BATU NIAH: Raban ari Balai Bomba dan Penyelamat Batu Niah enggau naka penyampat mansutka mansa (penumpang) ke tekepit kaki kiba dalam kerita maya penusah bebadi jalai raya nyadi malam Hari Empat ke udah.
Penusah nya nyadi urung pukul 10.22 malam ba Jalan Gunung Subis ke alai kerita 4WD belantak enggau kerita salon.
Nitihka pengari Bomba, pengudah nerima kangau bebadi ari mensia mayuh raban berumban ngelawa endur penusah nya nyadi urung sekilometer ari Balai Bomba Batu Niah.
Ku iya, pengudah datai ba endur penusah di Jalan Gunung Subis, raban Bomba enggau naka ulih sereta mansutka mansa (penumpang) ke tekepit di dalam kerita nya ngena perengka nyelamat.
“Pengudah mansa mujur dipansutka, iya terus diserahka ngagai para medik ke bisi datai nepan ambulan ngelawa endur nya.
“Deriba kerita salon enda tekepit sereta udah dianjung ngagai hospital lebih tumu agi lalu deriba kerita 4WD nadai bakal,” ku iya.
Raban Bomba ke diketuaika PBK II Peter Ngumbang (Supervisor) semina ngena timpuh 50 minit aja mansutka mansa ke tekepit.