MARUDI: Ketegal riput penyakit Covid-19 nyau ngenyit betambah ba Pelilih Marudi, mayuh amat premis endur bedaja ditutup.
Ari asil pengawa merati ke udah digaga Utusan Sarawak bisi meda sida ke bedaja chara mit ba Market Rayat nadai bedaja agi berengkah ari berapi hari ke udah laban nyeliahka diri ari dituntung sebarang penusah ke tau nyadi.
Pasar Marudi dipeda sunyi amat ketegal penyakit virus nyau majak ngelekai sereta ngachau penatai pemisi bala sida ke bedaja.
Lebuh Penulung Menteri Perintah Pelilih Menua Datu Dr Penguang anak Manggil dirandau pengarang berita senentang pekara nya iya madahka, iya udah nangkan mensia mayuh ngambika ngurangka pejalai antara dua pelilih menua lebih agi ari Miri ngelawa Marudi maya ke agi nganti gaya ke ulih ngemendarka.
Penguang ti mega Kaban Kunsil Nengeri (ADUN) N.76 Marudi ngarapka polis neritka agi atur sebedau meri permit pejalai antara pelilih menua ngambika pengelekai pandemik Covid-19 ke benung nyadi amat ba Miri, Marudi enggau Beluru ulih dijaga.
“Titihka SOP, jaga pemeresi sereta basu jaru ngena sabun tauka hand sanitizer, seruran ngena penutup menua maya ba endur ke mayuh orang,” ku Penguang.
Kelimpah ari nya mensia mayuh mega patut nyaga takah sosial sereta anang ngatur pengerami makai, barbekiu tauka sebrang pengerami lalu enti ulih anang pansut ari rumah.
