![](https://utusansarawak.com.my/wp-content/uploads/2020/08/APMM-Bot-Tunda3.jpg)
![](https://www.utusansarawak.com.my/wp-content/uploads/2020/08/APMM-Bot-Tunda3-1024x472.jpg)
TANJUNG MANIS: Sebuah bot tunda ke benung narit kapal sarat ngundan kerangan dipeda ngirauka ati ditan Ijinsi Neritka Kuasa Maritim Malaysia (APMM), Zon Maritim Tanjung Manis kena Hari Satu ke udah.
Direktor Zon Maritim Tanjung Manis Komander Maritim Mohd Ariz Md Kassim madahka, bot ke narit kapal nya ditan Bot Pengawal 22 maya OP PERMAI 2/2020 ba kandang tasik Belawai pukul 2.30 ngalih hari kena Hari Satu ke udah urung 3.1 batu nautika barat daya Tanjung Jerijih.
“Maya diperesa krew bot nya enda ulih mantaika dokumen Pas Port Clearance maya sida iya belayar.
“Semua kru ke ditan nya beumur antara 20 ngagai 65 taun. Dua iku lelaki rayat menua tu enggau empat iku lelaki rayat India ke nepan bot enggau barge nya bisi ngembuan dokumen pengelala diri ke patut,” ku iya maya meri penerang ngagai pengarang berita kemari.
Ku iya, bot tunda enggau kapal nya disempulang ngagai Jeti HSL, Tanjung Manis sereta diserahka ngagai Pemesai Nasat Zon Maritim Tanjung Manis ngambika nganga pengawa ke patut.
“Kes deka ditasat nitihka Akta Kastam 1967 laban enda ulih mantaika dokumen Port Clearance lebuh bejalai ba tasik.
“Kami enggau naka ulih ngaga pengawa merati sereta nginau dikena nentuka sebarang pengawa ke enda nitihka atur tauka undang-undang maya ba tasik ulih dijaga sereta ditagang,” ku iya.
Iya mega madahka, kerejasama ari mensia mayuh lebih agi komuniti maritim meri penerang sigi diperansang dikena mantu Maritim Malaysia ba pengawa ngemunaska jenayah ba tasik.
“Nya kebuah sebarang kompelin, penerang tauka penusah bebadi ke bisi nyadi ba tasik, mensia mayuh diperansang madah ngagai Palan Operasyen Zon Maritim Tanjung Manis ngena lumur 084-613292 tauka Palan Operasyen Maritim Malaysia Negeri Sarawak 082-432544,” ku iya.