![](https://utusansarawak.com.my/wp-content/uploads/2020/10/shaman.jpg)
![](https://www.utusansarawak.com.my/wp-content/uploads/2020/10/shaman.jpg)
TUSUN KETIGA
TAKUT ati meda gamal seduai iya.
Kira-kira urung pukul 8.00 malam bala ke bela ngemata sereta mendingka manang belian tak tekenyit laban teguran meda kedua-dua manang nya ngenyit belanda ba tanju; siku ke setak ili lalu siku ke setak ulu. Alit ati meda seduai belanda ba tanju ke mayuh bejungkar. Orang mayuh begau. Tang bisi orang ngerara enda ngasuh mayuh utai sebut. Lama manang lesap. Nyau kelama seduai datai baru tang enda bereta. Manang Apai Stana dulu datai lalu merentum rebah semak pun tiang pancha. Nyau merentum munyi punggu ke labuh. Apai Stana pan lalu nadai bemunyi. Siku orang lalu mungkur iya enggau pua kumbu ke bisi dibai manang.
“Luput manang, luput!” ku orang bereta nyebut.
Enda lama udah nya dinga rerejat ga siku manang datai ari alai iya ke lesap. Baka ke enda kaki iya melunchat nengah jungkar tanju. Datai semak tiang pancha iya mega merentum rebah. Begau ga orang beguai-guai mungkur iya enggau pua kumbu.
Bisi sepuluh minit orang nadai engeketik. Kedua-dua manang apin bemunyi. Dinga begau orang di bilik. Indai Mulok tak nyerarat ngangau minta ambi. “Ambi aku Juntan. Ambi aku Engkamat”, ku iya. Taja pia iya lalu nadai nyaut ditanya orang. Juntan nya laki iya, apai Mulok nyau ngusak-mengusak. Engkamat siku menyadi tuai sida Mulok pan rebansak semak. Indai tuai nya apin nemu orang.
Manang nya udah siku-siku bedemuh. Orang lalu ngebakka pua kumbu. Manang udah angkat ari ke luput. Jari sepiak kiba digenggam rat. Manang siku pan baka nya. Buk seduai bela geregusu. Gamal seduai iya ikak. Taja pia, seduai nadai rajai nadai telih. Alit amat ati meda utai baka nya. Ukai anchi utai di tanju enggau ujung tanju sereta di jungkar.
“Bai aku ke bilik ngagai iya ke sakit,” ku manang siku. Iya ke siku nyin pan baka nya minta bai tama ke bilik ngagai indai Mulok.
Orang lalu ngiring manang ke sama bejalai gadai-gadai jari sepiak ngenggam utai. Sida bejalai nyeraraka bala mayuh lalu datai ngimbai indai Mulok.
“Sediaka mangkuk ngundan ai, bai kitu,” ku kedua-dua manang.
Orang beguai-guai mai dua igi mangkuk gawai udah setengah diisi ai. Manang pan muka genggam jari seduai lalu sama nepas utai ti digenggam nya ngagai atas ai. Orang ke semak dia bela ngenyengauka rekung deka meda nama utai ti digenggam seduai. Ku sida ke meda bisi utai chelum melepung ba atas ai kira-kira mesai leka ensabi. Enggi manang Dagang, ke tuai agi ke seduai meruan lalu enggi Apai Stana bisi sekejap bepusin-pusin ba atas ai udah nya lesap.
“Kami dua sama mujur nangkap semengat. Tadi dibai kendua bebagi tang diatu nya udah nyadi sigi,” ku manang Dagang. Manang apai Stana enda bemunyi. Iya nemu semengat ti ulih iya udah bechantum enggau semengat ti diulih manang Dagang. Manang Dagang ngulihka semengat nya ngena kedua-dua piak tapa jari iya. Iya lalu begadai-gadai ngampir indai Mulok ke diangkatka sida awakka iya duduk. Manang lalu nyilak-nyilakka buk ba bubun aji indai Mulok. Iya ngambi seleka beras lalu nechal-nechal beras sereta semengat nya ba bubun aji indai Mulok. Beras nya pan lesap. Manang lalu nempap tapa jari iya sambil iya nyebut “Fff..fff..aaa”. Nyau semetap munyi tempap jari nya engka sekali. Semetap munyi letup bedil keretas.
Mar deka dipechaya enggau enda dipechaya. Indai Mulok tedani lalu ligau-ligau; malik ke kiba, malik ke kanan. Malik ke atas perabung. Iya endang betul-betul baka orang ke baru dani tinduk.
“Nama main kita mayuh endar ditu?” ku iya nanya.
“Eh, kati ku enda mayuh. Orang begauka nuan remban. Nyau sehari semalam tu nuan enda dani,” ku apai Mulok nyaut ngerampas.
Indai Mulok musin-musinka pegu iya. Jari iya tak enggai meleka ari tubuh iya. Manang lalu angkat ari seduai ke duduk besila semak nya tadi.
“Uji nginsit mimit bala kita,” Semua orang lalu ngisit meri ruang besai agi ngelingi indai Mulok. Apai Mulok pan sama nginsit. Engkamat surut. Kami dua ini ngenan, mengkang semak dia.
Oleh Jantan Umbat