![](https://utusansarawak.com.my/wp-content/uploads/2022/07/Pic3.jpg)
SERAKUP… Bansa Iban Sarawak seruran deka begempung enggau bansa Dayak ti bukai nuju pemansang menua.
Tusun Ke-44
LEKA jaku, Iban / “Sea Dayak” dikena sida pemansik antropologis nyebut seraban bansa ti bejaku ngena jaku Iban (Ibanic speaking people). Leka jaku “Ibanic” ditengkebang Alfred B Hudson (1970), Professor Emeritus, University of Massachusetts, Amherst, Department of Anthropology. Nitihka pansik analisis “HVS-I region (12 April 2011)”, nunjukka Iban @ Ibanic Group nadai bida ari raban orang asal menua “indigenous people”. Kenu ku sida pemansik antropologis, bepelasarka cytochrome b gene, bansa Dayak @ Ibanic Group, endang seraban enggau orang asal menua (Orang Asli) di menua bukai. Nya alai, Iban nya seraban ari peturun Dayak Borneo ti datai ari menua Yunnan di China enggau Kemboja baka ti udah disebut dulu agi ari tu. Kenu ku sekeda penulis Orang Putih, leka jaku “Iban” datai ari jaku bansa Kayan “Hivan” ti mai reti orang ti udah pindah ari menua bukai tauka orang ti udu bejalai kin kia. Bisi mega sida ke tuai madah, bansa Iban bulih nama “Iban” ari cherita Tindin “Bragah Ngindang” seduai Entinggi “Keti Aur Tulang”. Amai tauka enda, dua iti teori nya, ukai pekara ti berat lalu nyadi batang kelikuh bansa Iban Sarawak. Utai ti bendar iya nya, bansa Iban Sarawak endang seperugan, saum aki ini enggau bansa Dayak Borneo, lalu bisi tanda amat bepelasarka jaku @ Ibanic languages ti dikena Iban Sarawak ke diatu. Ngenang pasal penatai Iban ke Sarawak, penatai aki ini Iban Sarawak ke diatu endang enda sebaka jalai, enda mega sebaka taun kenyau ari taun 1675, nitihka pansik antroplogis. Maya ti ngiga, berimba menua baru endur bumai betaun, Iban endang seruran charut enggau bansa Ukit, Baketan, Seru, Beliun, Lugat, Lusum sereta mayuh mega etnik orang asal (natives) ti mit-mit ke bukai, tang “Iban fears no other tribes”.
IBAN ENGGAU MELAYU SEGULAI SEJALAI
Udah Abang Gudam enggau Dayang Chi jadi melaki bini, Tuai bansa Dayak Iban ti benama Manggi sereta bala nembiak iya pindah ke ulu Sungai Saribas lalu diau mendam di Supa di Sungai Layar. Sebedau Manggi mupuk iya mega meri pemendar ngagai Temenggong Kadir enggau Abang Gudam sereta bala nembiak seduai nya bumai sereta bekebun ba tanah iya sebelah Sungai Semaruang semak Nanga Saribas.
Udah ti pindah ari Nanga Saribas Manggi enggau bala iya pan belabuh nirika rumah panjai baru di Supa. Benung rumah panjai sida nya baru deka tembu, Manggi ninga rita bisi seraban bansa bukai udah diau mendam di ulu Rimbas. Enda tentu senang ati Manggi ninga rita orang nya; lalu deka ngabas sapa orang nya. Nya alai iya pan mai dua tiga iku nembiak iya bejalai kaki nengah kampung ari Supa ke Ulu Bakir lalu ke Suri di Rimbas lalu datai di Debak. Datai dia iya pan betemu enggau tuai raban bansa nya ti ngumbai diri bansa Seru. Sida madahka Manggi, sida lama udah diau di Rimbas kenyau ari aki ini sida ti pindah ari Nanga Rajang. Ku sida, orang ti agi nguan menua ili Sungai Rejang maya nya, bansa Rajang, Segalang enggau Beliun. Bansa Seru nya mega madahka Manggi, bisi mega seraban bansa Dayak Iban diau ari ili sida nya ti betuaika Garai anak Gunggu. Sida tu datai ari Sebaru di Kalimantan maya sida agi betuaika Jenua seduai Padang.
TEMBAWAI BURUK RUMAH
Udah ti betemu enggau bansa Seru nya, Manggi kena rampit pedis perut chirit lalu parai. Iya dianjung ngagai pendam bansa Seru ti dikumbai orang dia Pendam Batu, semak pasar Debak ke diatu. Kenu ku cherita asal menua nya, Gunggu apai Garai mega ditumbakka ba pendam nya. Udah numbakka Manggi bala nembiak iya pulai enggau ati ti tusah ke Supa. Datai dia, sida enda nembuka rumah panjai sida nya lalu pindah ke menua bukai. Nya mih kebuah endur nya disebut orang dia Tembawai Buruk Rumah.
Udah parai Manggi, Temenggong Kadir sereta sida sebilik pindah ke ulu Semaruang lalu diau ba Kampung Saribas urung setengah batu ari pasar Pusa ke diatu. Maya nya mayuh amai orang dagang ari menua bukai datai dia bejual bebeli. Sida sangkai ba Kampung Saribas belama lalu nya alai endur nya nyau nyadi palan dagang ti tebilang. Kenu ku orang tuai nama sungai Batang Layar nyau disebut orang Batang Saribas. “Saribas” nya nama sebatang sungai ti mit di Kampung Saribas. Maya Temenggong Kadir diau di Kampung Saribas, mayuh bansa Seru, Baketan enggau Beliun masuk agama Islam enggau iya lalu sida nya ngumbai diri bansa Melayu.
Ari Kampung Saribas, Temenggong Kadir pindah baru lalu diau mendam di Pusa ba nanga Sungai Rimbas ti bepati ba Sungai Saribas. Abang Gudam seduai Dayang Chi, maya nya sigi udah beranakka Abang Drahman lalu pindah ari Semaruang nitihka Temenggong Kadir enggau bala nembiak iya ke Pusa. Enda lama udah nya Temenggong Kadir pan parai tuai lalu ditumbakka ba pendam Sapinang di menua antara Beladin enggau Samarang, semak Nanga Saribas ke diatu.
Udah betaun-taun diau mendam di Pusa, Abang Gudam parai tuai lalu ditumbak ba pendam Sapinang mega. Diatu pendam Temenggong Kadir enggau Abang Gudam nya dianggap sekeda orang Melayu berantu sereta nyelai. Sekeda sida ti peturun seduai nya agi ngundang pendam nya laban deka minta berekat, minta tuah, minta limpah.
DAUN ISANG TANDA NAGANG ORANG DATAI
Udah Abang Gudam parai, anak iya Abang Drahman ninga rita Sungai Paku, pati Sungai Saribas udah diuan raban bansa Dayak Iban. Iya keran amai deka betemu enggau orang nya lalu ngusung sida nya hari seiti. Iya disempulang bala ulun iya. Lebuh sida datai di Nanga Paku, sida mudik datai ba Nanga Lalau. Udah nya iya mudik ke ulu agi lalu datai di nanga Sungai Bangkit. Dia iya tepedaka daun isang baka ti dulu tadi mega. Iya pan majak mudik ke ulu agi. Lebuh iya datai ba Nanga Rembai tauka Luban, iya meda utai ti sama baka dulu tadi digantung ba tiang. Daun isang nya dikena orang kelia nagang orang datai ti enda dikelala diau tauka bumai di menua nya. Sema bisi orang ti ngelanggar adat nya, sida nya deka ditinggang penusah baka diserang, dibunuh tauka diburu ari tanah nya. Ari Nanga Rembai, Abang Drahman ke Batu Embawang semak Lubok Brutan lalu betemu enggau tuai bansa Iban ti benama Rusak ba umai iya. Maya ti betemu dia, Abang Drahman madahka diri deka minta pemendar ari Rusak laban iya deka mai bala nembiak iya berumah lalu diau mendam ba Nanga Buling. Ku iya, enti bala sida Melayu diau di menua nya, ulih ga sida nyaup bala Dayak Iban ngetanka menua nya ari munsuh, engka deka ngachau menua nya. Ninga munyi nya, Rusak minta Abang Drahman bemalam ba rumah iya malam nya laban iya deka bepikir dulu sebedau ngisi peminta iya nya. Tiga hari udah nya baru Rusak nyebut pasal peminta Abang Drahman nya.
IBAN ENGGAU MELAYU BAKA DIRI MENYADI
“Tusah sereta lama aku bepikir pasal peminta nuan nya, unggal. Kebuah pia, laban aku mikirka utai dudi hari ba bala peturun ichit wit aku jemah ila. Sida nya ila mayuh begunaka tanah endur sida beridup bumai betaun, betanam betupi. Enti bala nuan nyau mayuh-semayuh diau ditu ila, kati ku anak telesak ichit wit aku ila. Tusah aku deka ngaga pemutus runding nya tang…laban aku ngenang kita Melayu enggau kami Dayak Iban di Batang Saribas manah amai begulai, baka diri menyadi, baka diri sekaban belayan, enda kala belaya enggau pangan diri. Sinu ga aku meda mua nuan. Nya alai aku mega arapka anak telesak uchu ambu ichit wit tua ila enda belaya mega. Taja kita Melayu beagama Islam kami Dayak Iban, ukai Islam…, arapka kitai Dayak Iban-Melayu ditu ila pan enda belaya, beserakup taja nama-nama bisi penusah datai. Nya alai, enggau sempekat nya aku ngemendarka nuan sereta bala nembiak nuan diau lalu bumai betaun di Nanga Buling,” pia ku Rusak.
Asai ke deka nyabak ati Abang Drahman ninga jaku Rusak laban ti kelalu gaga ninga pemutus runding Rusak. Sinu ati iya ninga pemanah sereta penyiru jaku Rusak.
“Terima kasih sereta…meri puji ke nuan, unggal. Manah amai ati nuan. Nya alai, aku pan setuju enggau penemu nuan nya. Ila mih aku madahka bala anak telesak uchu ambu ichit wit aku di Nanga Buling ditu ila; enda ngasuh sida belaya enggau kita Dayak Iban. Nama-nama penusah kita Iban, kami Melayu sigi enggau kita; betulung-tulung mih kitai,” pia ku saut Abang Drahman.
Laban ti endang ada di Saribas lalu bebakih enggau bansa Iban Saribas, landik amai munyi Jaku Iban Abang Drahman. Munyi bansa Iban Saribas, Iban Sebuyau, Iban Balau nya mih iya bejaku ngena Jaku Iban.
“Manah mih penemu nuan nya, unggal. Aku arapka peturun anak telesak nuan ila, sepenemu enggau nuan tu ga. Nya alai, baka tu tanah ti tau endur bala nuan diau lalu bumai betaun, unggal: di Sungai Paku berengkah ari nanga ngagai Batu Embawang lalu terus ke Bukit Dadak lalu rurus ke baruh ngagai Ulu Sungai Lalau enggau Lubok Nangka di Sungai Buling; ari Lubok Nangka niti garis menua ti terus ke pun kayu Mengeris Bejampang lalu ke Tapang Genong; ari nya, niti garis antara menua ari tengah Tanjong Pedada kanan ngili Batang Saribas,” ku Rusak seraya nunjuk ngagai kelai enggau antara bagi menua nya.
Seduai bejalai lubah-lubah betunda udi nengah damun, pengerang enggau kampung, niki bukit, nurun bukit.
“Ami sereta manah amai rampa menua tu, unggal. Gaga bala nembiak aku diau di menua tu ila, unggal. Arapka bala peturun anak telesak tua diau enggau lantang senang ditu ila,” ku timbal Abang Drahman.
“Nya mih, arapka peturun anak telesak ichit wit nuan jemah ila ngenang budi peturun anak telesak aku mega. Nambahka sempekat ti udah disebut aku tadi, munyi tu iya: bansa Melayu enda tau bumai ba tanah Dayak ti bisi tumbuh buluh; pia mega bansa Iban enda tau bumai ba tanah Melayu ari Batu Embawang ke ili endur rumput melai tumbuh sebelah tebing kanan enggau kiba Sungai Paku,” pia ku penerang Rusak.
Udah seduai setuju enggau sempekat sereta penemu pangan diri, Abang Drahman pan mulaika diri ke Semaruang lalu nguluka bala nembiak iya pindah ke Nanga Buling. Sida bukai ti enda pindah ke Nanga Buling, pindah ke ulu Rimbas; sekeda pindah ke Sungai Layar lalu diau mendam di Nanga Undai enggau Tanjong Belong.
Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia & The Encyclopaedia of Iban Studies, Volume III, Joanne and Vinson H. Sutlive). The Sarawak Journal 1994 – The Source of Iban History, Benedict Sandin)
(Betampung ba Tusun Ke-45 minggu nyin ila)
Nya mih, sekeda cherita penatai enggau pemindah bansa Iban makin ngansak sesemak ke Utara, ari menua Batang Sadong, nyentuk ke menua Batang Krian-Sebelak di menua Saratok ke diatu. Ari pelilih menua Serian, Betong enggau Saratok Iban majak ngiga menua baru tunga ke Utara. Arapka Iban patut nemu asal penatai diri empu endang seperugan sebedau bepechah berimba menua baru di menua bukai. Artikel ti deka nyadi bup tu ila, endang deka befokus ba senentang perugan Dayak @ Ibanic Group aja, ukai reti kitai ngelaung tauka enggai begulai enggau bansa Dayak bukai, tang mih awakka mudah agi dipansik laban mit agi rampa. Bansa Dayak bukai awakka sida empu ga mansik. Nitihka pansik Litericha enggau Sains Spiritual, Dayak @ Ibanic Group tu ukai semina kala diau begulai enggau Bunsu Petara (Dewa) – Sengalang Burung tujuh iku diri menyadi, Orang Panggau Libau enggau mayuh bansa Antu, dulu kelia; tang bansa Dayak Borneo @ Ibanic Group mega datai ari peturun Bunsu Petara (Dewa, Dewi) ti bechampur enggau mensia dunya (1) Bunsu Petara (Dewa) + Mensia (2) Antu + Mensia + Bunsu Petara. Ila kita meda lenak agi, amat tauka enda utai tu. Pia mega, bala tuai Iban Sarawak dulu kelia endang dipilih Bunsu Petara, atas pemendar ari Petara (Tuhan, God Almighty). Pechaya tauka enda, bepanggai ba pemacha empu. Engka bisi ga pemacha deka nemu pasal referen artikel tu, endang enda ulih dirintai ditu laban kelalu mayuh, lalu deka ditulis dalam bup maya dichelak ila. Nya alai, Iban patut nemu asal penatai peturun diri empu, ambika kitai ulih serakup lalu begempung enggau bansa bukai di Sarawak mega. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR