DATU Dr Penguang anak Manggil maya betemu enggau Seketeri Kunsil Pelilih Marudi sereta bala kunsil Pelilih Marudi empai lama ke udah.
MARUDI: Sapit Menteri Pengerai Mensia Mayuh, Pengawa Berumah enggau Perintah Pelilih Menua Datu Dr Penguang anak Manggil ngarapka bala kunsil pelilih menua ngatur pengawa enggau pengelurus ati.
Iya ngasuh bala kunsilor tauka raban kunsil seruran sensitif enggau gaya ke bisi dipeda sereta nyadi mata enggau pending pengari rayat.
Ketegal nya Penguang ti mega Kaban Kunsil Nengeri (ADUN) Marudi deka meda bala kunsilor ngaga pengawa ke patut sereta ngemanahka agi servis diri empu ngagai rayat.
Iya mansutka jaku munyi nya maya betemu enggau Seketeri Kunsil Pelilih Marudi sereta bala kunsil Pelilih Marudi empai lama ke udah.
Maya betemu nya Penguang bekunsika perambu opis menteri ke deka ngemanahka agi sistem servis Sida Bekuasa Pelilih Menua (PBT) ba nengeri tu.
Kelimpah ari nya iya mega bisi nyebut mayuh bengkah ubah enggau perambu ngagai PBT Sarawak ba timpuh lima taun ke deka datai baka ke udah diperambuka berengkah ari taun 2012.
Lebuh ngenang pekara bukai Penguang ngasaika diri puas ati enggau pemujur pengawa ngaga endur ngengkahka kerita baru.
Ku iya, bisi 96 lot baru endur parking kerita benung digaga lalu pengudah tembu ila iya ulih mutaraka penanggul parking ba pelilih menua nya.
