SIMANGGANG: Palan Nyaga Operasyen Pelilih (PKOD) Raban Ngetanka Mensia Mayuh Malaysia (APM) Pelilih Sri Aman empai lama ke udah milih siti palan endur ngatur Program Info On Wheels (IOW) Merdeka.
PKOD nya dipilih laban setipak enggau theme Nyambut Hari Nasional taun tu iya nya ‘Malaysia Peduli’ dikena meri apresiasyen ngagai raban APM ketegal bisi penyabar seretra enggau naka ulih ngaga pengawa maya napi pandemik Covid-19.
Kelimpah ari dikena meri apresiasyen ngagai jasa APM, tuju Opis Pemandah (Japen) Sri Aman ngatur program nya mega dikena meransang komuniti enggau ijinsi perintah ba endur nya sama bela nemu reti meredeka ba menua tu.
Program nya mega sekeda ari aktiviti tauka pengawa ke digaga beserimbai enggau Pengerami Nyambut Bulan Nasional sereta Kimpin Kepaika Jalur Gemilang 2020 dikena namam runding ngembuan patriotism ngagai peranak ba endur nya.
Program IOW Merdeka nya berengkah enggau nyambut penatai pengari Japen Sri Aman, Iswandi Kassim ke nyereta PKOD APM Pelilih Sri Aman sebedau iya disambung enggau lagu NegaraKu sereta ditangkanka enggau Ibu Pertiwiku.
Pengudah abis belagu, program nya diteruska enggau pengawa nyuaka menira Jalur Gemilang ari Japen Sri Aman ngagai Pemesai APM Pelilih Sri Aman iaitu Kapten (PA) Siti Huzaimah Ibrahim.
Japen Sri Aman neruska program nya meri licha senentang mayuh bengkah isu kemaya hari tu bekaul enggau Chara Nagang Covid-19, Norma Baru Ba Opis enggau Bantuan Prihatin Nasional.
Ngena program nya Japen mega meri licah senentang Bantuan Khas Sarawak Ku Sayang (BKSS), ngena Apikasi MyTrace Mantu Perintah Nemu Enggau Mutuska Rantai Covid-19 sereta Pakej Ransangan Ekonomi (Prihatin).
Sebedau Program IOW Merdeka nya abis APM Sri Aman sama bela enggau nyereta nyebut nitihka Atur Nyaga Pejalai Maya Nyuman (PKPP) sereta nyadung poster dichelak Japen Malaysia ngagai mensia mayuh ke diau ba bandar nya.
Oleh Valentine Ngumbang
