SIBU: Pengawa ke enda menuku digaga dua iku lelaki ba Jalan Bukit Assek meri penusah ngagai diri empu lebuh kedua-dua seduai iya ditan polis laban seiku ari seduai iya nyimpan seterum senapang patah nadai lesen.
Nitihka Kepala Polis Pelilih Sibu ACP Stanley Jonathan Ringgit, sida iya bulih penerang senentang pekara nya urung pukul 2.30 ngalih hari sebedau raban polis digerahka datai ngelawa endur nya.
“Lebuh datai ba endur nya raban kami bisi meda dua iku lelaki beumur 32 enggau 40 taun tegali laban mabuk ba kandang mua siti rumah.
“Pengudah meresa beg sandik ke dibai seiku ari suspek, kami bisi tetemuka enam igi seterum senapang pata,” ku iya lebuh meri penerang ngagai pengarang berita.
Ku Stanley, kedua-dua suspek nya dibai ngagai Balai Polis Sentral laban deka ditasat lebih silik agi.
“Kedua-dua suspek direman pengelama empat hari nyentukka ngagai 7 Ogos sereta kes nya ditasat nitihka Seksyen 8 (a) Akta Senjata 1960,” ku iya.
Oleh Nurzilla Mohamad