi.
Oleh Liong Chai Ling
