SIBU: Bekel ai ke seruran nadai ninting minggu ketegal pressure ai ke enda kuat meri penanggul gagai semua orang ke diau ba semilan buah rumah panjai ba skim genturung pendiau Bawang Assan.
Chairman Unit Bumiputera Parti Sarawak Bersatu (PSB) N.53 Bawang Assan Andrew Shilling madahka, gaya ke baka nya mega meri penanggul ngagai sida ke diau ba tiga bengkah rumah panjai ba Tanjung Bekakap, dua rumah panjang ba Sungai Apong enggau sebuah rumah panjai ba Sungai Melanggan.
“Bekal ai ke enda chukup mega meri penanggul ngagai dua buah sekula, Librari Desa sereta Klinik Desa Bawang Assan.
“Nitihka sida ke diau ba endur nya, kebuah selalu nadai ai laban pressure ai ke enda kuat,” ku iya madah ngagai pengarang berita pengudah nguluka raban PSB nemuai ngagai rumah panjai ba kandang Bawang Assan kemari.
Andrew minta opis enggau ijinsi perintah ke bisi besangkut paut meratika penanggul ke seruran nutung rayat.
“Kami ngarapka sida ke patut ulih mutarka penanggul bekal ai ba endur tu enggau naka penyampat,” ku iya.