![](https://utusansarawak.com.my/wp-content/uploads/2020/09/2.-bala-dara-scaled.jpg)
![](https://www.utusansarawak.com.my/wp-content/uploads/2020/09/2.-bala-dara-683x1024.jpg)
MAYUH bendar orang gaga ati ninga atur perintah ti neritka adat kena nyekat pengawa nyali duit nadai belisin.
Siku kaban ti gawa perintah muji atur terit nya. Kebuah pia, laban orang ti kena tinggang penusah laban ahlong tu endang tebal agi bala raban sida tu, kelebih agi bala sida ti nadai slip gaji.
Nyadi orang perintah enggau kompeni ti bisi gaji bulan mayuh agi tepawah laban sida kompeni nyali duit bisi lisin laban mudah bulih duit injau laban bisi slip gaji sereta nerima gaji genap ujung bulan.
Ka tambah tu, unggal tu mega madah, perintah patut balat agi mansik chara enggau atur kompeni belisin ti nyali duit ngagai klien sida.
“Perintah patut ukai meri lisin nyali duit ngagai kompeni aja tang sida patut mansik enggau silik terma sereta bakani prosedur kompeni nyali duit belisin tauka ‘ahlong belisin’. Enti sida udah mansik, nya baru perintah nemu bala kompeni tu endang balat ‘nginsap darah’ bala orang ti ngelun ari sida. Kami menyanak tu endang genap bulan mayar semak lapan ratus pala enggau bunga lun dipegulai,” ku unggal gawa perintah tu ti enda ngasuh nama enggau batang pengawa iya disebut ditu.
Lelaki tu umur urung 40 taun ti datai kediri betemu enggau Sada Sarawak apin lama nyerimbai berita pasal ahlong ti bisi pansut nya ngarapka perintah anang mina nyidi kompeni nadai lisin (ahlong) tang mega mansik enggau silik modus operandi jalai nyali duit kompeni belisin ti belindung ba lisin sida tang ke bendar iya nadai bida enggau sida ahlong.
Apin lama ti udah, sekeda surat berita di menua tu nyengkaum Sada Sarawak bisi udah mantaika berita pasal perintah di serata Malaysia ti deka bebendar nagang sereta ngemunaska ulah sida ahlong. Berita mega madah deka neritka agi atur kena meratika sereta nentuka enda tepawah ari jalai ti betul bala kompeni money lender ti nyali duit lun ngagai mensia mayuh.
Nyadi ukai mina kompeni money lender aja ti udah balat nyadi ngerekai tang pia mega kompeni pajak gadai di menua Sarawak tu. Kompeni ngelun duit pan bisi ga bejalaika pengawa pajak gadai taja pan terma sida enda sebaka. Baka nya terma enggau atur sida ngelun duit.
Pekara ti dibantai unggal gawa perintah tu ngagai Sada Sarawak nya ukai pasal sida kompeni nya belisin tauka enda. Utai ti deka dikenataika iya ngagai mensia mayuh nya pasal jalai sida ngechaj bunga enggau jalai mayar lun nya. Naka ti ditemu iya, chara chaj bunga sida ngelun nya nadai tentu jauh ari pangan diri.
“Kelimpah ari ngechaj bunga entara 10 ngagai 20 peratus genap bulan, kompeni ngelun nya mega nyimpan kad ATM enggau bup akaun gaji orang ti nginjau duit nya. Kebuah pia, sida deka nguna kad ATM nya kena ngambi gaji orang ngelun nya genap ujung bulan.
“Laban kad ATM gaji ti disimpan sida, kami menyanak endang nadai jalai bisi duit simpan laban duit nya nadai mayuh agi udah iya diputung utang sida. Ka tambah tu, enti enda chukup belanja kami majak deka nginjau duit baru nambah utang ti lama. Tu ngujungka utang betimbun lalu ngujungka nadai agi duit ka belanja bukai,” ku unggal nya ke bisi anak agi sekula empat iku enggau bini ti mina nyaga rumah aja sereta nadai penatai belanja.
Iya mesan ngagai bala mensia mayuh bukai awakka enda kena jerungkang penanggul ngelun tu.
“Enti nuan berutang RM5,000 ari kompeni nyali duit belisin nya, nuan deka mayar genap bulan RM500 genap bulan ungkup bunga 10 pesen tauka RM750 genap bulan enti bunga iya 15 pesen, lalu enti enda mayar pala iya, sampai parai pan lun nya enda abis bayar,” ku tudah lelaki nya sampai pelair ai mata laban sinu ngerunding diri empu balat merinsa tinggal utang.
Lalu enti nuan bisi ati deka ngerarika diri ari mayar lun nya, nadai jalai laban bala sida tukay nyali duit belisin nya endang ngena gangster nagih utang tauka ngiga enggau ngasu nuan baka ukui ngiga jelu siga, ku iya. Nya alai nadai jalai nuan ulih ngerarika diri. Kenu ku iya, sida nya mega enda bedulika nuan ba opis tauka sebarang alai endur enti sida ngiga nuan minta mayar utang.
Bisi indu siku ti gawa ba lab sains sebuah sekula sekonderi nyau abis ka luput laban ditagih bala raban apek bayat digaji tuke ngelun tegal tudah tuai nukar kad ATM iya lalu laun tauka enda mayar lun nya sebulan, ku lelaki nya madah.
Pengawa sida ti nyali duit sereta ngechaj bunga tinggi, nyimpan kad ATM orang siku-siku tu nadai dalam atur ngelun belisin. Tu sigi atur digaga sida empu kena nyaga diri ari kena tipu bala klien tauka ari rugi. Sida tu endang enda bedulika nuan merinsa enggau rugi besai. Bala sida tukay ngelun tu mina ngira untung sida empu aja, ku lelaki nya. Nya alai, manah agi bala bukai anang ngelun duit ari sida tu, ku iya.
Taja pia, mensia mayuh ti bisi penanggul suntuk sereta begunaka duit enggau lengkas sereta nadai jalai ulih ngelun ari bank, endang tusah bendar deka nyeliah diri ari jerungkang tajam tu.
Kebuah pia, sida senang bulih duit injau lalu enda ibuh nganti beminggu tauka bebulan peminta lun ari bank. Orang ngelun ari ahlong belisin tu lalu tekala nya bulih duit sereta nadai mayuh utai dipinta baka bank. Sida ahlong belisin nya mina begunaka slip gaji bulan, bup enggau kad ATM akaun bank enggau salin tingki (kad pengelala) nuan aja. Semua utai tu disimpan sida ambika jadi jamin nuan, ku lelaki nya madah.
Nyadi enti nunda atur tauka adat menua Malaysia tu, nadai orang tau ngembuan kad ATM enggau bup akaun bank orang bukai. Tu sigi pengawa ti salah lalu ulih diukum ngena tusun ukum tauka penal code menua tu. Tang taja pia, nadai orang berani ngeripot tu ngagai polis laban nangika diri digiga gangster digaji bala tukay kedai ngelun nya.
Lelaki nya madah, iya kala nguji nukar akaun bank gaji iya tang udah nya lalu digiga tukay ngelun ngena tiga iku gangster ti ngujungka iya enda ulih enda nyerahka kad ATM gaji ngagai sida nya. Iya mega madah tukay alai ngelun nya bisi ngaji sampai enam ngagai sepuluh iku nembiak ti diasuh iya ngambi gaji bala orang ngelun maya ujung bulan. Sida nya deka bejalai ba sebelah nengeri Kuching tu laban enda ulih berupai ngambi duit ba bank siti mai kad ATM kelalu mayuh takut ditemu bank tauka diperati polis. Genap iku sida bisi dibekalka tuke enggau talipaun binching sereta diberi kredit chukup kena sida bejaku sereta betanya ngagai pangan diri dini endur sida awakka nyamai begiga pangan.
Perintah sigi nemu pemerinsa bala rayat mayuh tegal kena tinggang penusah ngelun ari ahlong enggau sida tukay ngelun belisin.
Semua bala kitai patut sama bela nyaga pengelikun diri sebilik lalu anang sekali-kali kena tebak jerungkang tajam sida ahlong nya.
Apin lama ti udah, bala sida ari Opis Polis Nasat Penyalah Dagang tauka Commercial Crime Investigation Department (CCID) bisi nyapai pemujur sepengudah sida ti nangkap tiga iku bala orang nyali duit tegal dipelaba salah baru Akta Nyali Duit tauka Money Lenders Act 1951.
Oleh TELSA EMPERAN