TERIMA KASIH… Dato Sri Richard Riot Jaem (tiga kanan) nyuaka insentif ngagai seiku nembiak sekula beserimbai
enggau Pengerami Nyuaka Insentif SPM 2021 enggau randau begulai enggau apai indai ba Kampung
Pichin sereta diperatika sida bukai.
SERIAN: Nembiak sekula ke udah ngambi peresa Sijil Pelajaran Malaysia (SPM) diperansang ngambi kus bekaul enggau pengelandik sereta teknikal.
Ambassador Spesial Menteri Besai ke Asia Timur Jepun, Korea Selatan enggau Taiwan, Dato Sri Richard Riot Jaem madahka, agi mayuh empai nemu senentang pengelandik teknikal nyediaka peluang pengawa meri gaji besai.
Ku iya, nembiak sekula ke udah tembu belajar ba Serian tau minta belajar ba Institut Latihan Perindustrian (ILP) ba nengeri tu nguliha penemu bekaul enggau pengawa teknikal.
“Ba Sarawak bisi tiga ILP iya nya ba Samarahan, Miri enggau iya ke pemadu baru agi benunung digaga iya nya ILP Serian.
“Ba Malaysia maya ke diatu semina 28 pesen aja pengereja ke bisi pengelandik enti dibandingka enggau 90 pesen ba menua Jerman. Nya kebuah aku ngasuh bala apai indai meransang bala anak diri belajar ba kolej pengelandik ke bisi ba Sarawak,” ku iya.
Iya mansutka jaku munyi nya maya Pengerami Nyuaka Insentif SPM 2021 enggau randau begulai enggau apai indai ba Kampung Pichin kena Hari Enam ke udah.
Kelimpah ari nya Richard ti mega Kaban Parlimen Serian nangkan bala apai indai enggau nembiak sekula aku udah ngambi peresa SPM ngambika enda berumban deka belajar ba kolej engga universiti swasta.
Ku iya, sebedau nya bala apai indai patut mansik dulu senentang kolej enggau universiti nya nyengkaum kus ke bisi disediaka.
“Enti kus salah pilih iya ulih meri pengerugi ngagai apai indai enggau nembika sekula nya ila,” ku iya.
Ba pengerami ke sama iya mega madahka geran penyampau RM30,000 diberi ngagai Kunsil Prinsipal Sekula Sekondari Pelilih Serian.
