![](https://utusansarawak.com.my/wp-content/uploads/2020/12/Pic6a.jpg)
![](https://www.utusansarawak.com.my/wp-content/uploads/2020/12/Pic6a-1024x763.jpg)
Tusun Ke-45
KUASA MISTIK ANTU BUNSU PETARA
Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Antu Bunsu Petara (Dewa Dewi) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.
Ketiga-tiga kuasa mistik nya mega suah dipelajar, dipejurai, dikelikuh lalu tau ngasuh kitai mensia dunya tesat penemu. Tegal ti tesat penemu sekeda mensia di serata dunya belaya, bemunsuh lalu bebunuh diri sedunya, diri semenua, diri sebansa sereta sekaban sepangan tauka diri sebilik. Nya mih mensia dunya ti enda sama agama tauka pengarap suah enda ulih begulai sejalai. Nama kebuah utai nyadi baka nya? Sekeda mensia apin ngelala sereta mereti enggau lenak pasal tiga raban kuasa mistik nya. Nya mih jaku orang tuai, bisi mata enda meda, bisi pending enda ninga. Sekeda mensia meda tang enda ngelala. Sekeda mensia ninga tang enda mending.
RETI ‘WHITE MAGIC’
Dulu agi agi tu aku udah mai pemacha mansik pasal pasal penemu jai black magic, ilmu hitam, ti bisi kaul enggau kuasa mistik Antu:Sitan, Jin, iblis. Sekali tu aku mai kita mansik nama utai ti dikumbai orang ‘white magic’, ilmu putih. White magic or light magic mai reti penemu mistik ti nguna kuasa ‘supernatural or magic’ enggau tuju manah sereta ukai ke penguntung diri empu selfless purposes ti bisi tuju kena ngelaban pengawa ‘black magic’. Jeman mensia apin ngelala Petara (God Almighty) penemu manah tu disebut ‘natural magic’ penemu mistik asal.
Asal penemu ‘white magic’ tu ditengkebang seraban bansa ti megai agama ‘paleolitic religion’: pengarap lama dulu kelia jeman ‘Stone Age’ nyengkaum politeisme di menua ‘Ancient Egypt’ lalu udah nya ngerembai ngagai agama Monoteisme (Judaism, Christian, enggau ti bukai) di menua Timur Tengah.
Kuasa mistik penemu burak (white magic) tu bepun ari mensia ti nyembah Antu Bunsu Petara (dewa, gods, godess) ti bekuasa atas pemanah tanah alai bekebun di atas bukit. Lama-kelama, penemu ‘white magic’ tu pan ngerembai nagagi semua pupu raban bansa ti ngemunka pengawa bumai kena ngidupka diri. Pengarap ti baka nya majak ngerembai ngagai raban bansa ti megai agama Politeisme tang udah nya lalu dibantah bansa Judah (Jews).
‘ALAM GHAIB’ AGI DIPEKELIKUHKA
Kira-kira dalam taun 1500 penemu burak tu lalu dipejuraika mensia mayuh. Mayuh mensia pechaya sigi amai bisi kuasa mistik ‘black and white magic’ ti bepelasarka ‘siritual beings and spirits’, raban Antu:Sitan, Jin, Iblis..dalam kategori sihir. Berindik ari nya seraban mensia ti Europa di megai agama Keristin Roman Catholic Church ngaku amai bisi utai idup ‘supernatural being’ baka nya ti ngelaban adat Petara (God Almighty). Nya mih, datai ke maya ari diatu pekara pasal tiga raban kuasa mistik ti disebut ‘alam ghaib’ agi dipekelikuhka mensia mayuh lalu engka nyentuk ke ila kelikuh nya enda tembu. Kitai ga sama udah kala ninga, kala meda di serata dunya mensia belaya, beperang tegal agama enggau pengarap ke ‘supernatural being’ tu laban penemu seraban-seraban bansa mensia bisi penemu diri empu ti bebida ari seraban ke bukai.
Tuju kuasa mistik ‘white magic’ ti selalu dikereja mensia dunya iya nya nyengkaum: Puchau pengasih, puchau bepangan, puchau pengamat, puchau nyuman orang tabin, puchau pengerai, puchau penyangga, sabal mimpi, puchau pemaik, enggau mayuh ti bukai ti bisi besangkut paut enggau jalai pengidup, mensia dunya.
SEBKA ENGGAU PNGAWA MANANG
Dalam jalai pengidup bansa Iban penemu mistik putih ‘white magic’ tu semak sebaka enggau pengawa Manang enggau Lemambang. Manang ukai semina diguna kitai Iban belian lalu nyumanka mensia ti tabin tang mayuh mega diguna dalam pengawa ti disebut di atas nya tadi. Pengawa Manang bepelasarka Antu Bunsu Petara ti disebut Iyang ti datai ari Raja Menjaya seduai Ini Inda Rabong Menua. Lemambang diguna kitai Iban maya pengawa mayuh macham gawai ti bepelasarka Antu Bunsu Petara tujuh iku sida Sengalang Burong diri menyadi enggau Orang Panggau Libau enggau Gelong. Semua pengawa nya endang tuju iya manah magang, enti iya dikereja enggau betul sereta enda ngemedis orang bukai. Semua pengawa tu endang disempulang enggau piring ading ti betul nitihka atur tusun ti menyana. Pengawa ritual Manang tauka Lemambang selalu belaban enggau kuasa mistik Antu: Sitan, Jin, Iblis. Dalam jalai pengidup kitai Iban, kuasa mistik Beliau sama tikas enggau Bomoh, Dukun. Sida tu mega suah nguna ‘white magic’ maya mantu mensia dunya dalam mayuh macham penusah tauka penanggul tegal ti diayahka Antu jai nya.
‘WHITE MAGIC’ KUASA MISTIK MANAH
Kuasa mistik burak (white magic) endang dikumbai kuasa mistik ti manah ‘good magic’ tang nitihka penemu dalam Bup Kudus (Bible) nadai jaku nya. Bup Kudus orang Keristin nadai nyebut bida antara dua iti kuasa mistik nya: kedua-dua iya enda diasuh Petara (God Almighty, Tuhan) laban iya bisi kaul enggau kuasa mistik bukai. Nya alai orang Keristin patut pukas ari kedua-dua kuasa mistik nya. Nama kebuah? Uji peda dalam (Deuteronomy 18:106; Leviticus 19:26, 31; 20:27; Acts 13: 10) bisi nyebut Raja Egypt, Firaun nguna kuasa mistik ‘magic’ bepelasarka “secret arts” sida nguji deka niru kereja ajih ‘miracles’ ti digaga Moses seduai Aaron (Exodus 7:11; 8:7).
‘Secret arts’ nya nyengkaum pengawa ‘ritual sihir’ ti disungkak enggau sampi, puchau ‘spells’, ubat enggau pengaruh ‘chams and amulets.” Dalam Acts 13.10 Saint Paul mega ngutuk sihir Elymas ti digelar iya anak sitan ‘child of the devil’. Dalam Injil Lord Jesus mega mayuh nyebut pasal ‘white magic’ tu ti besangkal enggau ajar Keristin baka dalam: Matthew 2:11, 2 Corinthians 11:14, 1 Peter 5:8, 1 Timothy 4:1. Bacha mih enti deka nemu lenak agi lalu pansik kediri empu; anang semina ninga jaku orang bukai aja.
Nya mih, nitihka penemu agama enggau pengarap mensia di dunya tu, nya mih bida ‘white magic’ tiga bengkah kuasa mistik nya. Nya alai, enti pemacha bisi utai deka ditanya pasal tiga kuasa mistik nya, tau SMS P: 01114019115 / 0138475146. Pia mega pemacha tau ngirumka cherita sereta gambar pasal Antu ngagai Inbox FB aku. Pia mega, tuju aku mansik kuasa tiga bengkah kuasa mistik tu mega ukai tuju deka ‘promote’, aku semina bebagi penemu enggau pemacha lebih agi bansa kitai Iban awakka kitai enda sengapa sebut sereta bekelikuh.