![](https://utusansarawak.com.my/wp-content/uploads/2022/03/image-3-1024x876.png)
“KUNSIL biak nya nyuaka jari deka betabi enggau aku. Jari iya gegetar. Ku perening Tuan Kunsil biak nya. Iya nyau ukai mensia peda aku. Iya nyau baka enturun ke ulih panjuk aku peda aku. Jari iya ada aku tipas.
Sepenyampat kilat jari kanan aku sangkai ba tepisan kiba kunsil biak nya. Semetap mua iya ku tampar.
“Udah nya aku ensepi diri lalu ditangkap dua iku orang polis. Aku lalu dibai orang pansut ari bilik Tuan D.O ke luar. Orang di opis begau meda aku dipasung orang polis. Aku ngerijat tang pasung orang polis rat.
Orang polis nadai bejaku tang mai aku lalu nepu aku ngagai bilik mit siti ti nadai bejenila, nadai belampu. Bilik petang tegayam. Pintu tebal nya seme- gum ditikup lalu dikunchi.
Aku dia lama. Aku enda nemu maya hari tang dikira aku, selemai-lemai lalu semalam-malam aku udah dalam bilik petang. Utai nadai didinga tauka dipeda. Aku ngama-ngama utai ngiga endur ngalika diri.
Kira aku endang hari siti baru orang bisi ngabas aku. Lebuh pintu dibuka, baru aku nemu diri udah dalam bilik kurung besi. Bilik lukap. Asai ke dalam mimpi.
“Peda aku orang ke datai nya Ijah enggau kunsil. Ijah nyabak sikuk-sikuk enda ulih nagang diri. Kunsil bejalai jejunuk baka ukui ke nyau besirat iku,” ku aki Nadai nampung jerita iya.
“Apai, aku minta ampun. Aku mupuk enda madah. Apai anang agi ringat, apai. Kitai berunding. Aku ukai ngachau Ijah. Aku ukai beduan iya. Aku deka bebinika iya,” ku kunsil nya.
“Pui! Kunsil ngapa! Kunsil enda nemu adat! Nama Ijah nya, anak uduk, anak manuk? Kati iya nadai apai indai? Nadai bilik penaik? Nadai tikai, nadai balai, tak ditangkap nuan dibai rari belalai? Enti nuan orang mereti, orang manah ati, lapa nuan enda minta, enda nanya iya dih?” ku aki tuai nya.
“Aku takutka nuan apai. Nuan enda ngasuh ku Ijah tang kami dua mesti begulai,” ku Kunsil nya.
“Kati nuan bisi apai indai? Kada ka apai indai nuan ka ka kami orang babas tu? Kada enda dibuai nuan Ijah sebarang alai ila. Kada enda dileka nuan sengapa dia iy,” ku aki tuai nya.
“Enda aku baka nya apai, sumpah,” ku Kunsil nya.
“Lepaska aku ari tu. Bai aku betemu enggau Tuan D.O. Aku deka nyaman nuan nabanka anak dara aku,” ku aki tuai nya.
“Anang baka nya apai. Kitai tu deka nyadi diri sebilik. Ukai kitai ka nyadi munsuh. Enti nuan enda lembut ati apai, lama nuan ba lukap tu. Enti aku salah nabanka anak apai, nuan balat agi salah laban nuan nampar Tuan Kunsil maya iya gawa,” ku Kunsil nya.
“Tuan Kunsil baka nuan nya patut kena tampar,” ku aki tuai.
“Maya nya Tuan D.O enggau orang polis bisi datai. Sida tama lalu ngerandau aku” ku iya.
PILIH ENTARA DIJIL
TAUKA BEBAIK
“Kati dih apai? Nuan milih entara nuan dijil sebulan ditu tauka nuan deka bebaik? Enti nuan deka bebaik, nuan deka dilepaska,” ku Tuan D.O.
“Lama aku enda bemunyi. Ati aku runtuh. Isin. Aku teparuk. Enti dijil sebulan, sapa ngintu ini nuan? Sapa ngintu rumah?
“Nyau kelama baru aku setuju deka bebaik. Bedamai. Aku nye- liahka diri ari dijil tang aku nadai diberi peluang nagang Ijah. Ijah seduai Kunsil pan lalu dipenyadi tengah hari nya di Opis Tuan D.O.
“Aku dibai Ijah sama pulai lalu bemalam di rumah laki iya tang aku enggai. Aku milih pulai ke ulu lemai nya mega. Aku ngelaban malam. Hari jai enda ku peduli. Malam ku laban. Aku nadai lampu, nya alai aku bemalam di serantu ai. Nya mih kepenudi aku meda Ijah. Ku orang, Tuan Kunsil nya lalu dipindahka Tuan D.O ke Kuching. Aku pan nadai ninga berita Ijah agi. Ku aku, iya udah mati.
“Nya alai lebuh perintah ngasuh kitai pindah, aku endang enggai mati enggai idup pindah. Aku enggai meda menua Lubok Antu agi. Perintah nipu. Perintah ngasuh kitai merinsa. Orang seneka ati enggau bansa kitai. Ngelakar bansa kitai.
“Lebuh ke pindah ke Nanga Tekalung kitu, aku chukup merinsa. Ditu ukai baka ke bisi rumah,” ku aki Nadia nampung jerita iya.
“Aki, aku alit ati ka nuan ke jampat bendar ngaga rumah lalu nuan dapat ngaga rumah ke ngenegap tu taja nuan nyau udah tuai,” ku Nadia.
“Panjai cherita iya uchu. Rumah tu ukai digaga aku enggau tulang diri. Tu nasit diberi Petara. Aku benasit baka ke disebut jaku sempama, betuah bulih peredah enda ningkuh, untung nemu be- liung enda ngambuh. Lebuh kami dua ini nuan datai di Tekalung ditu, kami dua diau ba langkau orang di ujung tanju dia. Jam nya aku nyendiaka ramu semua mih dikena aku ngaga rumah deka nampung ari setak ili tu mih.
Apin mayuh ramu aku alai datai berita madahka rumah tu deka dijual.
Oleh JANTAN UMBAT