![](https://utusansarawak.com.my/wp-content/uploads/2022/07/Pic2.png)
MENUA BERUNEI … Peratika penyauh menua Berunei ari Kuching (Sarawak) nya mih rampa menua kena pegai Sultan Berunei ari taun 1300 sebedau penatai James Brooke.
Tusun Ke-42
LEKA jaku, Iban / “Sea Dayak” dikena sida pemansik antropologis nyebut seraban bansa ti bejaku ngena jaku Iban (Ibanic speaking people). Leka jaku “Ibanic” ditengkebang Alfred B Hudson (1970), Professor Emeritus, University of Massachusetts, Amherst, Department of Anthropology. Nitihka pansik analisis “HVS-I region (12 April 2011)”, nunjukka Iban @ Ibanic Group nadai bida ari raban orang asal menua “indigenous people”. Kenu ku sida pemansik antropologis, bepelasarka cytochrome b gene, bansa Dayak @ Ibanic Group, endang seraban enggau orang asal menua (Orang Asli) di menua bukai. Nya alai, Iban nya seraban ari peturun Dayak Borneo ti datai ari menua Yunnan di China enggau Kemboja baka ti udah disebut dulu agi ari tu. Kenu ku sekeda penulis Orang Putih, leka jaku “Iban” datai ari jaku bansa Kayan “Hivan” ti mai reti orang ti udah pindah ari menua bukai tauka orang ti udu bejalai kin kia. Bisi mega sida ke tuai madah, bansa Iban bulih nama “Iban” ari cherita Tindin “Bragah Ngindang” seduai Entinggi “Keti Aur Tulang”. Amai tauka enda, dua iti teori nya, ukai pekara ti berat lalu nyadi batang kelikuh bansa Iban Sarawak. Utai ti bendar iya nya, bansa Iban Sarawak endang seperugan, saum aki ini enggau bansa Dayak Borneo, lalu bisi tanda amat bepelasarka jaku @ Ibanic languages ti dikena IbanSarawak ke diatu. Ngenang pasal penatai Iban ke Sarawak, penatai aki ini Iban Sarawak ke diatu endang enda sebaka jalai, enda mega sebaka taun kenyau ari taun 1675, nitihka pansik antroplogis. Maya ti ngiga, berimba menua baru endur bumai betaun, Iban endang seruran charut enggau bansa Ukit, Baketan, Seru, Beliun, Lugat, Lusum sereta mayuh mega etnik orang asal (natives) ti mit-mit ke bukai, tang “Iban fears no other tribes”.
MELAYU SARIBAS KABAN DAYAK IBAN SARAWAK
Kenu ku orang tuai kelia, Rusak nya uchu Jelian ari Undup di ulu Batang Lupar. Ari menua Undup iya pindah enggau bala nembiak iya ke Sungai Paku. Maya jeman nya Tindin enggau bala iya endang udah lama diau mendam bumai betaun ba Sungai Paku nya. Datai ti Batang Paku Rusak mai bala iya nirika rumah panjai di Sekundong. Apin bangat lama udah ti nguan menua Paku, Rusak bisi ninga rita pasal seraban orang bukai bisi diau mendam di ili din: enda jauh ari Nanga Saribas.
“Sapa orang ti empu menua nya? Enda patut orang nya munsuh bansa kitai Dayak Iban. Manah aku betemu enggau sida nya, ngichaka bisi enggau bekaban sereta bejual beli,” pia ku Rusak bejaku dalam ati.
Hari siti iya pan mai dua tiga iku bala bujang berani iya undur ke ili laban deka betemu enggau orang nya. Datai di Nanga Luba, urung dua tiga batu ari ili Nanga Paku, iya ngetu ba tebing laban maya nya pasang raya. Maya ti ngetu duduk dalam perau, Rusak asai ke bisi ninga nyawa orang merau datai ari ili. Enda lama udah nya, sida ke merau nya pan datai lalu ngetu berandau enggau Rusak.
“Datai ari ni kita tu, unggal?” pia ku Rusak ngepunka randau.
“Kamek tok datang dari laut?” ku timbal apai tuai orang siku nya. “Kamek nak pegi ke ulu, jumpa orang Dayak”.
“Aku tu Dayak mih. Aku deka ke ili nemuai ngagai Lugu,” ku saut Rusak.
“Au pia. Nuan Dayak pia. Sangka ku nuan tadi sida Seru. Enti pia kapa kami deka bejaku Melayu enggau nuan. Kami tu pandai jaku Dayak Iban mih. Ni naka tanah ke ili kitu enggi orang Dayak Iban?” ku saut Melayu nya.
“Nanga Luba tu mih keterubah palan Iban betemu enggau kita Laut, nyadi…, palan tu mih sempadan tanah kami Dayak Iban enggau kita Laut,” ku timbal Rusak.
KEBUAH MELAYU DIKUMBAI LAUT
“Enti pia, aku setuju mih enggau penemu nuan nya,” ku timbal Melayu nya; setuju enggau penemu Rusak nya. Nya alai berengkah ari hari nya, bansa Melayu di Saribas diau mendam lalu empu tanah muak ke ili Sungai Saribas; bansa Dayak Iban muak ke ulu. Udah tembu randau Rusak enggau apai tuai Melayu nya, Rusak mupuk ke ili lalu betemu enggau Lugu iya nya bansa Dayak Iban tang nyau ngumbai diri Melayu laban ti masuk agama Islam. Nya alai berengkah ari hari nya bansa Dayak Iban Saribas nyebut bansa Melayu nya bansa “Laut” laban sida madahka diri datai ari ‘laut’.
Dua tiga hari udah nya, seraban agi bansa Dayak Iban ti betuaika Manggi pindah ari Undup lalu diau mendam begulai enggau Lugu di Nanga Saribas. Sebedau nya Manggi pindah ari Undup ke Sungai Tisak semak nanga Sungai Skrang. Ari Tisak Manggi pindah ke Ulu Maludam lalu ke ili datai di tasik.
Udah bepuluh-puluh taun Rusak ti betemu enggau Lugu di Nanga Saribas, Temenggong Kadir datai di Semaruang semak Kampung Melayu di Beladin, ngena perau layar lalu sangkai ba menua Manggi. Jeman nya urung taun (1690 AD – 1710 AD) maya perintah Sultan Berunei Ke-15 ti benama Sultan Nasarudin. Manggi tama ngagai perau nya lalu betemu enggau Temenggong Kadir lalu nanyaka penatai iya. Temenggong Kadir madahka diri datai ari Berunei. Ninga munyi nya Manggi semina nagunka pala laban enda tentu nemu utai ti ku Temenggong Kadir nya. Semadi ninga leka jaku Berunei lalu meda Melayu Berunei nya nunjuk tunga ke tasik. Maya nya mega Temenggong Kadir nanya sekali ke Manggi setuju tauka enda nerima iya nyadi ke bakih lalu minta diri diau di Semaruang. Nya alai, udah ti berunding enda lama dalam ati diri.
“Enda patut ga nembiak aku enda setuju enggau penemu aku nerima bansa Laut tu awakka mayuh agi mensia diau sebelah Nanga Saribas tu, nyamai agi ga enda sunyi menua. Ngichaka bisi enggau bebakih, napi munsuh engka bisi datai deka ngalahka menua tu,” ku iya bejaku dalam ati diri empu.
Maya nya Tindin seduai Rusak endang lama udah entap diau di Batang Paku, Talap di Ili Layar, Patinggi Ngadan di Batu Api di ulu Betong lalu Temegoh di Sungai Bangkit pati Batang Paku Ili.
Enda lama udah Temenggong Kadir diau mendam di Semaruang, seiku orang dagang ti benama Abang Gudam datai ari pasar Pagar Ruyong di Minangkabau, Sumatra. Iya mai mayuh bansa kain ke dijual iya. Datai di Semaruang iya pan minta pemendar bedagang di menua Manggi enggau Temenggong Kadir. Manggi laban ti enda tentu nemu jaku Melayu, enda lama betunga enggau seduai nya. Mayuh mih randau bukai antara Temenggong Kadir enggau Abang Gudam.
Udah bebulan-bulan bedagang sebelah menua Manggi enggau Temenggong Kadir, nyau teleba sereta bebakih amai sida tiga nya, nyau baka diri menyadi. Manggi enggau Temenggong nyau suah meri Abang Gudam utai diempa baka beras, ikan enggau manuk. Pia mega Abang Gudam nyau meri seduai nya kain sutera. Ukai main pengaga bala bini anak Manggi ngena kain sutera maya bisi pengerami. Kemaya ke kala ngena kain baka nya? Meda pan enda kala. Kapa nyebut!
TEMENGGONG KADIR LARI ARI ASTANA
Hari siti maya ti tama deka nemuai ngagai Temenggong Kadir ba perau layar iya, mayuh mih buah randau seduai. Maya nya Temenggong Kadir madahka diri endang asal Melayu Berunei. Kenu ku iya, sebedau ti nyadi orang dagang lalu rembus ba Sungai Saribas, Temenggong Kadir kala gawa ba astana Sultan Berunei nyadi ‘jurubahasa’ ba ‘mahkamah’ Sultan. Mayuh bansa bukai ukai Melayu selalu minta diaduka laya lalu betemu enggau Sultan Berunei, bisi nya bansa Dayak Iban, sekeda nya bansa Kadazandusun enggau mayuh mega bansa bukai, nyau enda alah ingat iya. Lama iya gawa ba kot enggau Sultan Berunei; tang iya rari lalu ngemaduka diri gawa dia udah anak dara iya ti benama Dayang Chi dipejal Sultan nyadi gundik tauka indu simpan. Tegal ti pedis ati meda ulah Sultan nya mih kebuah iya rari lalu begulai enggau bansa Dayak Iban di Saribas. Temenggong Kadir madah, bajik amai anak iya ti dirampas Sultan nya. Enti sema bisi orang berani nyelamatka anak iya nya ari Sultan, manjung iya gaga lalu ngasuh orang nya jadi enggau anak iya. Ba astana nya anak iya nya ukai jadi melaki bini enggau Sultan tang nyadi indu simpan. Meda Abang Gudam nya sigat sereta kering amai gamal, Temenggong Kadir ngumbuk sereta meransang Abang Gudam nyelamatka anak iya nya ari Sultan Berunei.
Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia & The Encyclopaedia of Iban Studies, Volume III, Joanne and Vinson H. Sutlive). The Sarawak Journal 1994 -The Source of Iban History, Benedict Sandin)
(Betampung ba Tusun Ke-43 minggu nyin ila)
Nya mih, sekeda cherita penatai enggau pemindah bansa Iban makin ngansak sesemak ke Utara, ari menua Batang Sadong, nyentuk ke menua Batang Krian-Sebelak di menua Saratok ke diatu. Arapka Iban patut nemu asal penatai diri empu endang seperugan sebedau bepechah berimba menua baru di menua bukai. Artikel ti deka nyadi bup tu ila, endang deka befokus ba senentang perugan Dayak @ Ibanic Group aja, ukai reti kitai ngelaung tauka enggai begulai enggau bansa Dayak bukai, tang mih awakka mudah agi dipansik laban mit agi rampa. Bansa Dayak bukai awakka sida empu ga mansik. Nitihka pansik Litericha enggau Sains Spiritual, Dayak @ Ibanic Group tu ukai semina kala diau begulai enggau Bunsu Petara (Dewa) – Sengalang Burung tujuh iku diri menyadi, Orang Panggau Libau enggau mayuh bansa Antu, dulu kelia; tang bansa Dayak Borneo @ Ibanic Group mega datai ari peturun Bunsu Petara (Dewa, Dewi) ti bechampur enggau mensia dunya (1) Bunsu Petara (Dewa) + Mensia (2) Antu + Mensia + Bunsu Petara. Ila kita meda lenak agi, amat tauka enda utai tu. Pia mega, bala tuai Iban Sarawak dulu kelia endang dipilih Bunsu Petara, atas pemendar ari Petara (Tuhan, God Almighty). Pechaya tauka enda, bepanggai ba pemacha empu. Engka bisi ga pemacha deka nemu pasal referen artikel tu, endang enda ulih dirintai ditu laban kelalu mayuh, lalu deka ditulis dalam bup maya dichelak ila. Nya alai, Iban patut nemu asal penatai peturun diri empu, ambika kitai mega ulih serakup lalu begempung enggau bansa bukai di Sarawak. Engka bala pemacha bisi utai tanya tauka deka ngirum infomasyen engga gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR