![](https://utusansarawak.com.my/wp-content/uploads/2022/10/Caption-3-1024x768.jpg)
BAKA tu meh tanju rumah endur Wat Bujang Sugi terengkah lebuh iya terejun ari Menalan Apai Sabit Bekait
maya dini hari.
Tusun Ke-16
SUGI DIBAI BUNDAN MENGAP
“Nya alai kitai udah bebela. Kitai lalu beati mengap ngentakka mengkalat buluh lalang. Nuan enggau kami mengap, unggal. Jangka kami nuan tu endang lemambang,” ku Bundan bejaku enggau Sugi. Nyadi Bundan tu orang ke berumah di Sentangan Langit Renjan, Baruh Penyawan Pintu Ujan Ke Nelian Labuh Sayang. Iya tu endang Bundan ke udah dibunuh Sugi dulu ari nya tang diidupka Sugi baru. Taja pia, iya enda ngelala Sugi. Iya ke bendar, siku pan orang dia nadai nemu nya Sugi.
“Aku tu ukai lemambang tang enti kita mai, ka ga aku unggal,” kemah ku jaku Sugi laki Sedinang.
Udah perengka ke mayuh dibilang chukup disendiaka orang lalu adat ke dikena sida mengap semalam-malam nyentukka ke siang pan udah diberi orang, dia orang pan belabuh mengap, Bundan matak jalai lalu Sugi diasuh iya nyaut. Jubang nangkap kelembung. Bala bukai mayuh ga enggau. Dia Sugi ninga leka pengap sida Bundan tak naka penyelai.
“Nya alai lunyung dua kali lunyung,
Ke mengkabung puchuk raba,
Kini ke pandung kitai tu chundung?
Tentu tu ninggang perabung rumah sida Laja,” ku leka pengap Bundan.
Sugi pan lalu nyaut.
“Aie, lunyung dua kali lunyung,
Tu mengkabung puchuk empit,
Kini ke pandung kitai tu chundung?
Tentu tu ninggang perabung rumah Apai Sabit Bekait,” ku saut Sugi.
“Oh, salah leka pengap nuan nya unggal. Dini ka nyadi ninggang menua kitai empu,” ku Bundan.
Nya alai agi ga Bundan mengap baru.
“Nya alai kedua kali iya nyebut lekamain,
Lunyung dua kali lunyung mengkabung puchuk manding,
Kini pandung kitai tu chundung, nuju perabung rumah Keling”.
Baka nya ku leka pengap, nya baru betul,” ku Bundan.
“Nya mih unggal, aku nyaut,” ku Sugi.
“Lunyung dua kali lunyung mengkabung puchuk mumban, kini pandung kitai tu chundung, nuju perabung rumah Bundan,” ku leka pengap Sugi.
“Oh, salah leka pengap nya. Mabuk nuan tu unggal,” pia ku jaku sida Apai Sabit Bekait lalu ngangauka lantang iya Endu Lanchung Selung Bebelit, Endu Kerakau Keban Ulit. Nya ga Bunsu Apai Sabit Bekait, Orang ke berumah di Jerit Langit Mandang.
“Au dih Endu, bai pulai unggal nuan Endu. Intu manah-manah diau di sadau ke di panggau papan pantang; enggaika iya mabuk, enggaika iya mutah lalu telentang,” ku Apai Sabit Bekait.
SUGI BETEMU ENGGAU BUNSU SABIT BEKAIT
Dia orang mayuh, orang banyak, tak majak mengap. Sida bejalai nuju tengah rumah puting setak ngemayam punggang. Sugi lalu niki ngagai panggau Bunsu Sabit Bekait, Lanchung Selung Bebelit ke lalu malik ngagai iya.
“Au dih Sugi. Tu baru kami danjan nengali bulan. Tu baru kami lesi nengali hari. Parai mih kami tu nengali lantai laban nuan tu endang Sugi Ke Berani Agi Mit, Pedang Panjang Sintak Sandang Mali Salah Selit. Nuan tu ga Sugi laki Sedinang,” ku Bunsu Sabit Bekait, Endu Kerakau Keban Ulit. Semina iya aja ke ngelala Sugi, udah diajihka Sugi.
“Enti aku tu munsuh sabuh menua, enti aku nyerang numbangka bala, uji nuan ke ruai adi ambai, madahka sida apai nuan. Padahka aku tu munsuh enchabuh ngachau menua,” ku Sugi nganu Bunsu Sabit Bekait ke lalu nurun ke baruh. Iya tak tenjik-tenjik bediri di mua pintu; tak enda tau bejaku kelulu nyampau didinga. Dia dih malik mengandai tangkai berada.
“Kini ke nuan pansut dih Endu wai? Nuan tu jegit lansang kedubang. Nuan tu beli nimbun penyai orang. Kitai tu begawai, lapa nuan tak pansut ke ruai ditentang bala pengabang?” ku Apai Sabit Bekait.
Tak pulai dih tudah iya ke sadau baru. Iya lalu bejaku enggau Sugi sekali agi madahka diri mati.
“Kati nuan tadi enda madah ngagai sida karung tangkai mengandai, ngagai tubuh bala besai, orang ke begawai ngidang pengabang?” ku tanya Sugi.
Bunsu Sabit Bekait tak enda nyaut Sugi. Dia Sugi enda ga beati ka munuh Bunsu Sabit Bekait. Tak sinu ga ati Sugi di lempuang kandang dada. Sinu ga iya di leku perut indu tangkai perut raya ninga Bunsu Sabit Bekait, nya ga endang lantang anak sendia enggi Apai Sabit Bekait.
SUGI MADAHKA DIRI MUNSUH
Sugi pan lalu nurun ke baruh. Dia iya lalu ngebuka bedaru pintu bandir senaga madahka diri munsuh ke sabuh munuh mensia; madahka diri ngayau mulau bala. Tak manjung mih iya kaung-kaung munyi ke masuk kebung langit raya baruh penama bulan mansang.
Dia orang ke ngelaban Sugi tak begau sekayu rumah panjai. Peda munsuh nempuh baru datai di penyurai rumah panjang. Dia orang lalu bepantap ngijap bubu, betumbuk belabuh ngentum alu, bepantap randang rasau, betumbuk munyi ngentung papan timbau. Dia Sugi tak kediri-diri seorang-orang.
Bala munsuh nyau bebalutka Sugi magang-magang. Dia tak biau Sugi ke kanan baka reban nganti nunu. Biau iya ke kiba baka rampa Nanga Paku. Biau iya ke mua, peda semua mati lalu.
Dia dih munsuh nyau jarang baka lantai para penyalai leka rian. Tak nyau jarang-jarang bala sida Apai Sabit Bekait baka padi nawang belayan. Semua sida ke agi beguna nyau rari magang-magang. Siku pan nadai ga orang agi ngenan. Semina pala enggau bukang ke nyau besundang luntang. Semua sida ke mabuk mati telentang. Semina lantang Apai Sabit Bekait endang tak nadai dianu Sugi.
SUGI MULAIKA DIRI ARI LANGIT
Dia Sugi pan nyau betati ka pulai. Iya lalu nurun nengah tangga ambun ke besebun belayar midang lalu nepan di tangga ujan ke nelian labuh sayang. Iya tak lalu terengkah di tanju sida Endu Dara Sedinang. Hari maya nya urung manuk mengkukuk dini hari. Sugi ke merejuk ke langit nya ba pun lemai kemari.
Datai di baruh, Sugi lalu duduk dugau-dugau napatka panggau papan pantang, napatka balai seduai iya Sentalau ke Rerangau Inggar Panjung, Wat Igat Keretachat Pangkung Kerumung. Hari pan nyau tawas teberingkas siang. Babi nyau bemunyi nelentangka dulang. Manuk nyau bekerauk mengkukuk ngenjun gelanggang. Dia sida indai bujang besai ke rerengai nimang lantang. Dinga gempung labu sida sekayu batang betung landu bala indu munyi deru guntur betinggang. Hari nyau udah tawas teringkas siang. Sedinang pansut ke ruai lalu rengangai ngangau makai.
“Makai, dih ambai, makai. Makai dih laki aku Sugi ke dendam dalam ati,” ku jaku Endu Dara Sedinang. Iya agi bedau sinu di leku kandang lempuang. Tak benung ngenang mengandai tangkai menimang iya.
“Au Sedinang wai. Oh, tak enda rajin aku tu makai ngisi kamai tandan lempuang kau Endu Sedinang. Uji nuan pansut dulu ke tanju Sedinang masai alai jugu lang beparang,” ku Sugi. Dia Sedinang tak bejalai betunda-udi sekaki nyurung mansang enggau Sugi.
Lebuh datai di tanju, Sugi pan lalu muka temilah buluh lalang. Iya mansutka Sentukan Buban, Apai Sedinang enggau Indai Sedinang. Sedinang nguing lalu malik panggung nentang. Iya balat tekenyit panggung tegepang.
“Kemaya seduai pulai dih mengandai tangkai menimang?” ku tanya Sedinang.
“Au dih Endu anak lantang. Nyauka mati kami dua beradi tangkai menimang nuan. Nyauka parai nyenggai lemai enggau orang ke Sungai Mantai Dagang tang kami dua seninjik diambi Sugi laki nuan, Endu Sedinang,” kemah ku jaku mengandai tangkai menimang.
Dia Sedinang lalu nyabak ke di awak pelangka dada sinu ninga jaku leka serebana enggi memangku tangkai berada. Tak angkat Sedinang lalu merap Sugi, malik ke bukai lalu merap apai enggau indai iya ke baru datai nyerimbai tawas siang. Dia orang lalu begau magang-magang.
“Kemaya nuan ngayau dih Sugi mulau mansang nyerang? Kemaya tinda nuan ke mai bala ngerumpang liba kuta penjuang?” ku Sedinang.
“Au dih Sedinang. Ukai seduai iya diambi aku Sedinang. Seduai iya ga diambi laki nuan Bujang Paku Lawang,” ku Sugi.
Dia Sedinang tak lalu enda nyaut. “Au dih Sugi. Nuan tak enda badu-badu ka beduan ngayahka orang,” ku Sedinang.
Nyau keleju tudah Sentukan Buban ke dia, iya tak nyau napatka panggau iya begurau tuntun berang. Iya lalu duduk dungu-dungu baka batu galang melintang. Iya lalu duduk besila nyalai begundai balang begumba ke bemata malik nentang. Indai Sedinang pan lalu pulai ke bilik dalam ngeruang.
Lekaka genteran jaku nya, enda ulih tesa baka nesa laja juing pematang, enda ulih tiap baka niap singkap engkerawai midang. Udah Sugi ke datai dia, agi ga Bujang Paku Lawang mai Sugi bepekit pengering tulang. Sedinang pan bejaku lalu nagang.
“Enggai aku ditagang nuan Sedinang. Aku tu ga anak lelaki ke berani mutus garang,” ku Sugi.
PEKIT NEBANG KAYU
Bujang Paku Lawang mai Sugi ngambi kayu. Nya alai ka ga Sugi laki Sedinang. Bujang Paku Lawang pan lalu nebang mengilas sekayu pemanah iya, mesai gantang. Kayu nya dilumpung Bujang Paku Lawang semilan luntang lalu diempaska iya di menalan tanah nyapan tinggang ruman padi bangang.
Sugi nurun ari rumah lalu nebang sebatang tapang ke tumbuh di seberai ai masai alai mandi sekali nyungga undang. San Sugi batang tapang enggau dan-dan nabanka renyuan madu midang niti sentali jalai ulang. Dia orang tak begau sekayu rumah panjai sehari tajai terebai burung terebang. Sugi mansa Bujang Paku Lawang ke benung ngetak mengilas di tengah menalan.
Dia dih indu singut tak lalu malut tudah Bujang Paku Lawang. Bujang Paku Lawang rari ngagai peregah rumah panjang. Dia dih medung iya nyau begantung kibung tinggi begitang. Peda mua enggi iya tak selampur sup, mata iya nadai ngelala meda orang. Dia Sugi lalu bejaku enggau singut enda ngasuh sida agi malut Bujang Paku Lawang.
Peda dan batang tapang enggi Sugi tak nyau nadai agi betipan mengkang, muti batang agi meruan. Diengkah Sugi manah-manah di peregah rumah nyementang. Peda tak udah meruan sepintu selumpung tak udah sedia magang-magang; tak udah dibelah nadai belampang. Orang sekayu rumah panjai nya, tak semina ngangkut untung diri empu laban kayu ke diambi Sugi nya nadai ngemayuh nya utai bisi ke disalai awakka rangkai lama nyanggang. Tudah Bujang Paku Lawang tak bedau tabin dibalut singut pansut ari sukut dan tapang.
Oleh JANTAN UMBAT