Tusun Ke-6
AJI APAI LIMPA
Aji tu anak O.K.P Dana “Bayang”, adi Nanang seduai Luyoh. Taja pan iya biak ke sida tiga menyadi, tang iya ke pemadu berani sereta landik agi megai sereta ngatur nembiak baka niang apai sida niang O.K.P Dana “Bayang”. Nya alai udah apai iya O.K.P Dana “Bayang” mati dalam taun 1854, Aji dipilih nyadi tuai Iban di Padeh enggau Ulu Layar.
Lebuh O.K.P Dana “Bayang”agi idup, cherita pasal pemerani Aji enggau bala menyadi iya nadai tentu disebut orang mayuh. Taja pia laban apai sida endang pugu raja berani Batang Saribas, Aji enggau bala menyadi iya endang suah enggau apai sida ngayau di serata menua tu kelia. Berita pasal pemerani Aji tampak didinga sepengudah iya nganti apai iya nyadi tuai.
Udah ti alah laban James Brooke enggau Kapten Henry Keppel di Padeh dalam taun 1843, bala Aji diau jenuh. Setaun udah nya, Aji enggau Nanang seduai Luyoh, sama-sama enggau Linggir Mali Lebu ari Paku betemu enggau Tuan Raja di Sarawak (Kuching). Sida madahka diri nunduk lalu badu agi ngelaban perintah. Tang udah nya dalam bulan April 1854, Tuan Muda Charles Brooke ke disempulang Abang Aing, Native Officer ari Simanggang ngumpul bala pengayau deka nyerang rumah Dandi tauka Apai Dendang ke bensumbar “Gasing Gila” iya nya tuai Iban Skrang di Tekalong dalam Batang Skrang. Kebuah perintah deka nyerang rumah “Gasing Gila” laban iya disangka perintah nulung Libau-Rentap betempuh ngelaban perintah di Sungai Lang.
AJI MANTU DANDI
Ninga berita perintah deka nyerang, Dandi “Gasing Gila”pan minta bantu bala tuai Iban ke bukai ngenanka rumah iya. Nya alai Aji pan lalu datai enggau bala iya ari Padeh mantu Dandi di Tekalong. Linggir Mali Lebu ari Paku mega bisi datai nulung Dandi ngenanka rumah iya ari ke diserang bala Raja Brooke. Perintah pan enda chamang-chamang lalu nyerang rumah Dandi tang enda alah sida laban bala orang ke ngesah iya mayuh amat ari Saribas enggau Skrang.
Ninga Aji bisi mantu Dandi “Gasing Gila” di Tekalong Tuan Muda Charles Brooke pedis amai ati. Iya pan deka ngukum Aji seduai Linggir “Mali Lebu” enggau tajau lapan. Aji seduai Linggir enggai ngisi ukum nya laban Tuan Muda Charles Brooke endang salah laban nyerang rumah Dandi ke nadai penyalah. Aji ukai semina enggai ngisi ukum nya, tang iya mega deka ngukum Tuan Muda laban nyerang rumah orang sengapa. Dandi nadai penyalah. Ukum tu nadai temu pengujung laban Aji majak enggai. Perintah pan enda agi ngansak iya mayar ukum nya.
RUMAH AJI DISERANG TUAN MUDA
Dalam bulan April 1857, Tuan Muda enggau bala Balau ari ili Batang Lupar nyerang rumah Aji di Padeh. Udah ke betempuh enda lama dia bala Aji pan alah. Rumah panjai sida ditunu bala Balau.
Udah nya, bala Iban di ili Layar ke betuaika Bunyau Apai Bakir di Rantau Anak enggau Datu Patinggi Udin tuai bansa Melayu di Betong pan nundukka perintah. Tuan Muda pan ngasuh Bunyau enggau Datu Patinggi Udin nyadi tuai ngaga Kubu Lily di Betong kena nagang bala Aji undur ke ili Saribas nyerang orang bukai. Sekumbang bala Bunyau enggau anak iya Bakir seduai petunggal Melina anak Maoh ke bensumbar “Panggau” kisuk ngaga Kubu nya, Aji mega kisuk nemuai ngagai bala tuai-tuai Iban Saribas enggau Skrang nyengkaum Rentap di Bukit Sadok. Lebuh ke nemuai Aji berunding mai bala tuai-tuai Iban angkat ngelaban perintah Raja Charles Brooke ti maya nya majak deka ngemesaika kuasa iya ke ili Saribas udah Linggir ke alah di Beting Maru dalam taun 1849.
AJI MALAS UTI NIANG APAI IYA
Udah nya Aji majak-semajak nguluka kayau anak nebing tasik antara Nanga Saribas enggau Nanga Sadong. Di Sadong bala Aji udah munuh sekeda rayat Raja ke ditemu sida berikan di tasik. Ketegal pedis ati ngagai Linggir ke udah nundukka perintah enggau nadai berunding enggau iya dulu, Aji bepetenahka serang iya nya serang Linggir “Mali Lebu” ari Paku.
Kelimpah ari nya Aji mega majak nguluka kayau anak nyerang munsuh ti udah nyerang niang apai iya OKP Dana ba Tanjung Kauk sepemanjai Batang Lupar datai ke Lingga. Sida enda berani nampak mansa Kubu Lily di Betong. Nya alai maya tengah malam ari Lubuk Bemban sida narit perau bedarat lalu rembus di Nanga Pasa mutuska Tanjung Betong. Pengawa sida Aji tu balat bendar ngerusak umai paya bala Melayu ke ngelingi nya.
Ketegal suah tasah diserang bala Aji ari Layar, Orang Kaya Janting ari Banting pan nguluka bala iya nyerang rumah Aji di Padeh, Layar. Ninga bala munsuh deka datai nyerang, bala Aji nganjung bala indu nembiak iya ke Nanga Spak. Din sida dijaga bala bujang berani Batang Layar.
Udah ke berunding enggau Bakir seduai menyadi iya Melina “Panggau” di Kubu Betong, Orang Kaya Janting pan mudik Layar lalu masuk Padeh. Datai enda jauh ari rumah Aji di Padeh sida pan ngetu belelak dia. Aji enggau bala iya pan nganti penatai munsuh. Iya ngasuh sida nebang kayu ke besai-besai lalu dibuai ke sungai Padeh ambika rarat ngagai perau bala munsuh. Lemai nya Aji lalu nguluka bala iya nyerang munsuh ke betatam ari ili pendai sida. Sida bediri atas batang kayu ke dibuai sida lalu numbuk munsuh ngena sangkuh. Lebuh munsuh ngansakka sida ke ulu agi, sida lalu belalai ba dan-dan kayu ke dibuai sida ke sungai, nya alai pedis amat sida deka nyerang bala Aji. Bala munsuh semina ulih ngenanka diri aja. Sida enda ulih nyerang bala Aji laban perau sida udah diempang reba kayu rarat ke dibuai bala Aji ke ai Sungai Padeh. Maya ke betempuh ba ai sungai tu mayuh bala munsuh mati tang bala Aji enda ulih ngambi pala sida laban ai Sungai Padeh nyau repa diempang batang enggau dan kayu ke anyut.
Tumu pagi siti bala Orang Kaya Janting mudik baru. Sida niki ke pantai deka nyerang rumah Aji. Lebuh sida bejalai nuju rumah Aji, bala Aji endang udah besedia ngipa lalu nyerang sida ari sepiak-sepiak jalai nuju ke rumah iya. Mayuh amai bala munsuh mati dibunuh bala bujang berani Aji. Meda baka nya Orang Kaya Janting pan enggai agi ngelaban. Iya pan mai bala iya pulai ke Banting.
AJI NGUJI NYERANG SPAOH
Dalam taun 1858 Aji mai Lintong “Mua Ari” tuai ari Iban Kanowit ngumpul bala lalu deka nyerang Spaoh. Aji mai sida mansa Kubu Lily di Betong maya tengah malam enggaika ditemu bala sida Bunyau Apai Bakir enggau Tuan Watson enggau J.B Cruickshank ke nyaga Kubu di Betong nya. Agi dinihari bala Aji datai di Spaoh, tang sida belalai nama batang Buling dulu. Tang enda mukai-mukai tumu pagi nya Melayu ke undur ngiga daun apung, tepedaka bala Aji bisi dalam Sungai Buling. Melayu dia pan berumban madahka Laksamana Amir enggau anak iya Abang Apong, tuai Melayu Spaoh. Tusah ati bala Laut Spaoh. Nya alai sida minta bantu Linggir “Mali Lebu” nagang Aji ngayau ngalahka Spaoh. Linggir Mali Lebu lalu mai Munji apai Nyaru undur ke Spaoh. Datai din seduai lalu bekayuh nama sungai Buling. Meda Linggir “Mali Lebu” datai, Aji pan ngelaluka iya. Udah nya Linggir pan bejaku nangkan Aji enda ngasuh iya ngayau Melayu Spaoh, laban sida kelalu semak iya tambah mega pangan iya ke suah enggau iya ngayau ngelama tu. Ninga Linggir nagang, Aji pan enda nyadi ngayau ke Spaoh laban iya bebasaka Linggir “Mali Lebu” ke tuai ari iya sereta mega seiku tuai ke kala nyadi manuk sabung apai iya niang O.K.P. Dana “Bayang” maya ngayau, lebih agi maya sida nyerang munsuh di Undup dua tiga taun dulu ari nya suba.
Aji pan mai bala iya mulaika diri bedarat ninting bukit antara Paku enggau Layar. Perau sida tinggal di Buling laban enggai mansa Kubu Betong takut ke temu perintah Raja Brooke.
NGAYAU IBAN NUNDUKKA RAJA BROOKE
Udah tembu Kubu Lily di Betong nya dalam taun 1858, Aji angkat ngelaban semua Iban ili Layar ke udah nundukka perintah Raja Brooke. Iya mai bala Iban Padeh enggau Ulu Layar deka nyerang Kubu Betong, tang enda tentu ulih sida. Kubu nya semina balat amai rusak ditimbak sida Aji ngena meriam. Tu ngepunka laya Aji enggau Iban ili Layar ke betuaika Bunyau Apai Bakir. Maya tu Linggir “Mali Lebu” enggau Iban Paku diau diri aja. Iya enda nanahka sapa-sapa laban sida tu sama bela kaban belayan sereta pangan sida magang.
Meda Aji lalu enggai nundukka perintah Raja, Tuan Muda Charles Brooke pan merambu deka nyerang rumah Aji di Padeh. Iya ngumpul bala bujang berani Iban Skrang enggau sida ari Banting enggau Undup angkat ari kubu di Skrang lalu begempung enggau bala Iban enggau Melayu ti diuluka Tuan Watson, Bakir, Melina “Panggau” enggau bala penyaga Kubu Betong ke bukai.
Kayau tu diatur Bunyau apai Bakir enggau manah. Maya sida mudik Batang Layar, semina perau Iban ari Saribas dulu, enggaika bala perintah Raja nyerang Iban ari ili Nanga Padeh ke udah nundukka perintah.
AJI MATI KENA TIMBAK
Enda disadang-sadang, maya bala perintah mansa kerangan ke besai semak nanga Sungai Langit, bala Aji pan nyerang bala Tuan Muda Charles Brooke ke benung berintai-rintai ba perau. Meda Aji ngedarka ilang iya datai deka mantap bala perintah, bala Raja ke benama pan nimbak iya, kena pala. Aji pan tejula lalu mati tekala nya.
Meda Aji udah mati Nanang seduai Luyoh mai bala iya nyurutka diri. Tuan Muda Charles Brooke mai sida bemalam ba kerangan Sungai Langit. Pagi seiti sida lalu bebagi dua, sebagi diasuh iya ke Julau ngayau Mujah “Buah Raya” ke ngelanggar jaku perintah Raja Brooke ke selalu nangkan bansa Iban enda tau pindah lalu ngempu menua tungga ke Batang Rajang laban nya menua bansa Beketan, Kayan, Tanjong enggau bansa bukai mega, ku iya. Sebedau Mujah ‘‘Buah Raya’’, nadai bansa Iban diau di menua Batang Rajang.
Sebagi agi diuluka Tuan Muda Charles empu ke Bukit Sadok, deka nyerang Libau-Rentap ti kedua kali. Sebedau sida angkat ari nya nadai seiku bala Iban ari Saribas berani mumpung pala Aji, laban takutka bala menyadi iya Nanang seduai Luyoh bebalaska pemati Aji. Nya alai pala Aji dipumpung lalu dibai Iban Skrang, laban sida jauh sereta likun agi bisi Kubu James di Skrang nyaga sida ari serang bala menyadi Aji.
AJI BEBALI NYADI BAYA
Sekumbang pala Aji agi di Skrang suah bala Iban Batang Skrang parai diempa baya. Orang mega bisi meda Aji selalu ayan ba pendai sida. Maya iya terjun ke ai, orang meda iya nyau bebali nyadi baya. Nyau lama-kelama orang di menua nya bisi mimpi madah, baya ke suah nangkap orang Batang Skrang nya endang Aji, ti udah bebali nyadi baya. Dua tiga taun udah nya, pala Aji diambi bala menyadi iya empu lalu ditumbak di Buluh Antu, semak pendam apai iya niang O.K.P. Dana “Bayang”.
Aji semina empat taun aja nyadi tuai belabuh ari taun 1854 nyentuk ke 1858. Taja pia pemerani enggau pengeran ati iya ke ngelaban perintah endang meruan dikeingatka orang belama, lebih agi bala Iban di kandang menua Kalaka-Saribas. Pemati Aji tu endang ngamatka sumpah Kumang dalam mimpi apai iya O.K.P. Dana “Bayang”. Peturun Dana “Bayang” enda telabanka bala Raja Ribai (Raja Brooke). Amai ga, tang nadai ku enggau. Iban bukai ga enda berani ngelaban munsuh, kati enda Aji dih! Aji alah di tanah, ila mih Iban menang di gelanggang.
Pemutus ati anak OKP Dana ti benama Nanang seduai Luyoh ti nyerahka diri ngagai perintah James Brooke taun 1861, lalu enda nyadi nanahka Libau Rentap di Bukit Sadok, endang penemu ti pintar; ukai tegal buyan, tang laban seduai ingatka pesan apai seduai OKP Dana ari Kumang. Enti sema seduai nyadi enggau Libau Rentap ngetanka kuta Bukit Sadok, tentu seduai sama nasit enggau Aji enggau dua iku anak iya nya. Nya mih kaul jaul Bujang Berani Iban “Iban Warriors” enggau Bunsu Petara (Orang Panggau Libau / Gelong) Pechaya tauka enda bala pemacha, nya bepanggai ba diri empu ga.
(Betampung ba Tusun Ke-7 minggu nyin ila)Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
Oleh Harry Usup Umbar