![](https://utusansarawak.com.my/wp-content/uploads/2020/10/Sumber-Pertanian1.jpeg)
![](https://www.utusansarawak.com.my/wp-content/uploads/2020/10/Sumber-Pertanian1-1024x683.jpeg)
KABONG: Perintah Sarawak ngena Opis Menteri Ngemodenka Betanam Betupi, Tanah Adat enggau Pemansang Wilayah sigi enggau naka ulih ngasuh pengawa betanam betupi siti ari chara dikena meri penatai pemisi ngagai rayat ke diau ba menua peisir di nengeri tu.
Kaban Kunsil Nengeri (ADUN) Kabong, Mohd Chee Kadir madahka, batang tuju ngemeranka betanam betupi chara moden enggau komersial dikena nyungkakka ekonomi rayat ke diau mendam ba kandang menua pesisir di nengeri tu.
Iya mega ngambi siti chunto ke alai seiku orang bekebun nanam sayur chara moden mujur bulih penatai pemisi manggai ba RM60,00 sebulan.
“Ketegal nya aku ngasuh bala orang bekebun ba sitak Kunsil Nengeri (DUN) Kabong nanam mayuh bengkah utai ditanam ngambika enda bepanggai ba siti utai ditanam aja.
“Kebuah baka nya laban mayuh amat tanah puang ke bedau dikemansangka sereta ditejuka baka nya aja,” ku iya lebuh bejaku maya pengerami bejadi Program Jangkauan Komuniti Pertanian (AgriCOP) DUN Kabong ke diatur ba Balai Raya Sessang kena Hari Dua ke udah.
Ku Chee Kadir, mayuh orang bekebun ba nengeri tu udah mujur ba sektor betanam betupi laban sida iya nyereta sektor ke baka tu chara serius sereta ngemeranka pengawa nya.
“Nya kebuah sektor baru ke ulih meri pengaya nya betanama betupi lalu orang bekebun mega patut ngubah runding laban sektor betanam betupi ulih meri penguntung ke mayuh ngagai sida iya,” ku Chee kadir.
Ku Chee kadir, Perintah Sarawak nyediaka mayuh bengkah peluang enggau bantu ngagai orang bekebun tauka bumai dikena nentuka Sarawak mengkang nyadi siti nengeri lumur satu ngasilka produk betanam betupi enggau pemakai.
Iya mega madahka, pengawa ke baka nya sekeda ari chara Perintah Sarawak ngurangka penyampau import asil betanam betupi enggau pemakai ari menua luar.
“Nya kebuah Perintah Sarawak seruran nginga chara dikena mantu orang bekebun sereta ngerembaika pengawa betanam betupi.
“Mensia mayuh patut meda pekara nya siti peluang ke manah enti sida deka ngaga pengawa ke baka nya enggau serius dikena ngulihka penatai pemisi diri empu lebih mayuh agi,” ku iya.
Ku Chee Kadir, program ke baka nya mega nyadi platform dikena ngerapitka kaul sereta kerejsama Opis Betanam Betupi enggau mensia mayuh, orang bekebun enggau orang nupi ikan ba kandang menua pesisir enggau menua ulu.
Kelimpah ari nya ku Chee Kadir, program nya mega dikena meri penemu senentang teknologi betanam betupi pemadu baru ngena licha, eksibisyen enggau model sereta demonstrasyen betanam betupi.