![](https://utusansarawak.com.my/wp-content/uploads/2022/07/image-92-1024x400.png)
Tusun Ke-7
NGIGA BAGI INDU KE PATUT
LEKAKA genteran jaku pasal Ibu Indai Rimbu ke ngembau Anak Temuai lalu nemu pemindah iya, tak enda ulih tesa ari nesa laja juing pematang, tak enda ulih tiap nunda niap singkap kerawai midang. Nya baru kelama-lama Anak Temuai udah datai lalu diau nyemilik sida Ibu Indai Rimbu, dia Ibu Indai Rimbu lalu pansut ke ruai bejaku enggau Aya Apai Rimbu, Setembul Tating Jala, Pengangkam Kaki Kubau, Tunggul Nugu Tengah Menua, Rekaya Raja Nyamai Diau, Orang ke di Batang Buluh Balau.
“Au dih orang tuai. Dalam aku tu ngenying berendam tusah ati. Sekumbang ke nengali sedang pemansang bulan pegari tu udah Anak Temuai ke datai di menua kitai di Batang Keranji Padi Ke Bebuah Rumbau Jadi Bintih Kesuie Kunchau Benang. Dini pan aku enda malu ke di lempedu kandang ati. Siku orang betemu enggau aku madahka aku ‘Indai Anak Temuai’. Siku orang ngumbai nuan ‘Apai Anak Temuai’. Nya ga orang dikumbai orang, ‘orang datai’, ‘orang sangkai’, nya alai nadai mih nya apai indai enggau segulai saum serawang. Nya ke dikumbai orang nadai apai digelar anak ampang,” ku jaku Ibu Indai Rimbu nganu Aya Apai Rimbu.
Nya alai tak ngenung tudah Aya Apai Rimbu baka ubung masak kerebang. Tak lama ngetu iya baka kutu lubuk balu beranak seorang.
“Au orang tuai. Aku nadai ngeluluka kebuah nuan kitu. Nadai jaku dih aku orang tuai tang aku nadai nemu ngagaka dama,” ku Aya Apai Rimbu.
Ninga Aya Apai Rimbu munyi nya, tak lalu angkat Ibu Indai Rimbu lalu bejalai ke punggai puting setak pemayam punggang. Iya lalu bejalai belubah-lubah niti temetung arung rumah munyi ke nunggah Raja Dagang. Nya alai datai iya di bilik Endu Tebalu Indai Kampung, Endu Terekup Dundun Nutung, iya ngebakka pintu ke belagu gambar orang. Dia iya meda Tebalu Indai Kampung benung duduk dugau-dugau muntang tengkebang kumbu muau ke bebuah berandau ngambi sintau kemarau langkang. Iya duduk ngentam di luan bilik benung nyulam jadam nengkebang ampang berinjan ke bebuah ngambi tandan bulan menyimbang. Tak malik iya besabung tentang.
“Lalu ibu, lalu,” ku Endu Tebalu Indai Kampung.
“Enda pan nuan ngasuh aku lalu, aku endang ka lalu. Ka betemu enggau nuan ke lempedu kandang lempuang,” ku jaku Ibu Indai Rimbu.
Dia seduai iya lalu beempaka pinang puda kunyah di ginya lua di rampang, bepakaika pinang tuai asai ke makai kamai sempidan arang. Nya baru Indai Terekup Dundun Nutung, Tebalu Indai Kampung lalu nanya pejalai Ibu Indai Rimbu.
“Au dih ibu, nama dih chap, ibu, surat kirum Raja? Nama dih ukum, aum pechara? Nama dih abar, putar berita? Nama kebuah nuan ibu bisi utai ditusah, dipadah apa kereja?”
“Au Endu. Empai aku tu menjuai lengki, empai aku tu kumbai nadai, iya ga bisi. Sekumbang randang bulan mingkai, ati aku Endu, tak beraie enda nyamai betemu enggau kitai sekayu peregah rumah panjai, selalu dikangauka orang enggau tempalau dabung jurai, kena sapa nyawa ngumbai. Orang ngumbai aku ‘Indai Anak Temuai’, orang ke datai di peretai rumah panjang.
“Sekumbang randang bulan perenama, dih Endu, aku tak irau di atau kandang dada, dikangau orang enggau sentalau dabung seleka, selalu dikumbai orang ‘Indai Anak Temuai’ nuntung penyurai rumah raya. Tak siku pan orang nadai ga nemu nama iya. Nya ke dikumbai orang mensia anak ampang. Dia dih aku tak kusut di perut kandang dada. Nya alai, aku ngasuh nuan ngagaka iya nama ke nyengala didinga orang,” ku Ibu Indai Rimbu.
“Au dih kau ibu, Nemu ga aku nama anak nuan ibu tang enti nuan enda ngasuh aku ngaga, aku enggai. Dini aku bisi telebihka nuan ke empu anak,” kenu ku jaku Tebalu Indai Kampung, Indai Terekup Dundun Nutung, nya orang ke tau tilit di burit kendi aji, orang ke tau meda di tapa dada jari, orang ke endang pantun imun mereti ati.
“Anang ga nuan munyi nya, Endu. Aku tu tak beli lansang kedubang, lap nimbun penyai orang. Lantang aku datai, enda ga aku nemu dama ayan mensia tentang dikumbai orang.” ku jaku Ibu Indai Rimbu.
“Au dih ibu, enti nuan ngasuh aku ngagaka nama, anak nuan nya ibu, nya alai iya nya Sugi Ke Berani Ati Agi Mit, Pedang Panjang Sintak Sandang Mali Salah Selit, Kerakaya mih nya dih ibu, Sapit Laja ke Sama Tau Tilit, Mayuh Gundit Seribu Rambang. Nya mih Kiai dih ibu, Sakai Pemanggai Lintang, Datu Au mih nya ibu Pemadu Dama Mansang, Rekaya Ria dih nya kau ibu, orang ke mangkang Nanga Temaga Gelang,” ku Tebalu Indai Kampung.
Nya alai beguai-guai dih Ibu Indai Rimbu pulai ngagai Aya Apai Rimbu, tak lalu nyebut nama ke munyi nya. Tak ketawa mih Aya Apai Rimbu nelengaka rasa dabung jerantang. Ketawa tuchum iya baka ke ngulum gendum pinang belubang. Tak ketawa rakah-rakah mih Aya Apai Rimbu ke di dilah pun rang.
“Oh, nya dih nama selantang tua dih orang tuai,” ku Aya Apai Rimbu.
ANAK TEMUAI DIBERI NAMA BUJANG SUGI
Nya alai badu Ibu Indai Rimbu ke bejaku enggau Aya Apai Rimbu, mayuh kelulu nyampau dikenang, Ibu Indai Rimbu pan mupuk bejalai ngagai lantang ke memekang anak kemilai iya di panggau tengah ruai ke gegelai nadai nenjang. Iya lalu niki ngagai berangin tinggi Anak Temuai kediri seorang-orang. Dia iya lalu bejaku enggau timpu dabung jarang.
“Au dih kau Dum, au gayu. Au dih lantang buah timang anak iru aku. Aku tu ga Dum bisi abar putar berita. Aku bisi kebuah panggung kereja. Aku tu ga Dum ka ngaga nama nuan gayu wai,” ku Ibu Indai Rimbu.
“Au dih kau indai, enti nuan nemu ngaga nama, nya lebih manah kau indai,” ku saut Anak Temuai.
“Au dih Dum, tu mih nama nuan lantang. Sugi mih nuan Dum ti Berani Ati Agi Mit, Pedang Jungkang Sintak Sandang Mali Salah Selit, Kerakaya Sapit Laja Keredika Tau Tilit, Mayuh Gundit Seribu Rambang,” ku Indai Rimbu.
“Au indai ke mengandai tangkai menimang. Naka penau nuan indai ngagaka nama lantang anak ambu enggau timpu dabung jarang. Naka mih pemandai nuan indai, ngagaka nama lantang anak andai enggau begulai saum serawang,” ku Anak Temuai mayuh kelulu nyampau dikenang.
Ibu Indai Rimbu lalu pulai ke bilik dalam ruang. Anak Temuai pan nyau udah bisi nama, nya alai nadai mih Ibu Indai Rimbu agi dikumbai orang ‘Indai Anak Temuai’. Anak Temuai nyau dikangau orang Bujang Sugi di sekayu peretang rumah lelanji sida iya dia ke begamal sigi degi-degi nyentuk ke hari gentilang baruh remang.
Sepengelama ke udah datai lalu diau dia, Bujang Sugi pan nadai ngetu ngayap pengawa nguang. Iya ke bendar, apin ke digagaka nama udah mih iya ngayap ngagai Semanjan. Semakin dirara sida berada, ngasuh Sugi ngereja. Semakin ditagang sida mengua tangkai menimang, ngasuh iya mansang.
Nya alai tak nyau enda liat ati Ibu Indai Rimbu, bejalai ga iya baru lalu berandau enggau Aya Apai Rimbu.
“Au dih orang tuai. Lama ga lantang udah datai di menua kitai sebulan nandan di langit, setaun nampun di bukit, lalu udah diau ditu. Nama pan nyau udah digagaka tua didinga bala orang. Entang iya dih orang tuai tau ngemalu tua di lempedu kandang lempuang, tau ngasuh kitai jai baruh lenggi bulan mansang. Uji gigaka bini mih lantang tua Sugi ngambika bisi enggau iya serasi betambak singkang. Uji gigaka enggau begulai dih iya nya orang tuai awakka bisi enggau iya begulai sejalai nyurung mansang,” ku Ibu Indai Rimbu.
“Nya sebarang ku nuan,” ku jaku Aya Apai Rimbu.
INDAI RIMBU NGASUH SUGI MILIH INDU
Nya alai Ibu Indai Rimbu lalu niki ngagai Sugi.
“Au dih Dum, aku tu nadai mayuh berita dih gayu lantang anak aku. Au dih kau Dum, lama ga nuan dih Dum, udah datai di menua kami. Nyau setaun nampun di punggang, nyau sebulan nandan terang, dih kau lantang, kitai ke udah begulai saum serawang, kitai udah sebilik sama seruang. Nya alai, aku tu Dum, ka ngaduka gandar mata berayang, ka ngiga sukung bandung tiang. Aku ka nanya bini ke nuan dih lantang aku Sugi ngambika bisi enggau nuan sekaki betambak singkang. Aku ka ngiga orang enggau nuan begulai dih lantang anak wai ngambika bisi ngandai kami dua apai nuan penyamai pengering tulang,” ku Ibu Indai Rimbu.
“Au indai. Nya ke manah mih kau dih indai ke endang adat kitai mayuh ngiga tubuh ngambika mansang. Nya alai sapa dih nama orang digiga nuan indai enggau aku ke sama dalam ruang?” ku Bujang Sugi.
“Au mih kau Dum, kati ka nuan ka Endu Tabu Benang Tusut, Endu Dayang Ketupang Bunga Rumput, Dara Pandai ke Bejalai Nyingkang Surut, nya ga Bunsu Untup Ular Belalang?”
“Au kau indai, nya enggai aku indai. Apin ga nya teadingka kemping piring letup penangkup bunga lepang. Apin tau beentudi kaki aku bebadi rugi luput enggau orang ke Rumput Janggut Undang,” ku Bujang Sugi
“Au dih Dum, Kati dih Endu Kumang Ke Terantang Gendang Nanyi, Endu Kandung Nibung Bateri, Endu Tangkai Murai Unyi, nya ga Bunsu Genali berumah di Bebuli Ai Nyadi Numbuk Nerajang?” ku Indai Rimbu nanya baru.
“Nya pan enggai ga aku indai. Apin ga nya teadingka indu kemping piring sunti nyadi tanchang orang enggau gelagi benang gudang. Apin teuluka nyawa aku besapa laya lesi enggau orang keTisi Lindung Tiang,” ku saut Bujang Sugi.
“Au dih Dum, kati dih Dum enti Endu Yak Lantak Peti Peduman, Endu Lulung Terupung Ayam Tangan, Dara Pandai Ke Memandai Panjai Telian, Endu Dara Kumang, Tubuh Jekang ke Bedindang Jauh Malam? Nya Bunsu Sedan Bulan Menyimbang?” ku Indai Rimbu nanya baru.
“Nya pan enggai mih aku indai. Pandai amat pandai nya ke di chunggai jari kanan, manah amat manah nya ke ditelah kaban Iban, entang ga aku enggai. Apin ga nya teadingka aku anak kemping piring penganan ke bepakan bepakau jarang. Nya apin teuluka nyawa aku bekata laya danjan enggau orang ke Melaban Bekulit Mipau Umbang.
“Au dih kau indai, kati kunchit di tisi langit dih indai ditunu entang rusa di kaki tangga enda diemparu? Diri serumah pan indai, enti bisi manah, tau mih ambi nuan ke menantu,” ku selepak Bujang Sugi.
Ibu Indai Rimbu enggai nyaut Sugi tang majak nanya.
“Au dih kau Dum, kati mih Endu Dara Tinggi ke Bengeli Mata Delima, Endu Dara Biak, Dara Jekang Ke Jerantang Panau Dada, Endu Lulung Terupung Ayam Raja? Nya dih Dum, Bunsu Petakang Bintang Tiga, begamal remba-remba. Nya ke teladan Anak Iban Bansa Mensia, orang ke ngelabuhka sempuli padi puya ngambika tak rata kedil madang,” ku tanya indai iya.
“Oh, nya pan enggai ga aku indai. Pandai amat ga nya pandai ke di chunggai tunjuk dua, landik amat landik nya indai di chemurik leka mata, entang ga aku enggai. Apin nya teadingka aku ngena kemping piring penganan jala baka penama mansang. Apin nya tau tunda udi aku tu bebadi rugi laya, enggau orang ke menua Buara Rumpang.”
“Au dih Dum. Langit mih Dum tak abis ku lilit sabung gelang. Tanah tak udah ku tengah tujah magang. Indu abis kena aku kelulu nyampau dikenang tang siku pan nadai ga dikedekaka nuan gayu, bejaku enggau mengua karung menimang?
“Kati dih, enti Endu Umbak Kebul Bebuli, Endu Puchung Ke Begantung Nengan Hari, Endu Kumang Ti dih Lantang Betubuh Terang Penukang Lawang Pintu Jereki, Tangga Hari Baruh Gumi Dunya Belinggang? Nya ga lantang Sentukan Buban Endu Sedinang Pemalan Tiang Chandi, Lantang Seunggum-unggum Tungku Besi Panduk Ranggang Sekali Nyundang Nyurung Alam Sehari,” ku Ibu Indai Rimbu.
Ninga munyi nya, lalu tuchum dih Bujang Sugi malik ke bukai. Ketawa dih Sugi enda nunga indai, nelengaka rasa dabung jerantang.
“Au dih kau indai. Naka ga pemandai nuan dih indai, nunda nuan ke negika menyeti bali belulai pantak kechendai teberurai mau magang. Naka ga penau nuan dih indai ngadingka terinting dabung labu ngiga dara bala indu, deka enggau Datu Au enggi nuan ke pemadu pama mansang begulai, nunda nuan ke nyelaku punggang ampang kumbu bebuah mansau radu ngambi langgu ketunsung ngembang,” ku Bujang Sugi.
Nya baru pulai Ibu Indai Rimbu ke bilik dalam ruang lalu bejaku enggau Aya Apai Rimbu.
“Au dih orang tuai. Naka ga pemayuh indu ditanya aku orang tuai nunda nesa laja juing pematang. Semua belayan kaban dara ditanya aku semua magang-magang. Entang siku dikedekaka iya orang tuai. Lantang anak menyadi nuan Endu Dara Sedinang,” ku Indai Rimbu madahka Aapi Rimbu.
Oleh JANTAN UMBAT