BEGEMPUNG sereta bekerejasama ngereja pengawa, baikka nya pengawa ti besai sekalika iya ke mit, baka pengawa kitai ke merajaka (memertabatka) Jaku Iban.
Tusun Ke-32
DALAM Tusun Ke-32 minggu tu, kitai deka belematika tampung kupas pasal
sada bebuah “Peratika Manah-manah” ti udah dichelak dalam Tusun Ke-31 minggu dulu nyin kemari.
Rentan Ke-4 enggau Ke-5 sada bebuah nya nyebut:
Uji jayak kitai beratika
Kaban engkatak, bala reringkak,
Kachuh riuh, bepakrak, kelalu ragak,
Meda mua hari nyadi, ayap belili langit sepiak,
Tang ujan lalu ga enda nelian labuh beteratak,
Semina memesi, ngemi kak,
Nyampau sedak panching empangau.
Uji kitai beratika
Pendiau bala reringkak, raban lelenggak
Kachuh riuh, kelalu ragak, balat ikak
Ninga berita bala runtu deka nyaru, ngempas di lupak
Tang banta yan enda nyadi ngaban
Mina ngempas di kerangan, sengaki rantau.
Ba kedua-dua rentayan tu alai penulis nyebut sebengkah peneleba ti mayuh mensia ngembuan, ke selalu kena peratika iya. Peneleba tu suah kena pelunjak-sebut sida ke tuai dalam jaku dalam ti munyi tu: “Ninga deru guntur di langit, ai di tepayan dibubuh abis.” Reti jaku dalam tu, iya orang ke jampat-jampat ngelepaska utai ti endang udah dikemisika diri-empu semata-mata ketegal kelalu gagit deka ngulihka untung it jauh besai agi ke apin ditemu ulih sekalika enda, tang ba pengujung nyau pulaika pengerugi. Ke banding, orang siku ke endang udah bisi sebengkah batang pengawa dikereja dikena ngidupka diri-empu enggau diri sebilik, sereta iya ninga berita bisi pengawa puang ti bukai lalu berumban-rumban ngelepaska pengawa ti benung dikereja diri-empu ketegal kelalu gagit ati deka minta pengawa baru nya ti dipeberitaka nyamai agi dikereja sereta lebih besai agi gaji enggau mayuh penguntung bukai. Ke selalu agi, pengawa ti dikereja rumban-baban baka nya, sigi nadai bepengujungka utai bukai kelimpah ari pengelebu enggau pengerugi.
Rentayan Ke-6 sada bebuah nyebut:-
Uji kitai beratika
Pendiau manuk indu, karap kelabu,
Kachuh, riuh da baruh, sekayu rumah merundu,
Gaga ngadaka keratu sigi telu;
Ke tau nyadi telu matu, bau abu
Enda dikesayauka, terus ditikau.
Dalam rentayan tu, dia penulis beratika perangai manuk ti galak dititih sereta ditunda sekeda mensia. Perangai manuk kitai bela nemu, manuk indu betelu sigi aja tang mih empekak enda mudah ngetu, ngenyapuh enggau ngeragakka sekayu rumah-panjai. Perangai manuk nya lalu digaga iban ke jaku dalam ti nyebut: “Perangai manuk: betelu sigi, chapuh sekayu rumahpanjai.” Jaku dalam tu manggum reti: orang ke beperangai ngerigang, tauka ngemesai, tauka temegah meritaka diri ketegal teulihka pemujur ti enda bengat besai, tauka meri tulung ti enda seberapa ngagai orang bukai, ke enda patut kelalu dikemenang, tauka dipeberitaka ngagai orang mayuh ke ulu enggau ke ili.
Dalam Rentayan Ke-7 sada bebuah bisi nyebut:-
Aram kitai mega beratika
Setangkai sempuli padi enchangan, pulut Beketan,
Nadai kitai ninga iya kachuh riuh, enda melawan,
Tang semakin hari, niap malam
Tangkai padi enchangan, pulut Beketan
Semakin lentur laur tetensam
Igi iya berisi, tandan iya meruan
Tau diketam, diketau mansau.
Dalam Rentayan Ke-7 alai penulis mai pemacha mayuh sama-sama siru tau megai perangai ti diibun setangkai padi munyi iya ti disebut dalam pantun tuai bejaku: “Tunda perangai padi: semakin perisi semakin lentur.” Pantun tuai bejaku tu dikena nurunka ajar ngagai kitai mensia, iya nya semakin mayuh ilmu/penemu dikembuan kitai semakin tinggi pangkat disandang kitai, semakin kitai ngemaruhka diri (enda sumbung, enda tekelambang, enda tekebur).
Dalam Rentayan Ke-8, dia sada bebuah tu nyebut:
Aram kitai beratika pengisuk, pendiau sampuk,
Diau-diau, bepelam-pelam, setengah betapuk
Nadai sida bepagahka dilah,
Mengkukuk bekerauk munyi manuk,
Enda sida bepakrak, kelalu ragak,
Munyi kaban reringkak, bala engkatak
Ke diau di engkebuk, ai meduk,
Tang tekerit, tetebuk sida ka pun
Medang puguk, purang mengkuk,
Dinga tak rebah berikuk, tumbang teduduk
Merembam ke pulau, nuju kembayau.
Leka sada bebuah ba sentang tu mai bala pemacha (mensia) begempung sereta bekerejasama ngereja pengawa, baikka nya pengawa ti besai sekalika iya ke mit, baka pengawa kitai ke merajaka (memertabatka) Jaku Iban. Tak kereja pengawa nya enggau chara ngerenut (enda enggau pengeragak, tauka dipeberitaka enda meiga-iga baka chara ti dikena bala reringkak enggau engkatak), penyiru, pengelandik enggau pengeliat kenyau ari berengkah nyentuk ke tembu, nunda chara sampuk. Disebut ngena jalai bukai, dikereja ngikut chara bala semut. “Keba semut, sida besaup berangkut, beribit bai”. Neladan pemanah bala ikan. “Keba ikan, sida ngaban, bereta beraban, ngempas di kerangan ulu ai.” Nurutka pemanah jungkung. “Keba jungkung, sida riu betembung, tumbuh besendi.”
Rentayan Ke-9 nyebut:
Uji kitai beratika pemama pipit banda,
Betubuh mit mesai kunchit,
Tang berati melisa baka burung geruna,
Nguji mencuba nelan kemantan, embawang lanja.
Taja nya, enda ulih iya
Tang bisi mega ke sempama, lalau pendiau.
Rentayan sada bebuah “Peratika Manah-manah” ti Ke-9 ngansak bala pemacha sama-sama enggau madamka jaku emba ti suah disebut mensia munyi tu: “Anang kelalu besai ati enggaika utai ti dijuluk ati enda ulih, tang ke ulih nya semina pengelebu enggau pengerugi.” Ku penemu penulis, nya nadai salah enti (kitai) besai ati baka pipit taja tubuh iya mit tang betati deka nelan buah embawang, enti ketegal kitai bisi tuju ti deka dijuluk amat ga puku-ati kitai nya lalu diturunka ngagai pengawa bepukuka akal daya, pengerajin enggau pemagas kitai ngereja. Lebuh kitai udah bempas-pulas ngereja dikena ngulihka utai ti diniat nya agi ga kitai enda mujur bulih iya, senadai-nadai ari ke nadai pemujur nya tadi bisi mega kitai teulihka akal, langkah enggau peneleba ti baru enti sema kitai ngereja pengawa ti sama ba maya ti bukai dudi hari. Keba orang ke tuai ke anda penemu dulu kelia bisi nengkebangka jaku dalam ti munyi tu: (i) Alah kereja ketegal basa; (ii) Enti kitai selalu ngerut libut di puting enteran, lama laun pen teulih mih ka dengah; enti kitai selalu nagan engkian di riam dalam, lama laun pen teulih mih ka tapah.
Rentayan Ke-10 nyebut munyi tu:
Uji kitai beratika pemama semut,
Ditanya, enda nyaut,
Dipeda, baka ke enda engkebut,
Bejalai kimut-kimut, kin-kitu kitut-kitut, mansang surut;
Tang mih, enti sida udah belabuh berangkut,
Sida enda takut, mali riput, nadai surut,
Ngeli diketup, ngangkut but, bangkai kerebau.
Rentayan Ke-10 mesan kitai namu diri-empu enggau pengeliat enggau pemagas ke gembar penyikar enggau pengering ngereja semua bansa pengawa ti patut dikereja kitai dikena idup sekumbang kitai ke mengkang diau ba dunya injau tu.
Lalu Rentayan Ke-11 nyebut:
Chukup mih pengengkah, naka mih pemanah,
Enti mensia bejaku enda seredah, mantaika pemangah;
Bejaku memanah baka selanjau ijau manuk pagah
Manuk pemiau gawai nikah, gawai tuah:
Iya ke begela Bujang Tuyu Nangkin Duku nadai sentagai,
Bujang Nelap Panjai Iku Sirat irit bejalai.
Lelaki orang nya nadai kala nusi diri berani
Tang teleba ga sida ngeringka antu pala;
Indu orang nya, nadai kala muji diri pandai negi lebur api,
Palik ke bilik peda betebejur langgur pua.
Lelaki nadai kala beberitaka diri pemulih padi,
Tang pagi lemai berangangai bekumbai makai;
Indu nadai kala beberitaka diri landik bejaku,
Tang enda nemu leju, merengu mantaika pelandai.
Rentayan Ke-11 enggau kepenudi bendar tu ngingatka kitai malar ngimpun ulah jelekah enggau tindak langkah, ngembuan jaku seru, enggau megai tebiat sikap ti seruran ngemaruhka diri; anang kitai sekali-kali buya ngemenangka pengering, pemerani, pemandai, pengaya enggau pengeraja diri-empu.
BETAMPUNG
Oleh JANANG ENSIRING