![](https://utusansarawak.com.my/wp-content/uploads/2021/01/Pic-1.jpg)
![](https://www.utusansarawak.com.my/wp-content/uploads/2021/01/Pic-1.jpg)
nyadi ANTU jai tauka ANTU manah (Antu Sebayan).
Tusun Ke-51
KUASA MISTIK ANTU: SITAN, JIN, IBLIS
Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Bunsu Petara (Dewa, Diety) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.
Terima kasih ke jurai sekeda kitai Iban dalam FB ku pasal ANTU. Lebih kurang sama mih penemu kitai Iban pasal ANTU. Dalam jalai pengidup kitai Iban utai ti nyelai sereta enda ulih peda nya antu magang tang bisi ga bida mayuh bansa ANTU jai, ANTU manah. Pekara tu udah disebut aku dalam tusun artikel ti udah pansut dulu suba. Genap bengkah bansa di dunya tu bisi bansa ANTU kediri empu lalu disebut ngena nama ti bebida: dalam English disebut ghost, specter, phantom, wraith, spirit, demon, genie, incubus, devil enggau ti bukai bepanggai ba penyadi semengat mensia ti parai. Sekali tu aku deka mai pemacha mansik ANTU nitihka penemu Sains Spiritual.
PENEMU SAINS SPIRITUAL
Nitihka penemu Sains Spiritual, udah tubuh mensia mati lalu luluh sekeda ari energi ari tubuh nya tadi disebut roh @ ‘tubuh halus’ tau nyadi Antu: Sitan, Iblis. Bala antu nya tama ke menua ti enda dipeda ‘alam ghaib.’ Tauka ‘Buvalooka.’ Dalam agama Adat Iban menua nya disebut Sebayan. Sekeda mensia nyebut nya menua ketujuh ari Neraka. Sekeda Antu nya mega agi sesindau di dunya mensia. Nya mih kebuah mayuh mensia madahka diri kala meda tauka ninga bunyi Antu. Antu-antu nya apin tama ke menua ti manah ti disebut Serega.
Maya kitai mensia mati, penunga semengat kitai ila bepanggai ba mayuh bengkah pekara baka: (1) Pemanah enggau penyai ati sereta pikir kitai mensia ti bekaul enggau gaya idup kitai di dunya mensia. (2) “Ego” kitai – reti nya semengat tauka spiritual – chara kitai mensia seiku-seiku ngumbai diri empu sapa diri empu. Sekeda Saintis Sosial nyebut ‘ego’ tu ‘harga diri’ sereta penyumbung ati “keangkuhan”. Ego mega ulah mensia ti sumbung dualisme enggau Tuhan. Dualisme, reti nya mikirka diri empu aja ti nadai kaul enggau Petara (God Almighty, Tuhan). Ego mega dikena mensia empu ngelala diri empu ngena lima pengasai (senses). Pikir enggau pemandai “Intelek” lalu ukai ngelala diri empu ngena ati “jiwa” atau Petara (Tuhan) ba diri empu. (3) Pengawa ti digaga kitai maya ti idup di dunya. (4) Tikas sereta chara “praktik spiritual” sembiang enggau sampi nitihka agama tauka pengarap diri empu ti digaga kitai mensia maya ti idup. (5) Nasit diri empu “luck, fate” (6) Gaya pemati – mati merinsa, mati kena eksiden tauka mati senang ati. (7) Chara tauka bansa pendam endur nganjung bangkai. (8) Ritual-ritual (sembiang enggau sampi dalam agama sereta pengarap) ti engkeman enggau penemu spiritual ti digaga peturun kitai mensia ke mati ulih mantu semengat mensia.
KEBUAH DISADANG NYADI ANTU
Udah kitai mensia parai, semengat mensia ti disadang nyadi ANTU laban:
(a) Maya idup di dunya sida mayuh juluk ati ti apin ulih japai
(b). Mayuh utai ngachau dalam ati enggau tubuh diri empu baka ati ti muras, takut, begedi, bam enggau ti bukai.
(c) Mayuh litan apin suman dalam pikir enggau ati mensia.
(d) Ngembuan tikas ati sumbung ‘ego’ ti tinggi
(e) Sida ti selalu meri pengerugi, penyai sereta ngemedis mensia bukai.
(f) Sida ti enda chukup “praktik spiritual” sembiang, besampi nitihka agama tauka pengarap diri empu lalu enda nyerahka pikir, tubuh enggau penemu diri empu ngagai Petara (God Almighty, Tuhan)
Nya alai, semina orang ti udah datai ba tikas spiritual 50 pesen tauka 60 peseN sereta ngembuan ati sumbung “ego” ti baruh ulih ngenataika diri ngagai menua Serega lalu enda nyadi ANTU. Mensia bukai ti kurang tikas spiritual kurang ari 50 pesen disadang deka datai di menua Nereka lalu engka nyadi ANTU. Semua semengat “tubuh rohani” di Neraka nya ANTU magang taja mayuh bansa antu nitihka tikas spiritual ‘tubuh rohani, roh’ nya
Kelimpah ari nya, mensia ti ngembuan adat basa sereta manah ati tang enda ngembuan tikas penguat spiritual kurang tingg ari 50 pesen arap sereta sembiang muji Petara (God Almighty) mega disadang semengat sida nya engka tau nyadi ANTU. Kebuah pia, laban semengat sida nya disadang deka diserang bala ANTU bukai ti lebih tinggi tikas ari sida nya baka utai ti nyadi di dunya mensia: sapa ti bekuasa sereta kering nya mih orang ti tan idup lama. Ngena kuasa enggau pengering tubuh mistik sida, ANTU: jin, iblis, sihir @ energi negatif tikas tinggi nya nguna tubuh mistik sida ngelaban semengat ‘tubuh rohani’ sida ti manah adat basa sereta lemi nya. Ujung-ujung semengat ‘tubuh rohani’ nya alah lalu nyerahka diri lalu nyadi ANTU: energy negatif.
PENGARAP LEMI MUDAH NYADI ANTU
Udah mati ila semengat kita mensia enda mudah nyadi ANTU enti kitai; chukup sembiang, besampi nitihka agama tauka pengarap diri empu lalu nyerahka pikir, tubuh enggau penemu diri empu ngagai Petara (God Almighty) @ tinggi tikias spiritual dalam tubuh enggau semengat. Ngena simpul penemu ti pandak, kitai mensia ti ngembuan pikir sereta ulah ti manah maya ti idup di dunya, maya parai ila semangat kitai enda nyadi ANTU.
Taja pia, bisi ga semengat mensia ti udah mati ti ngembuan tikas spiritual tinggi lebih 50 pesin nyadi ANTU: ambi ke chunto baka tikas spiritual Orang Sante ti 70 pesen. Kebuah pia, laban ANTU ti disebut ‘supernatural being, superior evils’ ti kuat baka sida “SITAN, JIN, IBLIS, SIHIR“ ti datai ari tikas Ke-5 Neraka sama tikas spiritual enggau Orang Sante nya lalu ulih ngelaban lalu mai sida nya nyadi ANTU. Taja pia, ukai ga semua ANTU nya nyadi Sitan, Jin, Iblis, Sihir. Ambi ke chunto, Antu Sebayan nya bansa ANTU ari semengat mensia ti udah parai.
Reti nya tikas spiritual Orang Sante enggau ANTU: Sitan, jin, iblis, sihir nya sama, pia? Au, betul tang bida iya baka tu: Orang Sante besembiang sereta besampi ‘praktis spiritual’ lalu nyerahka tubuh, pikir, reta tengkira, ego enggau ti bukai sida ambika sida ulih besaum pengidup sereta begempung enggau Petara (God Almighty) tang ‘The Supernatural being, superior evils’ tauka mensia ti ngembuan tikas spiritual tinggi, maya sida mati ila besembiang sereta besampi ngulihka kuasa mistik ‘supernatural’ kena sida ngelaban asuh Petara (God Almighty) lalu ngerusak tubuh enggau semengat mensia dunya.
Nya mih ANTU ti bisi kaul enggau enggau kuasa mistik ‘alam ghaib’ di dunya tauka menua Orang Mati ti disebut kitai Iban Sebayan. Penemu mensia ari genap bengkah raban bansa pasal ANTU sereta chara mutarka penusah ketegal Antu nyau deka sama. Nya nunjuka ANTU endang amai bisi (wujud) di dunya mensia. Nya alai bejimat-jimat lalu nguna pikir ‘spiritual’ ti tinggi kena kitai mensia mutarka penusah tegal ANTU. Nya alai, enti pemacha bisi utai deka ditanya tauka deka bebagi penemu pasal tiga kuasa mistik nya, tau SMS HP: 01114019115 / 0138475146. Pia mega pemacha tau ngirumka cherita sereta gambar pasal kuasa ‘alam ghaib’ nya ngagai Inbox FB aku.