SIBU: Semua kontraktor ke udah diberi tanggungjawap ngemujurka Program Pengawa Berumah Rakyat (PPR) di Sarawak diasuh nembuka rumah baka timpuh ke udah ditetapka, bekualiti sereta nitihka spesifikasyen.
Menteri Pengawa Berumah enggau Perintah Pelilih Menua (KPKT) Zuraida Kamaruddin madahka, perkara nya beguna amat laban enti nitihka riput audit mayuh amat isu ke enda nitihka kualiti pemansang baka ke udah ditetapka KPKT.
“Aku ngasuh semua kontraktor nitihka semua atur enggau spesifikasyen barang baka ke udah ditetapka KPKT.
“Perkara nya beguna amat laban pengudah sesyen parlimen ke udah, bisi riput audit nyebut mayuh bengkah projek pengawa berumah KPKT enda nitihka atur lalu iya ngasuh aku asa amat,” ku iya.
Iya mansutka jaku munyi nya maya aum media pengudah Pengerami Nasih Tanah Projek enggau Penemuai Ngagai Taba beserimbai enggau Program PPR Seduan, Sibujaya kena Hari Tiga ke udah.
Zuraida ngasuh semua organisasyen ke dipegai KPKT udah diberi tanggungpengawa meresa sereta meratika pemansang projek dibaruh menteri nya lebih terit agi.
Ku iya, PPR nya siti ari chara dikena perintah nentuka peminta rayat B40 ba sarawak bisi rumah kediri empu.
“Aku deke berunding enggau perintah nengeri numbuhka komiti ngatur sida ke ngempu rumah PPR enggau naka penyampat berengkah ari rumah nya diserahka.
“Nya dikena nyeliahka sebarang penanggaul ke tau nyadi ngagai semua rumah PPR. Enti komiti nya laun ditumbuhka baka ngena timpuh enam bulan tauka setaun, kandang endur ngaga rumah nya udah bisi mayuh bengkah penanggul,” ku iya.
Zuraida ngarapka perintah nenegri ngenyampatka pengawa ngisi rumah PPR ba timpuh enam bulan dikena nyelihka sebarang penanggul baka rusak.
“Enti ulih berengkah ari diatu meratika peminta rumah PPR laban pengudah tembu orang ke ngempu rumah terus diau ba rumah nya,” ku iya.
Bisi 461 buah rumah teres PPR seringkat ke udah disediaka enggau mayuh bengkah perengkaguna nyengkaum surau, tadika enggau taska deka digaga.
Pemujur projek nya ba maya ke diatu urung tujuh pesen sereta dipelabaka tembu maya bulan Oktober 2022.
