![](https://utusansarawak.com.my/wp-content/uploads/2020/12/Pic4.jpg)
![](https://www.utusansarawak.com.my/wp-content/uploads/2020/12/Pic4.jpg)
Tusun Ke-7
ORANG KAYA PEMANCHA NANANG
Nanang anak tuai O.K.P. Dana “Bayang” menyadi bujang berani ti benama Luyoh enggau Aji. Iya bebini jadi enggau Rabai anak Orang Kaya Panglima Randi ti bensumbar “Rantai”. Entua iya Orang Kaya Panglima Randi mega digelar bujang berani Iban Saribas ti serambau enggau apai iya O.K.P. Dana “Bayang”.
Udah Aji mati ngelaban bala Raja di Sungai Langit dalam taun 1858, Nanang nganti Aji nyadi tuai Iban Padeh enggau Ulu Layar.
Maya agi biak Nanang bemimpi asai ke niki Bukit Santubung lalu betemu enggau Kumang.
“Lalu mih Nanang. Lalu tama ke dalam bilik peninduk aku kitu mih. Panggau ke sepiak kanan nuan nya mih peninduk nuan. Iya ke tengah nya peninduk aku. Iya ke muak ke kiba peninduk aku nya enggi Ngumbang “Berauh Langit”. Nya alai enti ngayau, Ngumbang enda ulih ngalahka nuan,” ku Kumang.
Udah Nanang ninga jaku Kumang munyi nya, iya pan tedani. Asai ke ukai mimpi, ku iya bejaku kediri dalam ati.
Nanang mega kala bemimpi diberi Kumang enggau indai iya mandi. Maya ke mandi nya indai Kumang pan bejaku.
“Udah diberi aku mandi tu, nuan Nanang deka nyadi bujang berani sebaka enggau sida Keling seduai Laja di Panggau Libau din,” ku indai Kumang.
MANTU SHARIF MASAHOR
Udah Aji mati di Sungai Langit, Luyoh pan nurun ke Mukah lalu betemu enggau Sharif Masahor. Maya nya tuai bansa Melanau nya endang bemunsuh enggau Raja Brooke. Udah ti berunding enda lama, Sharif Masahor pan setuju nyendiaka bala pengayau enggau senyata ti deka dikena Luyoh enggau Nanang ngelaban perintah Raja. Enda lama udah nya seduai pan nirika kubu di Nanga Spak. Enggau ati bendar seduai deka bebalaska pemati adi seduai Aji.
Dalam taun 1858, kubu nya alah diserang Tuan Watson, Bakir enggau Abang Aing. Sebulan udah nya Nanang nirika kubu baru tang alah mega diserang bala Tuan Watson enggau bala Bakir ari Kubu Betong.
Udah ti alah dua kali ngelaban bala perintah Raja, Nanang seduai Luyoh pan rari ke Bukit Sadok lalu begempung enggau Libau “Rentap” taun 1858. Bedil “Bujang Timpang Berang” ti ulih apai seduai di Sambas mega dibai seduai ke Bukit Sadok.
Ari kuta di Bukit Sadok Nanang seduai Luyoh nguluka bala seduai enggau bala Rentap nulung Sharif Masahor ngelaban perintah Raja di Mukah. Naka ulih sida sebuat nulung bala Melanau ngetanka kubu Sharif Masahor di Mukah enggau di Igan. Udah ti mantu Sharif Masahor bala Nanang enggau Luyoh pan mulaika diri ke Bukit Sadok.
Enda lama udah nya Nanang enggau Luyoh pan ninga berita ti enda manah pasal pangan seduai Sharif Masahor di Mukah. Perintah udah mujur ngalahka bala Melanau di Mukah. Sharif Masahor ditangkap perintah Raja Brooke lalu dibai ke Singapura. \
RAJA NGUJI BEBAIK ENGGAU NANANG
Dalam taun 1861, Tuan Raja Charles Brooke enggau Tuan Muda Charles Brooke nguluka beribu-ribu iku bala pengayau ti betuaika Abang Aing enggau Sandom ngayau Nanang seduai Rentap di Bukit Sadok. Sebedau nya, udah dua kali bala perintah Raja Brooke enda mujur ngalahka Libau “Rentap” di Bukit Sadok. Sekali tu Tuan Raja Charles Brooke mai meriam besai ti digelar sida “Bujang Sadok” ti deka dikena sida nimbak kubu Bukit Sadok.
Maya ti nurun ngayau nya, bala pengayau perintah Raja Brooke berengkah mudik Batang Layar lalu ngetu bemalam ba Nanga Tiga. Ari nya sida mudik Sungai Tiput, ngiga jalai muntang ari Spak lalu nuju Bukit Sadok. Datai di kaki Bukit Sadok, Raja Charles Brooke seduai Tuan Muda Charles Brooke pan muka aum. Ba aum nya Raja Charles Brooke madah, perintah nadai ati deka bemunsuh enggau Nanang seduai Luyoh. Perintah Raja deka meri pengampun ngagai seduai, enti seduai deka nyerahka diri ngagai perintah Raja.
“Perintah Raja semina deka ngayau Rentap aja. Aku enda ulih ngampun penyalah iya. Iya udah ngaga penyalah besai ngelaban perintah Raja. Tegal beperang ngelaban iya Tuan Allan Lee mati di Nanga Skrang dulu suba,” ku Raja Charles Brooke.
Ninga penemu Raja Charles Brooke munyi nya bala pengayau ari Saribas berasai senang ati. Sida mega nadai ati deka ngayau Nanang seduai Luyoh laban seduai menyadi nya mega kaban belayan sida ari Saribas.
“Nya alai, sapa ti patut dipilih kitai betemu lalu berunding enggau Nanang seduai Luyoh?” pia ku Raja Charles Brooke.
“Kati enti kita milih Jabu apai Umping enggau menyadi iya Ngadan apai Rembi?” pia ku bala tuai bansa Iban ari Saribas.
“Setujuuuuu…!” pia ku saut bala tuai Iban ti bukai enggau bala mayuh. Raja Charles Brooke pan setuju enggau penemu bala pengayau iya nya.
Jabu seduai Ngadan pan niki ke Bukit Sadok. Seduai enggai lalu ngagai kuta Bukit Sadok laban takutka Libau-Rentap. Seduai semina datai ba tengan bukit nya aja lalu ngasuh Nanang seduai Luyoh ngusung seduai dia. Nanang enggau Luyoh setuju betemu enggau seduai menyadi ari Saribas nya. Maya ti betemu lalu berunding enggau Nanang seduai Luyoh, Jabu enggau Ngadan pan nusui pasal jaku ari perintah Raja Brooke nya. Udah ninga jaku pesan Raja ti dibai Jabu enggau Ngadan, Nanang seduai Luyoh pan ngempuruka bala nembiak seduai. Lama sida bekelikuh enggau pangan diri pasal pesan enggau semaya Raja Charles Brooke. Nyau kelama-lama nya baru sida datai ba pemutus jaku saum runding. Maya nya mega Nanang teingatka jaku tangkan Kumang dalam mimpi apai iya OKP Dana “Bayang”: Peturun Dana enda ulih ngalahka bansa Ribai. Nanang enggau Luyoh mai sembilan iku manuk sabung seduai betemu lalu berunding enggau Raja Charles Brooke di kaki Bukit Sadok. Ninga Nanang enggau Luyoh setuju nundukka perintah, Raja Charles Brooke pan nangkan seduai.
DIASUH NGISI UKUM 400 TAJAU
“Seduai mesti ngisi ukum ngena 400 tajau rusa tauka pulai ngagai mata duit $3,200. Tajau tauka duit nya nyadi jamin sempekat seduai enggau perintah, seduai enda tau ngaga pengachau agi. Enti seduai nadai ngaga pengachau ngelaban perintah Raja dalam kandang tiga taun ila, perintah Raja deka mulaika tajau seduai nya baru ngagai seduai. Kati seduai setuju megai sempekat tu?” ku Jabu enggau Ngadan.
Polisi perintah nya niup bara api dendam bala tuai bansa Iban di Batang Ai baka Penghulu Ngumbang “Berauh Langit” di Mepi. Ngumbang di bantu Iban ari Emperan di Batang Kanyau, Katibas enggau Batang Rajang. Manuk Sabung Penghulu Ngumbang ti benama Penghulu Bantin “Ijau Lelayang” bendar amai bedengah bala Perintah Raja ti diuluka OKP Nanang ari Padeh, Penghulu Minggat ari Awik enggau Jabu ari Bangat, Skrang. Dua taun udah ti alah di menua Kedang, Penghulu Ngumbang, Penghulu Bantin, Imba, Allam setuju bebaik enggau Perintah Raja ngena chara Bebanchak Babi di Lubok Antu enggau di Kapit.
NANANG MATI MAYA KAYAU LUS
Taja pia, bala Iban berimba mungkar menua baru di Balleh enggau Ulu Rajang majak dikachau bansa Orang Ulu nyentuk ke taun 1894. Berindik ari nya kaban belayan sida ari Batang Kanyau, Batang Ai, Batang Lupar datai mantu bala Iban di menua nya bebalas lalu ngujungka penyarut nyadi senyadi. Nya ti disebut Raja Charles bala Iban di menua ulu Rajang angkat ngelaban Perintah Brooke lalu ngasuh OKP Nanang nyadi Tuai Kayau. OKP (Penghulu) Nanang enggau Pengarah Ringkai mati maya “Kayau Lus” nya, ngelaban Bantin Ijau Lelayang.
Sebedau nya, pemutus ati anak OKP Dana ti benama Nanang seduai Luyoh ti nyerahka diri ngagai perintah James Brooke taun 1861, lalu enda nyadi nanahka Libau Rentap di Bukit Sadok, endang penemu ti pintar; ukai tegal buyan, tang laban seduai ingatka pesan apai seduai OKP Dana ari Kumang. Enti sema seduai nyadi enggau Libau Rentap ngetanka kuta Bukit Sadok, tentu seduai sama nasit enggau Aji enggau dua iku anak iya nya. Nya mih kaul jaul Bujang Berani Iban “Iban Warriors” enggau Bunsu Petara (Orang Panggau Libau / Gelong) Pechaya tauka enda bala pemacha, nya bepanggai ba diri empu ga.
(Betampung ba Tusun Ke-8 minggu nyin ila)
Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
Oleh HARRY USUP