![](https://utusansarawak.com.my/wp-content/uploads/2020/08/Pic7.jpg)
![](https://www.utusansarawak.com.my/wp-content/uploads/2020/08/Pic7.jpg)
Tusun Ke-31
Padang Disumpah Bunsu Bintang Banyak
Maya jeman Sera Gunting, bisi seiku da tuai bansa Dayak ti bejaku ngena jaku Iban ti tebilang benama Sagan-Agan. Iya nguluka bala nembiak iya diau mendam di ulu Sungai Ketungau. Anak iya ti benama Jenua pindah ari ulu Ketungau ke sebelah tengan Bukit Kenyandang, antara ulu Sungai Sanggau enggau ulu Sungai Strap. Anak Jenua ti benama Ratih, diau mendam jauh ari bala menyadi iya ti bukai di Bukit Longgong Kumpang, di ulu Sungai Kumpang. Lebuh Jenua diau di Bukit Kenyandang, seiku tuai bansa Dayak ari ili Ketungau benama Jengkuan enggau Padang enggau apai iya ti benama Ligam datai lalu diau mendam begulai enggau bala nembiak iya di ulu Sungai Bayan.
Ari menua nya sida pindah baru ngagai nanga Sungai Merakai. Di menua nya nasit sida enda tentu manah. Pendiau pengidup sida, tusah sereta seranta. Tanah ti endur sida bumai nya, enda tentu deka tumbuh utai tanam. Sida selalu lapar pungkang, enda chukup pemakai. Maya nya mega, seiku ari sida mati ditangkap baya. Nya alai ketegal nya, sida pan pindah ke Bukit Tapang di menua antara Saih enggau Batang Ketungau. Datai ba endur nya, sida diau tujuh hari tujuh malam laban ti bebasaka bunyi Pangkas Kanan nitihka adat Dayak maya nya. Udah nya sida pan mupuk tunga ke Bukit Kenyandang di selatan Tinting Kelingkang ti nyadi sempadan antara Sarawak enggau Kalimantan. Sida andalka Burung Pangkas Kanan ti didinga sida sebedau sida ti mupuk nya, semitan amai kena ngalahka munsuh enti bisi deka nyerang sida maya ke nuju menua Dayak Sebaru.
Maya sida diau mendam di menua Bukit Kenyandang, Pandang enggau bala nembiak iya berasai lantang ati meda umai enggau utai tanam sida nyadi amai. Taun nya sida bulih amai padi. Meda baka nya sida pan nadai semaya deka mindah ari endur nya.
Puni Taju Buah pingan
Maya nya mega, seiku lelaki ari rumah panjai Padang ti benama Jengkuan seduai bini iya ti benama Genali turun gawa ba umai seduai. Lebuh seduai datai ba langkau umai, seduai tepedaka mayuh amai buah pingan ti benung mansau ba geladak langkau seduai nya. Seduai pan makai buah pingan nya lalu udah nya seduai pan mupuk mantun rumput ba umai seduai nya. Maya seduai mantun, mata Jengkuan enda mukai-mukai kena abu ti dikesaika iya ba umai nya. Iya pan berumban masu mata iya nya ke ai sungai ti enda jauh ari endur seduai ke mantun rumput nya. Udah nya iya pan pulai baru ngagai endur seduai ti mantun tadi. Maya nya iya meda bini iya nadai dia agi. Iya pan tepedaka titik darah ba tanah enggau daun padi ti endur seduai mantun rumput tadi. Iya pan ngangauka bini iya tang nadai nyaut. Meda baka nya iya pan berumban nyidi teritik darah nya lalu datai ba mua seiti lubang. Iya pan tama ke dalam lubang nya laban deka nyidi bekau darah nya. Datai iya dalam lubang nya, nadai ga iya meda bini iya dalam lubang nya. Siang malam iya bejalai dalam lubang nya. Nyau datai ba malam kedua, iya pan rembus ba pendai orang. Dia iya betemu enggau seiku indu ti bajik amai gamal benung mandi ba sungai nya. Tepedaka Jengkuan indu nya tadi pan mai iya niki ke rumah panjai sida. Seduai pan bejalai betunda udi niti jalai pendai nya.
“Betul amai nuan datai, unggal. Bala kami serumah dia benung begawai Enchaboh Arong. Sida bujang berani kami dia benung naku pala munsuh ti ulih sida ba kayau anak. Munsuh nya udah puni taju buah pingan sida pagi tadi,” pia ku indu nya.
Maya ti tama rumah panjai nya, Jengkuan meda sida serumah nya benung bebala mayuh naku antu pala seraya ti bepantun. Meda Jengkuan datai seiku lelaki lalu ngelaluka iya.
“Lalu mih Balu Pingan,” ku lelaki nya seraya ti benung naku seigi antu pala. Iya pan nyuaka Jengkuan antu pala nya lalu ngasuh iya bepantun. Jengkuan nyambut antu pala nya lalu bepantun. Udah nya iya pan dibai sida ngajat berayah ngelingi pandung ba tengah-tengah ruai. Jengkuan majak ngajat ngelingi pandung nya. Enda lama udah nya, seiku lelaki datai lalu miauka manuk ngasuh orang badu ngajat berayah. Udah nya Jengkuan pan beguai-guai tama ke dalam seiti bilik lalu betemu enggau indu ti mai iya niki tadi.
“Pala ti ditaku sida nya, pala bini aku. Sapa kita ba rumah panjai tu munuh iya?” pia ku Jengkuan nelai indu nya tadi.
“Orang ti nyuaka nuan antu pala nya tadi mih menyadi aku. Iya mih munuh bini nuan nya laban seduai udah makai taju buah pingan nya. Nya mih Taju Remaung. Semua kami ditu bansa Bunsu Remaung magang. Tu mih rumah panjai kami.
“Nuan tau bebalas diatu. Enti nuan deka munuh menyadi aku nya, nuan enda tau mantap iya ngena nyabur nuan empu. Iya seigi enda telih enti dipantap ngena duku orang ukai. Nuan tau munuh iya ngena duku iya empu,” pia ku indu nya nangkan Jengkuan.
Jengkuan Bebalaska Pemati Bini
Ninga munyi nya, Jengkuan pan berumban pansut ke ruai lalu duduk begulai enggau orang bukai dia. Udah lama ti duduk dia, Jengkuan mai menyadi indu nya nguluka iya mandi ke pendai sida. Lelaki nya tadi angkat lalu mai duku iya empu. Jengkuan mega mai duku iya empu.
Ba jalai pendai sida serumh nya, seduai mansa madang tebu.
“Enti nuan aus, unggal, nadai salah ga, pantap nuan tebu nya alu empa,” pia ku Bunsu Remaung nya.
“Amai ga. Aus amai nyawa tu udah ti lelak bai kita ngajat naku antu pala tadi,” pia ku saut Jengkuan.
Seduai pan sama ngetu lalu mantap sebatang tebu nya. Seduai sama duduk laban deka musi tebu nya. Jengkuan pan musi tebu nya ngena belakang duku iya.
“Apoo…! Lama amai nuan enda tembu musi tebu nya, unggal,” pia ku Bunsu Remaung nya.
“Akai rai, tumpul amai duku aku tu, unggal,” ku Buns Remaung.
“Nah…, uji nuan ngena duku aku ti tajam tu,” pia ku Bunsu Remaung nya.
Udah Jengkuan ngambi duku nya, iya pan mumpung pala Bunsu Remaung nya lalu berumban nabanka pala Bunsu Remaung nya ke menua iya empu.
Pengerami Ngintu Pemenang Jenkuan
Lebuh Jengkuan datai ba rumah sida di Bukit Kenyandang, iya mantai ngagai sida serumah pala Bunsu Remaung ti udah munuh bini iya ba umai suba. Padang sereta nembiak iya gaga amai nyambut pala munsuh sida serumah nya. Nya alai, kena nyambut pemenang Jengkuan sereta beterima kasih ngagai Antu Bunsu Petara ti udah nulung iya bebalaska pemati bini iya nya, Padang sereta nembiak iya nirika gawai Enchabuh Arong.
Mayuh amai pengabang datai maya nya. Endang sigi baka bala pengabang mih nya. Mayuh bansa, mayuh mensia, mayuh bansa Antu Bunsu Petara, mayuh ga menua; nya alai mayuh ga ulah ti bebida, enda sebaka. Maya ti nyau sama bela bungau, palau, ngelu pala, sekeda sida pengabang nya nyau lain ulah. Nya alai sida ke empu rumah, nyau enda tan ati meda utai baka nya. Siku ari pengabang nya bisi enda manah ulah maya ti bebuti enggau pengabang bukai.
“Anang mayuh ulah baka nya mih, unggal. Rumah kami tu enda tau endur orang belaya,” pia ku siku ari bujang berani Pandang ngerara sereta nangkan iya.
“Chih…! Nama nuan berani ngerara aku? Nuan nemu aku tu sapa?” pia ku timbal pengabang nya.
“Ni aku nemu? Nuan ga enda madah. Aku ukai nganu nuan tang nagang kita belaya,” ku lelaki ke empu rumah.
“Aku tu anak bujang Bunsu Bintang Banyak…! Nuan pan enti ka ngelaban aku, tau mih..!” ku iya.
Sumpah Bunsu Bintang Banyak
Ninga munyi nya, manuk sabung Padang nya pan minta pemendar ari tuai sida nya, lalu nurun ke tanah belaban bepantap enggau pengabang nya. Bepantap mih seduai sida tang sama enda tetelihka pangan diri. Bibat mih seduai sebelah tengah laman nya tang lalu enda tealahka pangan diri. Begau sida serumah enggau bala pengabang bepedaka seduai ti benung beujui-uji sereta belaban pengering. Nyau kelama-lama peda pengabang nya pan nyau lemi-selemi datai ke iya nyau enda ulih engkebut agi; enda enseput. Mati nengali hari, parai nengali lemai.
Udah tembu gawai nya bala pengabang pan mulaika diri ngagai rumah enggau menua diri empu. Malam nya Padang bisi mimpi betemu enggau Bunsu Bintang Banyak.
“Nyadi… baka tu Padang… laban anak aku udah mati ba jari nembiak nuan, aku enda ulih enda bebalas tang ukai ngena chara ngayau. Aku deka nyumpah nuan. Nuan sereta nembiak nuan lalu datai ke tujuh serak peturun enda bulih padi enti bumai, lalu deka selalu lapar pungkang,” pia ku Bunsu Bintang Banyak. Ninga munyi nya Padang baru deka bejaku nimbal tang iya pan tedani.
(Betampung ba Tusun Ke-32 minggu nyin ila)
Nya mih pun laya Bunsu Petara enggau peturun Padang nyentuk ke bansa Dayak Iban majak matau sereta ngiga menua baru nengeri Sarawak. Sumpah Bunsu Petara nya ba Iban ti peturun Padang amai nyadi tang bisi ga Bunsu Petara ti bukai kasih sereta sinu lalu nulung mandung Padang enggau bala anak telesak iya. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
Ditulis Harry Usup Umbar (B.Sc Hons. Human Development,UPM)