![](https://utusansarawak.com.my/wp-content/uploads/2020/08/sekolah.jpg)
![](https://www.utusansarawak.com.my/wp-content/uploads/2020/08/sekolah-1024x554.jpg)
Tusun Ketiga
MAYUH pengajar tepagang enda ulih pulai ari menua udah kemisi abis. Orang ke gawa perintah tauka bekereja kompeni luar bisi bekereja ari rumah. Kilang-kilang pengaga barang mayuh ditutup ti ngujungka mayuh orang lenyau penatai belanja.
Udah renggat keterubah Atur Mindah Betagang nya abis, penyakit Covid 19 nadai ngayanka tanda deka ngetu. Nya alai timpuh ba renggat kedua enda ulih enda dipejalaika belabuh ari 1 April 2020. Jang ngasaika pengidup makin pedis. Pengawa iya ti merindang sereta ngintu pengerai diri bebachaka bup nyau nyadi leju. Abis macha cherita, iya macha jaku dalam Bup Kudus. Ati makin lelengauka bala anak enggau uchu
BAKA PEMATI MANUK
Ati pan balat sinu ngenang kaban ke bisi ninggalka dunya enda disah, enda dibantu. Sinu amat berundingka orang ke mupuk pindah menua bekalih dunya enda diintu baka selama maya rabat. Tak mupuk baka pemati manuk, mati uduk.
Gamal penyakit anangka surut, mansang ngekai keba ba sekeda endur. Lempus 14 April 2020 ti nanda pengujung renggat kedua Atur Mindah Betagang, lalu nadai ga kes pengekai penyakit nya makin kurang. Ketegal nya, PKP renggat ketiga belabuh dipejalaika ari 15 April 2020 ngagai 28 April 2020 . Pemerinsa menua majak nambah. Ekonomi menua makin kusut. Ati rayat makin enda sabar tang kati ku enggau. Sayau mih ku ati Jang, perang tu enda baka beperang enggau mensia. Tak beperang enggau utai enda dipeda. Sinu berundingka sida lutur, misi, polis enggau soldadu ke gawa berambunka nyawa nyadi terabai menua taukafront liners. Atur Mindah Betagang ditambah ngagai renggat keempat ari 28 April 2020 ngagai 12 Mei 2020. Penyakit meruan agi bisi. Isa ga di menua kitai enda tentu mayuh bebanding enggau menua bukai baka Amerika, Spanyol, Itali enggau Brazil ti alai beribu-ribu orang mati.
KACHAU REGAU
Chara Jang diau di rumah enda tentu meruan. Rumah engka ke patut diberesi udah diberesi. Bagi Bup Kudus ke patut dibacha nyau tembu mega. Deka majakka nya ati tak nyau kachau regau. Jang ngiga jalai besabar. Iya ngelimpangka ati nguna ICT. Dipeda iya YouTube main badminton. Abis main Tai Tze Ying ti nyadi pemain badminton indu Lumur 1 dunya dimain. Dikena nyelat Tai Tze Ying ditukar Jang ngagai main bebukut. Terperindang ati iya meda Mike Tyson enggau Mohamad Ali. Udah nya dipeda iya ga Datuk Lee Chong Wee bemain ngelaban Lin Dan enggau Kento Mamota. Pia mega iya meda sida pemain bukai ari Indonesia enggau Jipun. Kelimpah ari nya, Jang rindang meda sida Pandelela terejun ba Sukan Olimpik di London.
Leju meda lumba enggau main, Jang ngiga cherita pasal batang tubuh orang ke benama. Teperindang Jang macha cherita From Longhouse to Capital – Recollection, pasal pengidup Iya ti Dipebasa Tan Sri Datuk Amar Leo Moggie. Tembu bendar ati nelusur pengidup siku anak Iban ti pengabis iya mujur dalam pengidup. Kelimpah ari nemu pasal Tan Sri Leo empu, mayuh bendar cherita pasal politik menua Sarawak ke suba. Tetarit ati macha pasal pemujur Tan Sri Leo, nyau tepulai ga pengingat pasal tudah diri iya empu. Ngeranjai-ngeranjai Jang nusun pasal diri empu tang enda jauh pejalai. Nama dih utai ditusui pasal diri iya empu; semina baka tekura reringkap bejalai ngidupka diri. Baka manuk idup kair pantuk. Jang lalu berasai sinu ngenang bisi ga orang ke kurang agi benasit ari iya. “Eh, udah besyukur mih tu”. Cherita iya dilengka, bila enda nampung Tuhan aja ke nemu. Pengawa ngarang tu ukai kereja ti mudah tang Jang ngetupka ngeli. Nya mesti tembu ila. Penyai pemanah utai dikarang nya siti pakara. Asal ga nya tembu ku ati iya. Iya lalu ingatka siti sempama “genggam bara api sampai jadi arang”. Semengat iya deka ngarang pulai baru. Iya lalu belabuh ngarang pasal pengekai Covid -19dikena iya ngabiska hari ke berasai panjai.
JANTAN UMBAT