MARUDI : Penulung Menteri Perintah Pelilih Menua minta rakyat ba endur tu besabar enggau penanggul bekal eletrik tauka bekal ai beresi baka ke bisi nyadai empai lama ke udah.
Ku Penguang, kebuah penanggul bekal eletrik enggau bekal ai ba mayuh bengkah endur empai lama ke udah bisi nyadi laban kontrator benung ngadu sereta nganti komponen enggau paip ngena kualiti ke lebih manah agi.
“Nya kebuah penanggul ke baka nya bisi nyadi lalu enti semua pengawa nya udah tembu iya manah baru baka ke ngelama tu,” ku iya.
Ku Penguang, empai lama ke udah pemesai iya bisi nerima kompelin ari seiku orang senentang bekal eletrik ke putus sereta nganu pemesai iya.
Iya ngasaika diri nesal amat enggau seiku orang nya ke nganu pemesai iya sereta nyalahka pengari rayat laban pengawa ke baka nya ukai utai ke patut digaga iya.
“Pengudah seiku orang nya kompelin malam nya pemesai aku madah ngaga Sesco lalu enda lama pengudah nya bekal eletrik bisi baru,” ku iya.
Penguang ngelalau mensia mayuh enti nyema bisi penanggul bekal eletrik putus, iya ngasuh mensia mayuh terus madah ngagai Sesco sereta ukai nyalahka pengari rayat.
Ktegal nya Penguang ngasuh Sesco nyediaka siti mobile genset ba Pelilih Marudi dikena nyedika diri enti nyema bekal eletrik putus bisi nyadi.
Ku Penguang, perkara nya mega udah dipadahka iya ngagai kepala menteri lalu iya mega udah ngasuh opis menteri ke besangkut paut nyediaka mobile genset ba genap bandar mit.
“Aku meri terima kasih ngagai mayuh bengkah gerempung enggau rayat ba Marudi laban nemua senentang penaggul ke baka nya seruran bisi diasaika kitai,” ku iya.