![](https://utusansarawak.com.my/wp-content/uploads/2020/11/Pic7.jpg)
![](https://www.utusansarawak.com.my/wp-content/uploads/2020/11/Pic7.jpg)
Tusun Ke-5
ORANG KAYA PEMANCHA DANA “BAYANG”
Dua taun udah nya, dalam taun 1806, Dana matak kayau, nguluka bala Iban Saribas enggau Skrang ngalahka pasar Singkawang. Bala munsuh bendar amai ngetanka diri. Maya nya munsuh mega agi ngena duku panjai enggau pedang. Taja pia, bala Dana menang baru. Bala munsuh ke agi idup rari melunggang ke pasar Mentrado. Kelimpah ari ke mumpung pala munsuh, sida bulih amat tangkap dibai sida pulai ke menua nyadi ulun. Peturun sida tu agi bisi di menua Saribas nyentuk ke sehari tu.
Laban bala munsuh di Singkawang tadi mayuh rari ke Mentrado maya sida nyerang menua nya, dalam taun 1810, Orang Kaya Pemancha Dana pan nguluka bala Iban Saribas enggau Skrang beraban ngena 180 buah perau pengayau nyerang Mentrado. Sida munuh beratus-ratus iku munsuh lalu mai mayuh mega ulun pulai ke menua. Peturun sida tu agi bisi di Saribas, lalu bisi mega sida maya nya dijual ngagai tuai-tuai Melayu, lalu masuk agama Islam.
Malam taun 1815, kira-kira lima taun udah ke ngalahka pasar Mentrado, di Kalimantan Orang Kaya Pemancha Dana “Bayang” nguluka lebih seratus buah perau pengayau bala bansa Melayu enggau bansa Iban Saribas enggau bansa Iban Skrang ngayau lalu ngalahka pasar Pontianak. Sida balat bendar beambuk ngelaban munsuh ti ngetanka pasar Pontianak. Taja pia, bala Dana enda tentu ulih masuk kandang pasar nya. Sida semina bulih pala munsuh ke muru sida ke tasik aja ngena perau sida. Maya kayau tu mih manuk sabung Orang Kaya Pemancha Dana “Bayang” ti benama Libau-Rentap enggau bala pengayau ari Skrang bedengah munsuh seperau kayau di tasik semak Pontianak. Maya nya sida mega bulih keris beulu emas.
Kira-kira dalam taun 1820, Dana “Bayang” nguluka kayau ngalahka bansa bukai di Tanjung Datu. Maya kayau tu munsuh di Tanujung Datu dibantu bala Orang Kaya Temenggong Jugah anak Nyambong ke udah pindah ke Lundu enggau bala iya ari Sebuyau. Kayau Dana ke sekali tu mega rat.
BEDIL “BUJANG TIMPANG BERANG”
Kira-kira dalam taun 1820, Dana Bayang sekali agi matak kayau ngalahka Mempawah enda jauh ari Sambas, di Kalimantan. Dalam kayau tu bala iya bulih mayuh amat pala bala munsuh orang berikan. Tang enda lama udah nya, bala tuai Saribas baka sida Orang Kaya Antau “Linggang Nengeri” enggau menyadi iya Orang Kaya Gun “Mangku Bumi” ari Rimbas, nirika kayau anak. Dalam taun 1834, Dana “Bayang” lalu nguluka bala pengayau beraban 200 buah perau ngayau baru ke Sambas lalu ngalahka kubu Sultan Sambas. Bala Dana ngerampas bedil munsuh ke bisi tulis 1515. Bedil nya lalu dibai pulai ke Padeh di Saribas, nama bedil nya diberi sida “Bujang Timpang Berang”. Bedil tu mih ke dikena anak Dana “Bayang”, iya nya Orang Kaya Pemancha Nanang seduai Luyoh ngelaban perintah begulai enggau Rentap nguta Bukit Sadok, sampai ke iya nundukka perintah dalam taun 1861.
PENYARUT BANSA IBAN
Serambau enggau taun Orang Kaya Pemancha Dana ke ngayau ngalahka Sambas, Orang Kaya Rabong ari Skrang bisi charut enggau sida Bukit Banting di Lingga. Pia mega bala Iban di Lemanak di Batang Ai mega bisi charut enggau orang Undup nya. Kenu ka Dana “Bayang” orang Undup enggau orang Dau ukai munsuh iya, nya alai iya madahka diri enggai masuk champur dalam laya nya. Nya alai pemulai OKP Dana “Bayang” ari Sambas, iya setuju ngaduka laya sida nya. Dana “Bayang” pan mai bala tuai-tuai kayau Iban di Saribas enggau Layar baka Linggir-Mali Lebu, Minggat-Apai Runai, Enchana-Letan, Chulo-Tarang, Unal-Bulan, Igoh-Apai Lamban, Uyu-Apai Ikum, enggau Sabok-Gila Berani sereta mega menyadi Dana empu Isek seduai Senang besaup ngaduka penyarut bansa Iban nya.
NUNDUK NGAGAI PERINTAH RAJA BROOKE
Dalam taun 1843 lebuh James Brooke seduai Admiral Keppel nyerang Saribas ba Nanga Padeh, Orang Kaya Pemancha Dana “Bayang” endang udah tuai. Iya enggau bala anak iya Nanang, Luyoh, Aji enggau bala nembiak iya ari Padeh, Spak enggau Ulu Layar alah laban bala James Brooke. Sida Linggir-Mali Lebu di Paku mega alah kayau laban perintah Raja James Brooke. Dua tiga bulan udah perang tu dia Dana seduai Linggir lalu nundukka perintah Raja Brooke ba Tanjung Sabuluh ba ili Saribas.
Dalam bulan Julai 1853, Orang Kaya Pemancha Dana “Bayang” enggau sida sekaban belayan ari ili Layar, Paku enggau Padeh nurun nginti Buntal ba Tanjung Kauk ba Nanga Rimbas di Batang Saribas. Enda disadang-sadang datai bala munsuh ti beraban mayuh amat nyerang bala Dana ke benung nginti. Maya nya mayuh bala Iban Saribas enda mai senjata. Taja pia, sida ulih ngenanka diri semina ngena sengayuh enggau suar aja. Mayuh perau Iban Saribas karam. Mayuh bala Dana mati lemas tauka dibunuh munsuh.
Antara beratus-ratus Iban Saribas semina Orang Kaya Dana enggau sekeda ke bukai ulih ngenanka diri ari serang munsuh ngena duku mit ke dikena meruti ikan. Lebuh ke bamuk semua kaban iya nyengkaum menyadi iya Isek seduai Senang mati lemas tauka dibunuh munsuh. Orang Kaya Pemancha Dana ulih nyemerai ke tebing deka nyelamatka diri. Maya nya mega tujuh iku munsuh nitihka iya. Datai di tebing dia iya ngetanka diri ngena duku mit ngelaban munsuh tujuh iku nya. Bendar amai sida bepantap tang Orang Kaya Pemancha Dana “Bayang” bangat kebal, enda telih jamah duku munsuh. Engka amai ga, mensia tulung orang Gelong tu enda ulih mati ba jari munsuh. Nyau kelama-lama bala munsuh pan nyau lemi, enda ulih ngelaban agi. Sida pan rari ninggalka Dana, enggai ngelaban agi. Udah munsuh pulai Orang Kaya pan luput.
Pagi seiti baru iya ngeleda lalu bejalai nebing pantai Sungai Saribas. Seninjik amai maya nya iya betemu enggau sida Melayu Saribas ti ngelala iya. Bala Melayu nya pan nganjung iya pulai ke Padeh.
MATI KETEGAL PENYAKIT MIANG BUAH
Enda lama udah nya Dana pan mai Linggir “Mali Lebu” ari Paku seduai Unal “Bulan” ari Ulu Layar bebalaska pemati bala Iban Saribas ba Tanjung Kauk nya. Sida deka ngayau munsuh ba Bukit Banting, tang enda mukai-mukai maya sida ke nyendiaka diri ba kayau tu, Dana “Bayang” kena rampit sakit miang buah (smallpox) lalu mati dalam taun 1854. Anak lelaki iya ti benama Umpu mega mati ketegal penyakit nya.
Udah Dana “Bayang” mati, anak lelaki iya ke lumur tiga ti benama Aji nganti iya nyadi tuai Iban Padeh. Taja pan iya biak ari Nanang seduai Luyoh, tang iya berani agi sereta landik agi megai nembiak ari dua iku menyadi iya ke tuai nya. Aji nyadi tuai semina empat taun aja. Iya mati maya ke beperang ngelaban Raja Brooke di Sungai Langit dalam taun 1858. Udah nya aka tuai iya Nanang nganti iya lalu dipaduka perintah nyadi Orang Kaya Pemancha Nanang dalam taun 1886.
ENDA NITIHKA JAKU TANGKAN KUMANG
Nya mih, ngenang pasal mimpi OKP Dana ti bensumbar Bayang ti enda tetiapka panau ba tusu Kumang, lalu Dana diberi Kumang jaku tangkan; iya sereta anak telesak iya enda tau ngelaban “mensia ti burak, Orang Putih “bebuk pirang sereta juring idung”. Enti ngelaban pan tetap alah. Nya mih jaku tangkan (sumpah) Orang Panggau Libau / Gelong, ti Bunsu Petara (Dewa) sigi bisa, enda tau dilanggar. OKP Dana empu sigi enda kala nguji ngelaban Orang Putih lebih-lebih agi Raja Brooke laban iya ingat sereta talukka ajar Kumang. Taja pia, anak iya Aji, engka enda ingatka ajar apai iya. Aji mati kena timbak sedadu Raja Orang Putih di Sungai Langit. Pia mega, dua iku anak Aji ti bisi niat ati deka bebalaska pemati apai iya ngelaban Raja Orang Putih lalu bejalai ngiga penemu enggau pengaruh ke menua Sabah. Seduai amat bisi bulih penemu enggau pengaruh, tang enda datai di menua diri empu di Padeh: seduai sama-sama mati di Sabah.
Pemutus ati anak OKP Dana ti benama Nanang seduai Luyoh ti nyerahka diri ngagai perintah James Brooke taun 1861, lalu enda nyadi nanahka Libau Rentap di Bukit Sadok, endang penemu ti pintar; ukai tegal buyan, tang laban seduai ingatka pesan apai seduai OKP Dana ari Kumang. Enti sema seduai nyadi enggau Libau Rentap ngetanka kuta Bukit Sadok, tentu seduai sama nasit enggau Aji enggau dua iku anak iya nya. Nya mih kaul jaul Bujang Berani Iban “Iban Warriors” enggau Bunsu Petara (Orang Panggau Libau / Gelong) Pechaya tauka enda bala pemacha, nya bepanggai ba diri empu ga.
(Betampung ba Tusun Ke-6 minggu nyin ila)
Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun.
Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
Ditulis Harry Usup Umbar (B. Sc (Hons) Human Development, UPM)