![](https://utusansarawak.com.my/wp-content/uploads/2022/07/Pic8.png)
PENGARUH / UBAT … Antu / roh Bunsu Petara mega ulih tama lalu diau ba utai ti ditangkin mensia tu.
Tusun Ke-20
NITIHKA pansik teori Infraed (IR) Light for Ghost Hunting, Sains Fizik (Theoretical Physicist – Albert Einstein & Sains Spiritual), ujan nyala endang tanda Antu Bunsu Petara tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpah ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh (dimusnah @ destroyed), tang ulih bebali (transformed).
BENDA GUCHI BECHURA BIRU
Maya nya dalam kandang pun taun 1985, sida indai Alecia ti benama Malaya Anak Minggeh benung nasau umai begulai enggau sida apai indai sereta ipar iya sebilik. Lebuh ti nebas umai sida ba Sungai Ngekuan di Selangau nya, dia mih Malaya tetemuka seigi benda guchi bechura biru. Benda nya ayan semina naka rekung aja ari tanah. Iya nadai tudung. Nyelai amat ga guchi nya. Taja iya ba tanah, tubuh iya enda kamah, nadai dibalut lutak tauka tanah kamah.
Sida sebilik pan ngambi guchi nya lalu ngelap iya ari balut tanah mimit aja. Sebengkah agi pekara ti nyelai iya nya, guchi nya bisi mata. Tukuh mata iya segenda baka mata mensia tauka mata jelu, segala sereta perenching. Sida Malaya sebilik mai gunchi nya ke rumah. Maya nya sida agi diau di Rumah Sumbang. Rumah panjai sida nya digaga baru. Udah Tuai Rumah Sumbang nadai, Tuai Rumah Manchong dichiri nyadi tuai rumah nyentuk ke diatu (2012).
Benda gunchi nya tadi lalu disuaka sida Malaya sebilik ngagai ini sida ti benama Manang Menani. Ku iya, benda gunchi nya ukai benda sebarang. Jarang orang bisi ngembuan benda ti baka nya. Guchi iya nya pan ditepu ini Manang Menani ke dalam sigi benda ti besai agi. Nadai seiku sida sebilik nemu ini sida nya nepu gunchi nya ke dalam benda nya. Malam nya Malaya bemimpi betemu enggau seiku indai tuai orang kira-kira beumur lebih ari 80 taun. Buk iya panjai sereta burak apus. Buban banan baka sentuku. Indai tuai orang nya madahka diri angat amat, lalu minta diri dipansutka ari benda nya.
ENGGAI DISIMPAN DALAM PETANG
“Aku tu mih guchi ti disimpan kita dalam benda nya. Enggai aku diau dalam nya. Petang. Angat amat. Pansutka aku. Barang sapa ti ngibun aku deka chelap lindap. Aku deka nyaga bilik kita ari mayuh leman penusah,” pia ku orang tuai nya dalam mimpi Malaya.
Udah Malaya tedani, iya pan nusi mimpi diri ngagai ini sida nya. Ini Manang Menani berasai tegepang lalu beguai-guai mansutka guchi nya ari benda. Iya minta ampun tegal ti enda madahka sida sebilik, pasal iya ti nyimpan guchi nya dalam benda besai. Berengkah ari nya sida sebilik pan nyimpan guchi nya ba endur ti enda betutup, ba atas jemari.
Dua tiga taun udah nya, sida serumah (Rumah Sumbang) masuk agama Kristian bebala mayuh. Ku paderi, orang Kristian enda tau nyimpan sereta ngempu utai nyelai baka nya tauka pengaruh. Nya alai semua sida serumah ti bisi nyimpan ngembuan utai nyelai, ubat tauka pengaruh mesti dibuai magang. Lekaka pengarap lama, lalu arapka Petara seiku aja, pia ku Paderi.
Laban ti sayauka guchi nya, ini Manang Menani berumban nyuaka Malaya guchi nya ngena chara belalai. Ini sida nya ngasuh iya mai guchi nya ngagai endur bukai. Iya ngasuh Malaya nyimpan guchi nya manah-manah. Ninga jaku ini iya munyi nya, Malaya pan nabanka guchi nya ke Pasai, menua laki iya Angking. Ari Pasai iya mai guchi nya nitihka laki iya ti gawa nyadi Polis Diraja Malaysia ke Limbang, di Kuching, udah nya di Sibu. Diatu guchi nya agi disimpan sida Malaya sebilik ti diau mendam ba rumah sida iya di Sibu Jaya. Iya semina nyadi ke pengingat sereta reta pesaka aki ini sida aja. Ukai iya nyadi ke pengaruh, ubat tauka utai bukai. Sida sebilik mega nadai ngumbai guchi nya sebengkah pengaruh tauka utai ajih, laban sida sebilik tu kenyau ari taun 1980 suba endang orang ti teguh megai pengarap Kristian Katolik.
Nya mih sebengkah agi leman dunya misteri. Mar dipechaya, tusah dikira, tang ukai utai ngasuh alit ati. Agi mayuh gelema dunya ti apin temu kitai mensia. Nya mih dunya ti digaga Petara ti Besai Kuasa. Kala Pengajar Alecia, nanya penemu aku pasal benda Guchi nya.
“Enti nitihka ajar Manang Menani, benda Guchi nya patut diintu ngena piring ading, enggaika iya ngachau kami sebilik enti iya enda diberi makai. Patut tauka enda kami sebilik ngintu Guchi nya? Kati penemu dek, Pengajar?” ku Alecia nanya aku.
“Nitihka penemu aku, enda ibuh diibun lalu diintu ngena agama Adat Iban mih utai nya, laban kita sebilik udah entap megai pengarap Kristian. Kita sebilik besampi meri terima kasih ngagai Petara (Tuhan) aja, ke utai ti udah diberi iya ngagai kita sebilik; laban semua utai di dunya tu endang bepun ari Petara lalu endang enggi iya memagang,” pia ku saut aku.
Cherita tu ditusi Alecia Anak Angking, lalu ditulis nitihka pengingat enggau peneleba sida Malaya Anak Minggeh sebilik.
(Betampung ba Tusun Ke-21 minggu nyin ila)
Sekeda ari artikel dalam gempung cherita Nyelai Tang Amat (NTA) tu, udah kala dichelak nyadi bup ti benama Pengabang Ari Panggau Libau; lalu deka befokus ba senentang pengidup pendiau bansa Dayak di Kalimantan enggau Iban Sarawak tauka bansa Dayak ti bukai di Sarawak. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai (misteri) di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizinNya” aku deka datai ba endur kita nya.
Oleh HARRY USUP UMBAR