MIRI: Petronas ke diarika Yayasan Petronas meri ‘sanitizer liquid’ enggau ‘dispenser manual’ ngagai 11 bengkah sekula ke udah dipilih ba Miri enggau Bintulu ke bisi 16,634 iku nembiak sekula.
Bantu nya disuaka ngagai opis pelajar pelilih menua endur sekula nya sebedau iya diberi ngagai sekula ke udah dipilih.
Sekula ke nerima bantu baka nya ba Miri nya Sekolah Menengah Kebangsaan (SMK) Lutong, SMK Tudan, SMK Senadin, SJK Chung Hua, Lutong enggau SJK Chung Hua, Pujut.
Sekula ke nerima ba Bintulu nya Sekolah Kebangsaan (SK) Tg Batu, SK Kidurong, SK Kidurong II, SMK Kidurong, SMK Asyakirin enggau Kolej Vokasional.
Menijar Besai Petronas Sarawak Zulaihi Mantali madahka, bantu ke baka nya ngayanka sukung Petronas ba pengawa nyekat pendamik Covid-19 ngambika enda berampit ngaga bala nembiak sekula ba nengeri tu.
Ku iya, Petronas tetap komited sama enggau besaup ngangkatka tikas pengidup komuniti ngelingi endur kandang sida iya ngatur pengawa.
“Kami sigi endang nyukung pengawa meresi jari ngena chara ke betul ngagai bala nembiak sekula, pengajar, staf enggau bala temuai bukai pengudah sekula dibuka baru.
“Kami ngarapka bantu ker baka tu ulih ngurangka bala nembiak sekula dirampit pendemik Covid-19 setipak enggau gerah baka ke udah dipadahka perintah dikena ngurangka penyampau kes baru,” ku iya.
Ku Zulaihi, Yayasan Petronas mega udah meri ‘sanitizer liquid’ enggau ‘dispneser ‘ ngagai sekula primari enggau sekondari ba Johor, Kedah, Labuan, Melaka, Perak, Sabah enggau Terengganu ngena Opis Pelajar Nengeri endur sekula nya.
Ku iya, bantu nya sekeda ari tulung ke diberi Yayasan Petronas penyampau RM20 juta ke nyengkaum perengka sereta kereban dikena mantu hospital enggau sida ke gawa enggau naka ulih nyekat pandemik Covid-19 ari berampit.
Oleh Liong Chai Ling
