JAKU IBAN: Sada Bebuah

NGAGAI orang indu enti udah sayau ke lelaki nya udah tentu bisi niat deka jadi melaki bini.

Tusun Ke-29

BA ruang JAKU IBAN: Sada Bebuah dalam Tusun Ke-29 tu pemacha mayuh deka dinahka enggau segenteran sada bebuah ti dikumbai “Penyabar Meruan Aris”.  Sada bebuah tu alai penulis ngadingka pengusang ati bujang biak siku ketegal semaya balang antara iya enggau ambai iya. Semaya seduai udah chukup rat, jauh rat agi ari pakap kara kijang. Ketegal danji ti udah rat mati deka sekunsi jadi seruang. Tang mih semaya, pia mega danji enggi seduai, nadai dikeamatka ambai pekedam dalam iya. Taja pia, orang bujang nya meruan bisi pengarap semaya tau nyadi nyata, danji tau pegari nyadi, datai ke iya suah dilabuhka jeda. Kepuas-puas iya ke nganti jaku pemutus ti mai jadi ari orang dara, dia ati iya belabuh nyida. Ku iya, enti ambai iya tau bebali nyadi ikan betutu, nanya iya ngelalin bubu dikena iya ngulih. Enti ambai iya nya nemu bebali nyadi ikan juara, nanya iya bedaya nyanggit jala dikena iya nyala ambai iya nya. Lalu pia mega, enti ambai iya nemu bebali nyadi ikan adung, iya betati deka nginti ambai iya nya enggau ginti gelung, ruit betikung, enggai mega iya enda jadi. Kelimpah ari nya, ketegal ati iya udah chukup keras deka jadi enggau ambai iya nya, enti nyema ambai iya nya diambi pemesai ke bepangkat tuan, iya sanggup nyara lelaki nya. Iya mega sanggup ngerampas ambai iya nya ari jari pemesai nya. Enti nyema tindak diri enda betul, tauka salah ba tisi undang-undang, iya nadai bedulika diri ditangkap sap, dipecharaka ba mua Sultan, sekalika ditepu ke dalam rumah jil.

Kelama iga kebangai utai dia ati enggi orang bujang nya nyau makin chelap-sechelap laban batak runding ke nyau nemu nimuh pengeran enggau pengusng diri-empu, laban iya nyau terundingka penanggul enggau penekul enti pengeras ati diri nya dipajakka iya. Ari nya, ninga penemu ambai iya nyau udah asur-batak, nyau udah bebulaka danji diri, ngembuan ati hari, besikap selipi, dia orang bujang nya nyau nyurutka diri, matak diri; biar kaul chinta iya enggau ambai iya nya dikemaduka tikas nya aja, lalu semaya enggau danji ke deka selua seempa, setikai sebalai semina diambi nyadika sejarah aja. Nya alai rumbau mih semaya seduai baka sibau saruk ruku; puntan baka jelan jalai chemaru; labah baka buah mumban batu; upang baka ketupang embawang balu.

PENYABAR MERUAN ARIS.

Dini dih gundah aku enda telih bedarah, tusah berendam,

Lempuang aku enda bimbang, kusang dalam

Ati enda beraie, sinu sesedan

Besak di luak, sendat di penyan;

Lebuh aku ninga langit bedidit, guntur beguntam,

Kilat bekijap nyelambai malam,

Ribut bepuput, kaya besimpan,

Barat berembat ujan nelian,

Ga aku ngumbai nya waya tali karan

Enggi uman nuan perembam dalam,

Nganjung pesan, ngenataika salam, ngamatka semaya;

Nemu nya jeda separai anak buntak ruman

Maya gasan iya belalai beteruan,

Enselit di perugan pumpun kemelang.

Dini ati aku enda beraie sedan lelisa,

Nyabak sesidak, meraya senaka iya,

Lempuang aku enda bimbang, nyawa ka bekata,

Lisak di luak, ngarungka dada;

Lebuh aku ninga ujan tak perebenyan, labuh nyaya

Meda kilat tak bekijap nyelar dunya,

Remang tak tetukang, miga besapa

Ninga ribut tak bepuput, angin reraga,

Barat tak berembat, kaya gila;

Ga aku nyangka nya nyawa radio

Enggi sida Thomas Tegong Laka,

Nganjung serebana,

Ngenataika kabar berita, chinta merana,

Ari nuan dih pekedam dalam, peraja mata;

Nemu nya genera keparat chelaka anak buntak lisa,

Nyayat belula, belila saya,

Nebah nyawa lagu dindang.

Dini alai aku enda tak tepesenan dalam, ngarungka rekung

Gundah tusah, beradung begantung burung;

Kusang di lempuang kandang babung,

Nyaya dih ai mata neladan leka ambun beletung;

Lebuh aku meda kilat

Bepijar bekijap nyelandung bungkung,

Ribut siut bepuput, besabung tinung,

Ujan nerusan labuh ngerunung,

Barat berembat, kaya besabung;

Ga aku melaba nya sms anjung, emel betampung

Ari nuan dih pebayu sulu aku, ambai sangkung,

Ngamatka leka semaya, jaku besenuntung;

Enda nemu nya tak jeda

Jara bujang lempung tekuyung bundung

Nyuraka nyawa, nebah kana, ngangauka renung

Nyindir kumang mekang gerama engkabang.

Tang enda aku ka upang

Baka ketupang embawang balu;

Rumbau baka kembayau saruk isu;

Labah baka buah merunjau ulu;

Puntan baka terikan sumbu lampu.

Ila aku ngambi bila perin teda Bantin seduai Libu,

Gaga aku ke ensenga,

Kelalin aku ke bubu

Ku tan di Nanga Krian,

Tampun tagan di Nanga Bintulu,

Tenchangka aku jabang,

Umpan enggau buah panggu.

Lebuh gasan nuan ibu uman

Udah jadi gemian ikan betutu,

Undur nuan ila geguchur niti panchur, arus laju

Terunda-runda tama entaya, bubu aku,

Enti nyema nuan lepas rari beruntu,

Ngelidas nikal kulu,

Ila asai nuan ngedu ngetu,

Enselit di perigu agang batang.

Tang enda aku upang

Baka ketupang embawang lanja;

Rumbau baka sibau saruk raba;

Puntan baka jelan jelu nyala;

Labuh baka buah merunjau kerapa.

Ila mih aku meli ungki ragi benang setera,

Disanggit aku pisit-pisit,

Gaga aku ke jala panjai tiga.

Ila lebuh gasan nuan

Dih perembam dalam, sulu mata,

Udah nyadi gemian ikan juara,

Ku tikauka pelabau berau

Gulai sekau seku China;

Ku tibarka di senggal Layar Rinda,

Saribas luas, radas nanga.

Nya baru nuan tasah,

Bependiau gila kapa-kapa,

Abis daya, ujung-ujung ngentung

Di bumbung jala tengang.

Enti nyema nuan lepas ngebo,

Ngereduan gelidas rari bekerancha,

Ila asai nuan busung papa,

Nyingap di mata selambau jarang.

Tak enggai amai ati tu dibai upang

Baka ketupang embawang kachung;

Balang baka serang niang Ajung;

Rumbau baka kebuau saruk uchung;

Labah baka buah merunjau kampung;

Puntan baka menasan jelan remaung;

Ila mih aku meli gemiri dawai selung,

Ku bantil ke kail ginti gelung, ruit betikung.

Ila lebuh uman nuan dih ibu gasan,

Perembam dalam, sulu sangkung,

Udah nyadi jeliu betutu ikan adung,

Aku tan rendam di beruan Nanga Sadong,

Silak awak Batang Rajang Lepung,

Beumpanka lintan lelipan, perut tuntung;

Enda nuan bekian, nadai nuan betinung

Nangkap nanggung ginti selung

Di benung ulak leletang.

Nyemaka ginti nya rabut, ruit tekelechut,

Nuan tak surut enchunung, rari mengkanjung;

Ila asai nuan dih gelai ibu medung tulah busung,

Tepekul di tikung pukat sebidang.

Tang ukai semuti naka nya dih liba ibu gasan,

Laban ati kami orang laki tu

Udu udah terunti ransing kidan;

Semaya udah enda dipeguna,

Danji enda dikemeran.

Enti nyema pengempu nuan ila

Orang kubu pangkat tuan,

Mai aku bechara di mua court Sultan,

Nadai pan aku riput takut ngelaban,

Sigi aku guyang tiang,

Pandam aku mija papan;

Enti jil ku Kunsil, tutup tan ku Tuan,

Enda mih aku ngeleput takut rawan;

Enti gelang ku Abang,

Aku enda nyakang kiruh ngelaban;

Enti sipat ku Sap,

Aku enda nyilat nyaga badan.

Aku sigi nyadang diri digayang,

Bukang aku direndam,

Sigi enda mih aku nyalamka diri keran

Deka ngembuan serantai peredik marik merejan,

Belulin agin tinchin intan,

Belapikka jadam mau setekang!

Semakin mayuh pekara ti nekul,

Mai ati besimpang-siur,

Tusut bejarut, besimpul-simpul;

Pendiau nuan tengelam timbul,

Jaku nuan batak asur,

Mayuh pemula, mimit pemetul.

Nuan betebiat ikan di ai,

Makai umpan, nyeliahka ginti;

Nuan ngembuan ati hari,

Sebarang maya tau bebali;

Nuan pemutut ati ribut,

Sebarang maya bebali kudi.

Bepangan enggau nuan ngemedis diri,

Nuan besikap aum selipi.

Sebedau rita tua jai,

Manah aku berunyut nyurutka diri,

Surut ngundang rangkang,

Undur ke belakang;

Badu bepeda, badu beundang,

Jelekah empelita, mulut pemula jadika kenang!

BETAMPUNG