![](https://utusansarawak.com.my/wp-content/uploads/2020/07/TIONG-RAJANG-3.jpg)
![](https://www.utusansarawak.com.my/wp-content/uploads/2020/07/TIONG-RAJANG-3.jpg)
KUCHING: Opis Entali Ai enggau Parit Sarawak (JPS) sereta Lembaga Sungai Sarawak (SRB) patut ngatur pengawa ngenalamka Sungai Rajang enggau Sungai Igan dikena mutraka penanggul ampuh ba kandang ngelingi sungai.
Sida ke besangkut paut diasuh Presiden Parti Demokratik Progresif (PDP) Datuk Seri Tiong King Sing ngatur pengawa ke baka nya dalam siti penerang baka ke dipansutka kemari.
“JPS enggau SRB patut seruran ngiga chara dikena mutarka penusah ampuh sereta enggau naka penyampat ngatur pengawa mansik sereta meratika Sungai Rajang enggau Sungai Igan ke selalu ngasuh kandang ba endur nya ampuh.
Ku Tiong, sida ke besangkut paut patut nyediaka ripot senentang gaya ke bisi nyadi ngagai perintah nengeri ngambika mutarka penusah nya ke seruran diasaika peranak ba endur nya berapa taun ke udah.
Pengudah iya meratika laman web sereta nerima mayuh kompelin, sigi mayuh amat kandang ba jalai raya endur ai enda anyut ke ngasuh kerita tusah amat deka nengah endur nya kelimpah ari ngasuh tanah tusur ketegal ampuh.
“Aku asa amat meda gaya ke baka nya. Aku enda nemu baka ni sida ke diau ba endur nya ngasaika pemerinsa maya musim ujan enggau ribut.
Iya ke lebih enda manah agi nya endur ke lama amat udah dituntung penusah sereta ngirauka ati nya Jalan Engkillo, Jalan Lau Kah Tu, Jalan Chew Kung enggau Jalan Dassan sereta endur bukai.
“SJK Do Nang ba Jalan Engkillo sigi selalu amat ampuh. Ba maya ke diatu pan bala nembiak sekula nengah jematan kayu ke udah buruk lebuh deka ngelawa sekula. Seagi penusah ampuh, pengelikun bala nembiak sekula enda ulih dijamin maya bisi ribut ujan,” ku Tiong.
Kelimpah ari nya Tiong mega madahka, sida ke bekebun nanam sayur ba kandang Jalan Sg Bidut, Jalan Hock Ming, Jalan Yew Chai Toh, Jalan Chung Hung Toh enggau Jalan Kuong Tiong patut diberi pampas laban semua utai ditanam rusah lebuh maya ampuh.
“Perintah Sarawak sigi endang ngemeranka pemansang betanam betupi tang enti nadai pemansang infrastruktur ke chukup, sida ke bekebun nadai pechaya ngagai diri empu agi deka neruska pengawa ngemajuka tanah,” ku iya. .
Lebuh ngenang senentang penanggul nya Tiong mega madahka, Tuai Raban Nembiak PDP Bawang Assan, Cr Joshua Ting Fu Ying udah ngeriput ngagai mayuh bengkah opis ke besangkut paut nengah Kunsil Pelilih Menua Pesisir Bandar Sibu ngambika berengkah merati sereta mutarka penusah ampuh enggau naka penyampat baka ngadu enggau ngemanahka sistem parit.
“Opis ke besangkut paut meseti sama bela mutar sereta bejuraika penusah ampuh sereta ngiga chara timpuh panjai ke ulih mutaraka penusah nya. Enti enda, pengidup mensia mayuh enda ulih diangkatka,” ku iya.