MANAH… Senator Susan Chemerai Anding, Subeng Mula enggau sida ke bukai mantaika tanda manah ngena tujuk indu jari maya Program Relak Begulai GPS ba Rumah Jemeni, Sungai Rumput Nyabor, Kabong, Saratok.
SARATOK: Rumah Jemeni, Sungai Rumput Nyabor, Kabong empai lama ke udah dipilih nyadi endur ngatur Program Relak Begulai Gabungan Parti Sarawak (GPS).
Batang tuju ngatur program nya dikena nerangka pelasar GPS ngagai rayat kelimpah ari ngerapitka kaul sida iya enggau Perintah Sarawak.
Program ke berengkah pukul 3.00 ngalih hari nya ngempuru bala raban parti politik, raban Kunsil Pelilih Saratok, bala Tuai Mensia Mayuh enggau Tuai Raban Bansa (KMKK) sereta raban Biro Indu ari rumah panjai ngelingi endur nya.
Pengawa ke bisi diatur maya program nya ngajat, ngirup ngalih hari, makai malam, betundi kujuk, sponsor lagu sada emas enggau tanda ke dipejadi Kaban Dewan Negara, Senator Susan Cheremai Anding.
Lebuh bejaku maya pengerami nya Susan ngasuh rayat Sarawak lebih agi ba Saratok patut begempung nyukung GPS dikena nyaga penegap politik dalam nengeri tu.
Ku iya, kelimpah ari begempung enggau iya ke pemadu beguna amat nya ulih mantu GPS maya napi Pengawa Bepilih Besai Ke-15 (PRU-15) ke dipelabaka deka diatur enda lama agi.
“Nya kebuah aku ngarapka rayat ulih begempung mantu GPS menang ba semua 31 kerusi Parlimen maya pengawa bepilih besai nya ila,” ku iya.
Maya program nya iya mega bekunsika chara enggau penguntung nyukung GPS sereta penyulut komponen parti nya maya Pengawa Bepilih Besai Nengeri Ke-12 (PRN-12) ba bulan Disember ke udah.
Sama bela bejaku maya program ke disereta urung 300 iku orang nya Kaban Kunsil Pemadu Tinggi Parti Demokratik Progresif (PDP) Subeng Mula, Sapit Tuai Indu PDP Kusilor Dr Florince Christy enggau Tuai Rumah Jemeni.