![](https://utusansarawak.com.my/wp-content/uploads/2020/12/9.-trs-067.jpg)
![](https://www.utusansarawak.com.my/wp-content/uploads/2020/12/9.-trs-067.jpg)
Tegal mayuh pengelebih meh kitai Iban terus diau betampung pendai. Nya meh kebuah nyentukka saritu, kitai bansa endang agi meruan angkunka rumah panjai.
Kitai endang nadai muai iya laban nya meh ke dikumbai batang pendiau kena ngempung kitai bansa kenyau ari kelia. Iya mega nyadi pengempung semua batang pengawa Iban.
Kelimpah ari tu, rumah panjai meh ke nyadi pun enggau panggau penempa adat asal Iban dalam pengawa bumai betupi, sereta mega semua pampang pengarap asal Iban dikena bumai, pengidup ngemerankan ruang bilik, pengidup enggau pengawa bukai ba rumah panjai, adat enggau atur pasal pengerai enggau semua utai bukai mega.
Nyadi ketegal tu genap iku orang ke nguan siti rumah panjai nya mesti kena serangkung atur penyerakup, nadai ngira tuai biak. Kaul diri menyanak, diri sebilik endang siti ari utai ke beguna. Kebuah pia laban tiap iku mensia ba rumah nya enda tau enda bebasaka pangan diri.
“Pia mega baka sida anembiak endang dilalau awak ka bebasa ka orang ke tuai agi, lebih agi apai indai, aki ini diri empu. Nya kebuah semua orang serumah menya endang mayuh agi bala diri sebilik. Sida kiruh amat ka pengidup pangan, senang tauka tusah. Enti senang, semua senang. Enti bisi penusah, semua sama besaup ngelempungka iya. Enti bisi bulih ngasu, bulih jelu, sigi diemparu sama enggau diri serumah, lalu pia mega enti bulih ikan bulih undang enggau pemakai bukai endang selalu bebagi enggau diri serumah, nadai kala diempa nengali,” ku Dato Musa Giri, 76, siku pemesai opis perintah ke lama udah pinchin ari pengawa.
Musa mantaika penemu nya lebuh ke berandau enggau penulis apin lama.
“Ka tambah nya, enti bisi buah baka engkeranji, sibau, kembayau, rian, pakan enggau buah ke bukai, bala orang ke bempu pun buah nya menya seruran ngemai bala sida serumah bukai niki, lalu bebagi sama bela,” ku Musa nampung jaku iya sereta madah kaul ti manah ba rumah panjai udah ngujungka pendiau likun sereta nadai bebelah bagi enggau pangan diri.
SERURAN BESAUP NGAGA PENGAWA
Kelimpah ti diau likun sereta begulai sejalai ba mayuh bengkah pengawa di rumah enggau di tanah, enti lebuh bisi penusah baka parai, sakit enggau penusah ti begunaka sukung enggau tulung orang bukai, ba rumah panjai bala diri serumah nya meh ti ulih alai minta bantu, ti tau meri tulung lebuh begunaka tubuh. Ambika banding, enti maya bisi orang sakit, bala diri serumah nya sigi sedia deka mantu nganjung orang nya ngagai sepital tauka klinik ngena entuka, ngena muto sepit tauka ngena perau. Sida sedia barang maya deka nyali perau lalu sama betulung ngayuh nganjung tudah ti sakit nya ke sepital tauka ke klinik berubat. Kemayatu, rumah panjai ti udah datai jalai, bala diri serumah endang semampai ke bisi entuka nadai kakang nganjung tudah ti begunaka tulung nya berubat ke sepital, ke klinik tauka ngagai orang ti nemu berubat. Lalu enti nyema agi begunaka jalai berubat lama baka belian, sida pan sigi nyanggup aja enti diasuh ngambi manang laban sida bisi perengka pengangkut baka entuka tauka mutosikal. Lalu bakanya mega enti dipinta bepadah ngagai kaban belayan ke jauh tang ulih datai entuka, sida pan sanggup mega bepadah. Tang enti nyema menua ti alai deka bepadah, betesau nya mina ulih endur datai bejalai kaki, bala diri serumah ke rumpas, ke regas endang sedia deka bejalai kaki madahka kaban belayan tegal diri serumah bisi sakit lalu mega deka madahka orang bukai awakka datai ngabas, engka nyawa tudah nyau udah datai ba pengujung iya.
ENDA KAKANG NYAUP PANGAN DIRI
Nyema bisi begawai sakit, bala diri serumah endang sama kiruh mantu orang empu pengawa lalu sama betulung nyendiaka semua rengka kena begawai nyengkaum meri bantu wang ringgit, bantu beras, tuai irup enggau barang pemakai ngagai orang ti empu pengawa nya. Ka tambah nya, bala diri serumah sama besaup nyendiaka rengka enggau semua utai kena ngintu gawai sakit nya. Ba pengawa berubat baka belian, tulung, saup enggau sukung ti sama mega endang tetap dikenataika diri serumah ngagai orang empu pengawa belian nya. Amat meh pengawa nya enggi orang sepintu bilik, tang orang empu ruai ari sepiak-sepiak endang sama nganchau tikai awakka mudah alai bala mayuh ti ngulu pengawa belian nya semalam-malam pengawa belian nya dipejalaika. Nya meh kebuah endang bisi utai pakai, bisi utai irup dipangkang bala mayuh awakka liat sereta tan ati lama ngulu pengawa nya. Kekadang bisi mega bala ti muka main bandat, main tui kena ngetanka bala mayuh ba dua tiga belah ruai alai orang belian nya.
Lalu bakanya mega enti maya bisi penusah parai, orang ke bepadah nya pan sama ngaga pengawa ke baka nya. Sida sedia bejalai bepadah ngagai rumah ke semak sereta nadai kakang ngena entuka, ngena perau kayuh tauka perau injin sepit kena bepadah rumah, bepadah kaban belayan orang empu penusah nya.
Lebuh nemu tudah nya ngapuska seput, bala diri serumah lalu berengkah sama kiruh meri bantu baka niri sapat, nyendiaka bangkai nya dibai ke ruai udah bekau diberi mandi sereta digari. Dulu menya sida lalu sama betulung beban ngaga entubung ngaga rarung. Tang diatu tebal agi entubung nya dibeli ari kedai China. Taja pia, genap rumah panjai endang bisi atur meri tulung belanja ngagai orang ti empu penusah, empu pengawa. Ukai mina ba pengawa rabat, tang ba atur gawai, atur melah pinang tauka pengerami bukai mega. Tu meh pengelebih rumah panjai.
Maya mutung – reti nya munuh jelu baka jani, chapi, kambin enggau manuk – kena ngintu pengawa rabat, bala diri serumah enggau orang ari rumah bukai ti datai ngesah endang ngereja pengawa sama besukung. Sida sama mantu nunu sereta netak dagin ungkup orang empu pengawa. Tang enti maya begawai tauka pengerami diintu sepemanjai rumah nya, dagin ti udah ditetak nya deka dibagi bela ungkup sepintu-sepintu bilik.
Hari mutung nya mega alai asi pulut tauka asi ja dilulun. Tang sebedau ngelulun, sida endang sama besaup ngambi buluh kena ngelulun. Reti nya ba semua pengawa endang sama betulung, sama besaup enggau pangan diri awakka lempung, awakka jampat. Tu mega kebuah kaul enggau pangan diri endang semampai disungkakka penguat enggau pengerapit iya.
Malam nyenggai tudah ti parai endang semampai mayuh orang datai, laban bala orang ari rumah panjai ti sama semakai enggau orang rumah bisi penusah nya endang bisi dipadah asuh datai sama begulu ba pengawa rabat nya. Senggai nya kena beserara enggau tudah ti parai laban pagi siti nya bangkai deka ditumbak. Nya alai orang ke begulu nya enda salah baka begawai tang taja sida rami, orang nadai betempik tauka betempap jari. Kebuah pia, laban nya pengawa rabat, pengawa ngintu penusah.
Nyadi lebuh nganjung antu, semua bala nembiak rumah panjai ti baru angkat bujang enggau sida ke tuai agi endang sama nulung ngangkat sereta lalu ngesan entubung ngundan bangkai tudah ke parai nya. Enti jalai nganjung nya nengah jalai besai, sida mina ngangkatka bangkai nya ngagai kerita besai ti ulih ngundan entubung. Tang enti nadai nengah jalai kerita, sida deka ngesan entubung terus ngagai pendam nengah jalai lama, jalai nengah babas. Datai di pendam, sida mega sama betulung numbak lubang ungkupka endur sempar tudah ke parai nya. Dia meh alai tudah diengkah, dikelaie kena nanda pengelama udah idup, maya parai.
Ke bendar atur tu sigi ngayanka diri serumah rumah panjai endang sama besaup, sama betulung ngereja utai maya tusah enggau maya lantang mega.
BEDURUK ENGGAU DIRI SERUMAH
Pengidup rumah panjai ari kelia nyentukka diatu endang bepanggai ba atur sama besukung, sama besaup, sama betulung. Semua atur gawa, turun enggau bumai, endang sama bela besaup ngambika jampat tembu tauka teputar. Orang menya gagit bendar deka beduruk enggau pangan diri laban rindu gawa bebala mayuh, sereta mega kena neguhka tanggam kaul enggau diri serumah. Pengawa deka lempung agi enti dikereja bala mayuh. Utai berat nyadi lempung, utai tusah nyadi mudah. Umai besai nyadi mit laban mayuh bala beduruk nebas, nebang, nunu, nugal, mantun, ngetau, mela sereta berangkut padi. Tu siti ari pemanah, pengelebih beduruk ti agi dikemeranka orang rumah panjai diatu.
Nya kebuah orang rumah panjai balat ngemeranka pemanah kaul sereta basa enggau pangan diri. Ari tu sida udah selalu diberi petara ke nyaga sida pengelikun sereta mega pengelantang begulai enggau pangan diri.
RUMAH PANJAI SEMAMPAI DIKESAYAU
Nya alai dataika seharitu rumah panjai endang nyadi palan ke dikesayau semua kitai Iban, lebih agi iya ke endang agi angkunka pendiau begulu baka ba rumah panjai ke mai mayuh penguntung ngagai semua.
Kitai mega ngasai, enti lebuh maya bisi pengerami, lebih agi Gawai Dayak ke diintu ninting taun, bala kitai Iban ari nengeri sigi gagit deka begawai ba rumah panjai, laban dia meh alai ti andal sereta angkun ati berami. Mayuh agi pengerami Gawai kitai ba nengeri nadai banding enggau Gawai ba rumah panjai, laban intu rumah panjai numbas ngemeranka pangkat, renggat umur enggau pemisi, tang dikira sebaka magang. Semua anembiak redak endang nemu sida mesti bebasa sereta sama besukungka tuai rumah ke nyadi pun semua pengawa ba rumah.
TUAI RUMAH NANGAM ADAT RUMAH PANJAI
Nyadi tuai rumah endang dikarapka ulih megai, nyaga sereta nanggam adat ba rumah panjai. Iya mega dikarapka ngadu laya enggau penyarut ke bisi nyadi antara nembiak iya. Ketegal tu tuai rumah enda tau enda sikar lalu nemu atur enggau adat. Iya endang orang ke ngatur laya, chara enggau utai bukai ngena jalai lurus. Nadai ulih baka ke bisi betiki pinang bisi betiki nibung.
Orang ke dichiri nyadi tuai rumah dulu menya endang orang ke nemu tusut sereta mega nemu pasal asal penatai enggau semua pengawa enggau atur bumai betupi. Kemayatu, rebak ke dudi agi tuai rumah ke nemu tusut udah nadai tentu agi. Taja pia, sida mayuh agi orang ke udah besekula, lalu bisi pemandai macha enggai nulis. Sekeda ari sida nya endang orang ke nemu pasal adat asal kitai Iban lalu mayuh mega tuai rumah diatu orang ke udah pinchin pengawa perintah tauka gawa kompeni nyengkaum siku dua ke bisi pemandai universiti, bisi ngembuan diploma, ngembuan degree.
Lebuh ke ngatur leman tauka penyarut, laya sida serumah, tuai rumah enda tau enda nemu tusun tunggu nitih adat Iban. Ba senentang tu iya tau ngulihka atur penyampau ukum tauka tunggu ari bup ke bisi disediaka opis pelilih menua.
Tusun tunggu tu tau besandingka atur dalam bup nya awakka sebaka. Kebuah pia, ba ai siti-siti enda sebaka. Di menua Krian enggau Saribas jauh bida enggau menua ai Batang Rajang tauka di Kemena enggau Baram.
Taja bebida tusun atur tunggu, pekara bukai ba rumah panjai nya sama magang. Semua jalai pengidup besari-sari, atur bebagi bela, atur beduruk, besaup sereta begempung enggau pangan diri dalam pengelantang, napi pemedis enggau penusah endang nadai bida enggau pangan. Nya meh nyadi pengelebih, nyadi pemanah pendiau ba rumah panjai ti ngejungka iya meruan, semampai dikesayau, alai datai, alai diau, alai idup, alai parai.
Oleh TELESA EMPERAN